ਸੈਕਰਾਮੈਂਟੋ, 8 ਜੁਲਾਈ (ਹੁਸਨ ਲੜੋਆ ਬੰਗਾ)-ਮਾਈਕ੍ਰੋਸਾਫਟ ਦਾ ਹਿੱਸਾ ਬਣਨ ਤੋਂ ਬਾਅਦ ਡਬਲਯੂ ਏ-ਐਕਸਬਾਕਸ ਆਪਣੇ ਸਭ ਤੋਂ ਵੱਡੇ ਪੁਨਰਗਠਨ ਲਈ ਤਿਆਰ ਹੈ| ਸੀ.ਈ.ਓ. ਆਸ਼ਾ ਸ਼ਰਮਾ ਨੇ ਕਰਮਚਾਰੀਆਂ ਨੂੰ ਦਿੱਤੇ ਇਕ ਨੋਟ ਵਿਚ ਹਜ਼ਾਰਾਂ ਨੌਕਰੀਆਂ ਵਿਚ ਕਟੌਤੀ, ਲੀਡਰਸ਼ਿਪ ਵਿਚ ਤਬਦੀਲੀਆਂ ਤੇ ਗੇਮਿੰਗ ਡਿਵੀਜ਼ਨ ਦੇ ਕਾਰਜਾਂ ਵਿਚ ਇਕ ਵੱਡੇ ਬਦਲਾਅ ਦੀ ਰੂਪ ਰੇਖਾ ਦਾ ਵੇਰਵਾ ਦਿੱਤਾ ਹੈ| ਐਕਸਬਾਕਸ ਇਤਿਹਾਸ ਵਿਚ ਸਭ ਤੋਂ ਮਹੱਤਵਪੂਰਨ ਪੁਨਰਗਠਨ ਦੱਸਦੇ ਹੋਏ, ਸ਼ਰਮਾ ਨੇ ਕਿਹਾ ਕਿ ਲਗਭਗ 1,600 ਅਹੁਦਿਆਂ ਨੂੰ ਤੁਰੰਤ ਖਤਮ ਕੀਤਾ ਜਾ ਰਿਹਾ ਹੈ| 2027 ਵਿੱਤੀ ਸਾਲ ਦੇ ਅੰਤ ਤੱਕ ਮਾਈਕ੍ਰੋਸਾਫਟ ਦੇ 3200 ਹੋਰ ਅਹੁੱਦੇ ਖਤਮ ਕਰ ਦਿੱਤੇ ਜਾਣਗੇ| ਪੁਨਰਗਠਨ ਦੇ ਹਿੱਸੇ ਵਜੋਂ ਚਾਰ ਐਕਸਬਾਕਸ ਸਟੂਡੀਓ ਵੀ ਕੰਪਨੀ ਦੀ ਮਾਲਕੀ ਤੋਂ ਬਾਹਰ ਚਲੇ ਜਾਣਗੇ| ਇਹ ਕਾਰਵਾਈ ਮਾਈਕ੍ਰੋਸਾਫਟ ਦੇ ਕੰਪਨੀ ਵਿਚ 4,800 ਨੌਕਰੀਆਂ ਨੂੰ ਖਤਮ ਕਰਨ ਦੇ ਵਿਆਪਕ ਫੈਸਲੇ ਦਾ ਹਿੱਸਾ ਹੈ| ਸ਼ਰਮਾ ਨੇ ਕਿਹਾ ਕਿ ਮੈਂ ਜਾਣਦੀ ਹਾਂ ਕਿ ਇਹ ਦੁਖਦਾਈ ਹੈ ਪਰੰਤੂ ਇਹ ਪੁਨਰਗਠਨ ਸਾਲਾਂ ਦੇ ਨਿਵੇਸ਼ ਤੋਂ ਬਾਅਦ ਆਇਆ ਹੈ ਤੇ ਅਜਿਹਾ ਕਰਨਾ ਲਾਜ਼ਮੀ ਬਣ ਗਿਆ ਹੈ|
