ਜ਼ਹਿਰੀਲਾ ਟੀਕੇ ਲਾ ਕੇ ਫਾਂਸੀ ਦੇਣ ਦੀ ਕੋਸ਼ਿਸ਼ ਹੋਈ ਨਾਕਾਮ

ਸੈਕਰਾਮੈਂਟੋ, 3 ਅਕਤੂਬਰ (ਹੁਸਨ ਲੜੋਆ ਬੰਗਾ)-ਕ੍ਰਿਸਟਾ ਪਾਈਕ, ਜਿਸ ਨੂੰ 30 ਸਾਲ ਤੋਂ ਵਧ ਸਮਾਂ ਪਹਿਲਾਂ 19 ਸਾਲਾ ਕੋਲੀਨ ਸਲੇਮਰ ਦੇ ਕਤਲ ਲਈ ਮੌਤ ਸਜ਼ਾ ਸੁਣਾਈ ਗਈ ਸੀ, ਨੂੰ ਬੁੱਧਵਾਰ ਨੂੰ ਟੈਨੇਸੀ ਵਿਚ ਜਾਨਲੇਵਾ ਟੀਕਾ ਲਗਾ ਕੇ ਫਾਂਸੀ ਦੇਣ ਦੀ ਕੋਸ਼ਿਸ਼ ਨਾਕਾਮ ਰਹੀ ਤੇ ਉਹ ਬਚ ਗਈ| ਉਸ ਦੇ ਵਕੀਲਾਂ ਨੇ ਸ਼ੁੱਕਰਵਾਰ ਨੂੰ ਅਦਾਲਤ ਵਿੱਚ ਦਾਇਰ ਦਸਤਾਵੇਜ਼ਾਂ ਵਿੱਚ ਦੱਸਿਆ ਕਿ ਪਾਈਕ ਨੈਸ਼ਵਿਲ ਖੇਤਰ ਦੇ ਇੱਕ ਹਸਪਤਾਲ ਵਿੱਚ ਵੈਂਟੀਲੇਟਰ ’ਤੇ ਹੈ ਅਤੇ ਬੇਹੋਸ਼ੀ ਦੀ ਹਾਲਤ ਵਿੱਚ ਹੈ| ਵਕੀਲਾਂ ਨੇ ਦੱਸਿਆ ਕਿ ਜ਼ਹਿਰੀਲੇ ਟੀਕੇ ਪੈਂਟੋਬਾਰਬਿਟਲ ਦੀਆਂ ਦੋ ਘਾਤਕ ਖੁਰਾਕਾਂ ਦਿੱਤੇ ਜਾਣ ਤੋਂ ਬਾਅਦ ਪਾਈਕ ਨੂੰ ਜੀਵਨ-ਰੱਖਿਅਕ ਇਲਾਜ ਦਿੱਤਾ ਜਾ ਰਿਹਾ ਹੈ| ਵਕੀਲਾਂ ਸਟੀਫਨ ਫੇਰਲ ਅਤੇ ਲਿਊਕ ਇਹਨੇਨ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਫਾਂਸੀ ਦੇਣ ਦੀ ਕੋਸ਼ਿਸ਼ ਦੌਰਾਨ ਪਾਈਕ ਦੀਆਂ ਦੋਵਾਂ ਬਾਹਾਂ ’ਤੇ ਗੰਭੀਰ ਸੱਟਾਂ ਲੱਗੀਆਂ ਹਨ| ਵਕੀਲਾਂ ਨੇ ਨੈਸ਼ਵਿਲ ਦੀ ਅਦਾਲਤ ਵਿੱਚ ਇੱਕ ਐਮਰਜੈਂਸੀ ਪਟੀਸ਼ਨ ਦਾਇਰ ਕਰਕੇ ਮੰਗ ਕੀਤੀ ਕਿ ਟੈਨੇਸੀ ਦੇ ਸੁਧਾਰ ਵਿਭਾਗ ਨੂੰ ਬੁੱਧਵਾਰ ਰਾਤ ਨੂੰ ਉਸ ਨੂੰ ਫਾਂਸੀ ਦੇਣ ਦੀ ਰਾਜ ਦੀ ਅਸਫਲ ਕੋਸ਼ਿਸ਼ ਨਾਲ ਸਬੰਧਤ ਸਾਰੇ ਸਬੂਤਾਂ ਦੀ ਸੁਰੱਖਿਆ ਅਤੇ ਸੰਭਾਲ ਕਰਨ ਲਈ ਕਿਹਾ ਜਾਵੇ| ਪਾਈਕ, ਜਿਸ ਨੂੰ 1995 ਵਿੱਚ 19 ਸਾਲਾ ਕੋਲੀਨ ਸਲੇਮਰ ਦੇ ਕਤਲ ਲਈ ਮੌਤ ਦੀ ਸਜ਼ਾ ਸੁਣਾਈ ਗਈ ਸੀ, ਟੈਨੇਸੀ ਵਿੱਚ 200 ਸਾਲਾਂ ਵਿੱਚ ਫਾਂਸੀ ਪਾਉਣ ਵਾਲੀ ਪਹਿਲੀ ਔਰਤ ਬਣਨ ਵਾਲੀ ਸੀ| ਹੁਣ, ਉਸ ਦਾ ਕਾਨੂੰਨੀ ਕੇਸ ਰੁਕ ਜਾਵੇਗਾ| ਗਵਰਨਰ ਬਿਲ ਲੀ, ਜੋ ਕਿ ਰਿਪਬਲਿਕਨ ਹਨ, ਨੇ ਐਲਾਨ ਕੀਤਾ ਹੈ ਕਿ ਪਾਈਕ ਦੇ ਕੇਸ ਦੀ ਡੂੰਘਾਈ ਨਾਲ ਅਤੇ ਵਿਆਪਕ ਸਮੀਖਿਆ ਕਿਸੇ ਤੀਜੀ ਧਿਰ ਦੁਆਰਾ ਕੀਤੀ ਜਾਵੇਗੀ|