ਏਸ਼ੀਅਨ ਚੈਂਪੀਅਨਜ਼ ਟਰਾਫ਼ੀ ਦਾ ਇਤਿਹਾਸ, ਭਾਰਤ ਦੀ ਸ਼ਾਨ ਤੇ ਪੰਜਾਬ ਦੇ ਖੇਡ ਜਜ਼ਬੇ ਦੀ ਭਾਵੁਕ ਅਨਮੋਲ ਵਿਰਾਸਤ
ਜਲੰਧਰ, 25 ਅਕਤੂਬਰ (ਡਾ ਜਤਿੰਦਰ ਸਾਬੀ)-ਜਿਸ ਧਰਤੀ ਦੀ ਮਿੱਟੀ ਵਿੱਚ ਹਾਕੀ ਦਾ ਜਨੂੰਨ ਵੱਸਦਾ ਹੈ, ਜਿਸ ਦੇ ਪਿੰਡਾਂ ਨੇ ਦੇਸ਼ ਨੂੰ ਓਲੰਪੀਅਨ ਦਿੱਤੇ ਅਤੇ ਜਿਸ ਦੇ ਨੌਜਵਾਨਾਂ ਨੇ ਮੈਦਾਨਾਂ ਵਿੱਚ ਪਸੀਨਾ ਵਹਾ ਕੇ ਤਿਰੰਗੇ ਦਾ ਮਾਣ ਵਧਾਇਆ, ਉਸ ਪੰਜਾਬ ਵਿੱਚ ਇੱਕ ਵਾਰ ਫਿਰ ਕੌਮਾਂਤਰੀ ਹਾਕੀ ਦਾ ਜੋਸ਼ ਪਰਤਣ ਜਾ ਰਿਹਾ ਹੈ। 27 ਅਕਤੂਬਰ ਤੋਂ 5 ਨਵੰਬਰ ਤੱਕ ਜਲੰਧਰ ਅਤੇ ਮੋਹਾਲੀ ਵਿਖੇ ਹੋਣ ਵਾਲੀ ਪੁਰਸ਼ ਏਸ਼ੀਅਨ ਚੈਂਪੀਅਨਜ਼ ਟਰਾਫ਼ੀ-2026 ਸਿਰਫ਼ ਇੱਕ ਖੇਡ ਮੁਕਾਬਲਾ ਨਹੀਂ, ਸਗੋਂ ਪੰਜਾਬ ਦੀ ਹਾਕੀ ਵਿਰਾਸਤ, ਭਾਰਤੀ ਖਿਡਾਰੀਆਂ ਦੇ ਸੰਘਰਸ਼ ਅਤੇ ਨਵੀਂ ਪੀੜ੍ਹੀ ਦੇ ਸੁਪਨਿਆਂ ਨਾਲ ਜੁੜਿਆ ਇੱਕ ਭਾਵੁਕ ਮੌਕਾ ਹੈ।
ਜਲੰਧਰ, 25 ਅਕਤੂਬਰ (ਡਾ ਜਤਿੰਦਰ ਸਾਬੀ)-ਜਿਸ ਧਰਤੀ ਦੀ ਮਿੱਟੀ ਵਿੱਚ ਹਾਕੀ ਦਾ ਜਨੂੰਨ ਵੱਸਦਾ ਹੈ, ਜਿਸ ਦੇ ਪਿੰਡਾਂ ਨੇ ਦੇਸ਼ ਨੂੰ ਓਲੰਪੀਅਨ ਦਿੱਤੇ ਅਤੇ ਜਿਸ ਦੇ ਨੌਜਵਾਨਾਂ ਨੇ ਮੈਦਾਨਾਂ ਵਿੱਚ ਪਸੀਨਾ ਵਹਾ ਕੇ ਤਿਰੰਗੇ ਦਾ ਮਾਣ ਵਧਾਇਆ, ਉਸ ਪੰਜਾਬ ਵਿੱਚ ਇੱਕ ਵਾਰ ਫਿਰ ਕੌਮਾਂਤਰੀ ਹਾਕੀ ਦਾ ਜੋਸ਼ ਪਰਤਣ ਜਾ ਰਿਹਾ ਹੈ। 27 ਅਕਤੂਬਰ ਤੋਂ 5 ਨਵੰਬਰ ਤੱਕ ਜਲੰਧਰ ਅਤੇ ਮੋਹਾਲੀ ਵਿਖੇ ਹੋਣ ਵਾਲੀ ਪੁਰਸ਼ ਏਸ਼ੀਅਨ ਚੈਂਪੀਅਨਜ਼ ਟਰਾਫ਼ੀ-2026 ਸਿਰਫ਼ ਇੱਕ ਖੇਡ ਮੁਕਾਬਲਾ ਨਹੀਂ, ਸਗੋਂ ਪੰਜਾਬ ਦੀ ਹਾਕੀ ਵਿਰਾਸਤ, ਭਾਰਤੀ ਖਿਡਾਰੀਆਂ ਦੇ ਸੰਘਰਸ਼ ਅਤੇ ਨਵੀਂ ਪੀੜ੍ਹੀ ਦੇ ਸੁਪਨਿਆਂ ਨਾਲ ਜੁੜਿਆ ਇੱਕ ਭਾਵੁਕ ਮੌਕਾ ਹੈ। ਚੇਨਈ ਵਿਚ ਵਿਚਾਰ, ਚੀਨ ਵਿਚ ਇਤਿਹਾਸਕ ਸ਼ੁਰੂਆਤ-ਏਸ਼ੀਅਨ ਚੈਂਪੀਅਨਜ਼ ਟਰਾਫ਼ੀ ਦੀ ਕਹਾਣੀ ਏਸ਼ੀਆ ਵਿੱਚ ਹਾਕੀ ਨੂੰ ਹੋਰ ਮਜ਼ਬੂਤ ਮੁਕਾਬਲੇਬਾਜ਼ ਮੰਚ ਦੇਣ ਦੇ ਸੁਪਨੇ ਨਾਲ ਜੁੜੀ ਹੋਈ ਹੈ। ਇਸ ਟੂਰਨਾਮੈਂਟ ਦੇ ਵਿਚਾਰ ਦਾ ਐਲਾਨ 2007 ਵਿਚ ਚੇਨਈ ਵਿਖੇ ਹੋਇਆ । ਇਸ ਤੋਂ ਚਾਰ ਸਾਲ ਬਾਅਦ, 2011 ਵਿੱਚ ਚੀਨ ਦੇ ਓਰਡੋਸ ਸ਼ਹਿਰ ਵਿੱਚ ਪਹਿਲਾ ਪੁਰਸ਼ ਏਸ਼ੀਅਨ ਚੈਂਪੀਅਨਜ਼ ਟਰਾਫ਼ੀ ਟੂਰਨਾਮੈਂਟ ਕਰਵਾਇਆ ਗਿਆ।ਉਸ ਪਹਿਲੇ ਐਡੀਸ਼ਨ ਵਿੱਚ ਭਾਰਤ ਨੇ ਪਾਕਿਸਤਾਨ ਨੂੰ ਪੈਨਲਟੀ ਸ਼ੂਟਆਊਟ ਵਿੱਚ 4-2 ਨਾਲ ਹਰਾ ਕੇ ਖ਼ਿਤਾਬ ਜਿੱਤਿਆ। ਇਹ ਜਿੱਤ ਭਾਰਤੀ ਹਾਕੀ ਲਈ ਮਾਣ ਵਾਲਾ ਪਲ ਸੀ। ਮੈਦਾਨ ਵਿੱਚ ਜਿੱਤਣ ਦੀ ਇੱਛਾ, ਦਬਾਅ ਹੇਠ ਸੰਜਮ ਅਤੇ ਆਖ਼ਰੀ ਪਲ ਤੱਕ ਸੰਘਰਸ਼ ਕਰਨ ਦੀ ਭਾਵਨਾ ਨੇ ਭਾਰਤ ਨੂੰ ਪਹਿਲਾ ਚੈਂਪੀਅਨ ਬਣਾਇਆ।ਇਹ ਇਤਿਹਾਸ ਅੱਜ ਦੇ ਨੌਜਵਾਨ ਖਿਡਾਰੀਆਂ ਨੂੰ ਸੁਨੇਹਾ ਦਿੰਦਾ ਹੈ ਕਿ ਵੱਡੀਆਂ ਪ੍ਰਾਪਤੀਆਂ ਇਕ ਦਿਨ ਵਿੱਚ ਨਹੀਂ ਹੁੰਦੀਆਂ। ਇਨ੍ਹਾਂ ਪਿੱਛੇ ਸਾਲਾਂ ਦੀ ਮਿਹਨਤ, ਅਨੁਸ਼ਾਸਨ, ਕੁਰਬਾਨੀ ਅਤੇ ਆਪਣੇ ਦੇਸ਼ ਲਈ ਕੁਝ ਕਰ ਗੁਜ਼ਰਨ ਦਾ ਜਜ਼ਬਾ ਹੁੰਦਾ ਹੈ। ਪੰਜ ਖ਼ਿਤਾਬਾਂ ਨਾਲ ਭਾਰਤ ਨੇ ਬਣਾਈ ਆਪਣੀ ਪਛਾਣ—ਏਸ਼ੀਅਨ ਚੈਂਪੀਅਨਜ਼ ਟਰਾਫ਼ੀ ਦੇ ਇਤਿਹਾਸ ਵਿੱਚ ਭਾਰਤੀ ਪੁਰਸ਼ ਹਾਕੀ ਟੀਮ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਭਾਰਤ ਨੇ 2011, 2016, 2018, 2023 ਅਤੇ 2024 ਵਿੱਚ ਖ਼ਿਤਾਬ ਜਿੱਤੇ। ਸਾਲ 2018 ਵਿੱਚ ਭਾਰਤ ਅਤੇ ਪਾਕਿਸਤਾਨ ਨੂੰ ਮੀਂਹ ਕਾਰਨ ਫਾਈਨਲ ਪੂਰਾ ਨਾ ਹੋਣ ਕਰਕੇ ਸਾਂਝੇ ਜੇਤੂ ਐਲਾਨਿਆ ਗਿਆ ਸੀ।2023 ਵਿੱਚ ਚੇਨਈ ਵਿਖੇ ਭਾਰਤ ਨੇ ਮਲੇਸ਼ੀਆ ਨੂੰ 4-3 ਨਾਲ ਹਰਾ ਕੇ ਖ਼ਿਤਾਬ ਜਿੱਤਿਆ, ਜਦਕਿ 2024 ਵਿੱਚ ਚੀਨ ਦੇ ਹੁਲੁਨਬੁਇਰ ਵਿਖੇ ਭਾਰਤੀ ਟੀਮ ਨੇ ਮੇਜ਼ਬਾਨ ਚੀਨ ਨੂੰ ਫਾਈਨਲ ਵਿੱਚ 1-0 ਨਾਲ ਮਾਤ ਦਿੱਤੀ।ਇਹ ਜਿੱਤਾਂ ਸਿਰਫ਼ ਅੰਕੜੇ ਨਹੀਂ ਹਨ। ਇਨ੍ਹਾਂ ਵਿੱਚ ਉਨ੍ਹਾਂ ਖਿਡਾਰੀਆਂ ਦੀ ਮਿਹਨਤ ਸ਼ਾਮਲ ਹੈ ਜੋ ਸਵੇਰੇ-ਸ਼ਾਮ ਅਭਿਆਸ ਕਰਦੇ ਹਨ, ਸੱਟਾਂ ਅਤੇ ਮੁਸ਼ਕਲਾਂ ਦਾ ਸਾਹਮਣਾ ਕਰਦੇ ਹਨ ਅਤੇ ਹਰ ਮੈਚ ਵਿੱਚ ਦੇਸ਼ ਦੀ ਇੱਜ਼ਤ ਲਈ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ। ਪੰਜਾਬ ਦੀ ਧਰਤੀ ’ਤੇ ਭਾਰਤੀ ਜਰਸੀ ਪਹਿਨਣ ਦਾ ਮਾਣ—ਪੰਜਾਬ ਲਈ 2026 ਦਾ ਇਹ ਟੂਰਨਾਮੈਂਟ ਇਸ ਕਰਕੇ ਵੀ ਖ਼ਾਸ ਹੈ ਕਿ ਕੌਮਾਂਤਰੀ ਹਾਕੀ ਮੁੜ ਇਸ ਧਰਤੀ ’ਤੇ ਆ ਰਹੀ ਹੈ। ਜਲੰਧਰ ਦਾ ਓਲੰਪੀਅਨ ਸੁਰਜੀਤ ਸਿੰਘ ਹਾਕੀ ਸਟੇਡੀਅਮ ਲੀਗ ਪੜਾਅ ਦੇ ਮੁਕਾਬਲਿਆਂ ਦੀ ਮੇਜ਼ਬਾਨੀ ਕਰੇਗਾ, ਜਦਕਿ ਮੋਹਾਲੀ ਦਾ ਓਲੰਪੀਅਨ ਬਲਬੀਰ ਸਿੰਘ ਸੀਨੀਅਰ ਅੰਤਰਰਾਸ਼ਟਰੀ ਹਾਕੀ ਸਟੇਡੀਅਮ ਸੈਮੀਫਾਈਨਲ ਅਤੇ ਤਗ਼ਮਾ ਮੁਕਾਬਲਿਆਂ ਦਾ ਗਵਾਹ ਬਣੇਗਾ। ਜਲੰਧਰ ਤੋਂ ਮੋਹਾਲੀ ਤੱਕ ਹਾਕੀ ਦਾ ਤਿਉਹਾਰ—27 ਅਕਤੂਬਰ ਤੋਂ 2 ਨਵੰਬਰ ਤੱਕ ਜਲੰਧਰ ਵਿੱਚ ਲੀਗ ਮੈਚ ਹੋਣਗੇ। ਭਾਰਤ ਆਪਣੀ ਮੁਹਿੰਮ ਦੀ ਸ਼ੁਰੂਆਤ 27 ਅਕਤੂਬਰ ਨੂੰ ਬੰਗਲਾਦੇਸ਼ ਵਿਰੁੱਧ ਕਰੇਗਾ। ਇਸ ਤੋਂ ਬਾਅਦ ਭਾਰਤੀ ਟੀਮ ਦਾ ਸਾਹਮਣਾ ਚੀਨ, ਜਾਪਾਨ, ਮਲੇਸ਼ੀਆ ਅਤੇ ਦੱਖਣੀ ਕੋਰੀਆ ਨਾਲ ਹੋਵੇਗਾ। 4 ਨਵੰਬਰ ਨੂੰ ਮੋਹਾਲੀ ਵਿੱਚ ਸੈਮੀਫਾਈਨਲ ਅਤੇ 5 ਨਵੰਬਰ ਨੂੰ ਤਗ਼ਮਾ ਮੁਕਾਬਲੇ ਖੇਡੇ ਜਾਣਗੇ।ਹਾਕੀ ਇੰਡੀਆ ਅਨੁਸਾਰ ਦਰਸ਼ਕਾਂ ਲਈ ਦਾਖ਼ਲਾ ਮੁਫ਼ਤ ਰੱਖਿਆ ਗਿਆ ਹੈ, ਪਰ ਸਟੇਡੀਅਮ ਵਿੱਚ ਜਾਣ ਲਈ ਆਨਲਾਈਨ ਪਾਸ ਲੈਣਾ ਪਵੇਗਾ। ਇਸ ਨਾਲ ਵਿਦਿਆਰਥੀਆਂ, ਨੌਜਵਾਨ ਖਿਡਾਰੀਆਂ ਅਤੇ ਪਰਿਵਾਰਾਂ ਨੂੰ ਮੈਦਾਨ ਵਿੱਚ ਬੈਠ ਕੇ ਕੌਮਾਂਤਰੀ ਪੱਧਰ ਦੀ ਹਾਕੀ ਦੇਖਣ ਦਾ ਮੌਕਾ ਮਿਲੇਗਾ।
