ਨਿਊਯਾਰਕ, 7 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਸਿਆਸਤ ਵਿਚ ਕਦੋਂ ਕੌਣ ਵਿਰੋਧੀ ਤੋਂ ਮਿੱਤਰ ਬਣ ਜਾਵੇ, ਇਸ ਦੀ ਤਾਜ਼ਾ ਮਿਸਾਲ ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਜੇ.ਡੀ. ਵੈਂਸ ਹਨ। ਇਕ ਦਹਾਕਾ ਪਹਿਲਾਂ ਡੋਨਾਲਡ ਟਰੰਪ ਨੂੰ ਸਖ਼ਤ ਸ਼ਬਦਾਂ ਵਿੱਚ ਨਿਸ਼ਾਨਾ ਬਣਾਉਣ ਵਾਲੇ ਵੈਂਸ ਅੱਜ ਟਰੰਪ ਦੇ ਸਭ ਤੋਂ ਭਰੋਸੇਮੰਦ ਸਾਥੀ ਅਤੇ ਉਪ ਰਾਸ਼ਟਰਪਤੀ ਹਨ। ਪ੍ਰਸਿੱਧ ਅਮਰੀਕੀ ਮੈਗਜ਼ੀਨ ‘ਦਿ ਐਟਲਾਂਟਿਕ’ ਨੇ ਆਜ਼ਾਦੀ ਦਿਵਸ ਦੀ 250ਵੀਂ ਵਰ੍ਹੇਗੰਢ ਮੌਕੇ ਵੈਂਸ ਦਾ 10 ਸਾਲ ਪੁਰਾਣਾ ਲੇਖ ਮੁੜ ਪ੍ਰਕਾਸ਼ਿਤ ਕੀਤਾ ਹੈ। ਇਸ ਲੇਖ ਵਿੱਚ ਵੈਂਸ ਨੇ ਉਸ ਸਮੇਂ ਡੋਨਾਲਡ ਟਰੰਪ ਨੂੰ “ਸੱਭਿਆਚਾਰਕ ਹੈਰੋਇਨ” ਕਰਾਰ ਦਿੰਦਿਆਂ ਲਿਖਿਆ ਸੀ ਕਿ ਟਰੰਪ ਲੋਕਾਂ ਨੂੰ ਕੁਝ ਸਮੇਂ ਲਈ ਤਾਂ ਆਸ ਦਿੰਦੇ ਹਨ, ਪਰ ਦੇਸ਼ ਦੀਆਂ ਗੰਭੀਰ ਸਮੱਸਿਆਵਾਂ ਦਾ ਪੱਕਾ ਹੱਲ ਨਹੀਂ ਦੇ ਸਕਦੇ। ਉਨ੍ਹਾਂ ਇਹ ਵੀ ਕਿਹਾ ਸੀ ਕਿ ਟਰੰਪ ਵੱਡੇ ਵਾਅਦੇ ਕਰਦੇ ਹਨ, ਪਰ ਉਨ੍ਹਾਂ ਨੂੰ ਪੂਰਾ ਕਰਨ ਲਈ ਕੋਈ ਸਪੱਸ਼ਟ ਯੋਜਨਾ ਨਹੀਂ ਦਿੰਦੇ। ਉਸ ਸਮੇਂ ਜੇ.ਡੀ. ਵੈਂਸ ਆਪਣੇ ਆਪ ਨੂੰ “ਨੇਵਰ ਟਰੰਪ” ਸਮਰਥਕ ਦੱਸਦੇ ਸਨ ਅਤੇ ਟਰੰਪ ਨੂੰ ਰਾਸ਼ਟਰਪਤੀ ਬਣਨ ਲਈ ਅਣਉਚਿਤ ਵੀ ਕਰਾਰ ਦਿੰਦੇ ਸਨ। ਪਰ ਸਮੇਂ ਦੇ ਨਾਲ ਉਨ੍ਹਾਂ ਦੇ ਵਿਚਾਰ ਬਦਲੇ। ਉਹ ਓਹਾਇਓ ਤੋਂ ਸੈਨੇਟਰ ਬਣੇ, ਟਰੰਪ ਦੇ ਕਰੀਬੀ ਸਹਿਯੋਗੀ ਬਣੇ ਅਤੇ 2024 ਦੀ ਰਾਸ਼ਟਰਪਤੀ ਚੋਣ ਵਿੱਚ ਟਰੰਪ ਦੇ ਸਾਥੀ ਵਜੋਂ ਜਿੱਤ ਹਾਸਲ ਕਰਕੇ ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਬਣ ਗਏ।
