ਕਾਲਾਂਵਾਲੀ/ਸਿਰਸਾ, 30 ਜਨਵਰੀ (ਭੁਪਿੰਦਰ ਪੰਨੀਵਾਲੀਆ)-ਨਗਰ ਪਾਲਿਕਾ ਕਾਲਾਂਵਾਲੀ ਵਲੋਂ ਪੰਜਾਬ ਬੱਸ ਅੱਡੇ ਨੇੜੇ ਲਗਪਗ ਦਸ ਲੱਖ ਰੁਪਏ ਦੀ ਲਾਗਤ ਨਾਲ ਬਣਾਏ ਜਾ ਰਹੇ ਸੁਲਭ ਪਖਾਨੇ ਦੇ ਨਿਰਮਾਣ ਵਿਚ ਘਟੀਆ ਸਮੱਗਰੀ ਦੀ ਵਰਤੋਂ ਬਾਰੇ ਸ਼ਿਕਾਇਤ ਤੋਂ ਬਾਅਦ ਅੱਜ ਨਗਰ ਪਾਲਿਕਾ ਦੇ ਮੁੱਖ ਇੰਜੀਨੀਅਰ (ਐਮ. ਈ.) ਦੀ ਮੌਜੂਦਗੀ ਵਿਚ ਨਿਰਮਾਣ ਸਮੱਗਰੀ ਦੇ ਨਮੂਨੇ ਲਏ ਗਏ | ਭਾਜਪਾ ਆਗੂਆਂ ਤੇ ਕੁਝ ਕੌਂਸਲਰਾਂ ਵਲੋਂ ਹਾਲ ਹੀ ਵਿਚ ਪਖਾਨੇ ਦੀ ਉਸਾਰੀ ਦੇ ਕੰਮ ਨੂੰ ਰੋਕਣ ਤੋਂ ਅੱਜ ਇਹ ਕਾਰਵਾਈ ਕੀਤੀ ਗਈ | ਚੇਤੇ ਰਹੇ ਨਗਰ ਪਾਲਿਕਾ ਕਾਲਾਂਵਾਲੀ ਵਿਚ ਚਾਰ ਥਾਵਾਂ 'ਤੇ ਸੁਲਭ ਪਖਾਨੇ ਬਣਾਉਣ ਦੀ ਯੋਜਨਾ ਬਣਾ ਰਹੀ ਹੈ | ਪੰਜਾਬ ਬੱਸ ਅੱਡੇ 'ਤੇ ਇਕ ਪਖਾਨੇ ਦੀ ਉਸਾਰੀ ਸ਼ੁਰੂ ਹੋ ਗਈ ਸੀ ਪਰ ਘਟੀਆ ਸਮੱਗਰੀ ਦੀ ਵਰਤੋਂ ਬਾਰੇ ਸ਼ਿਕਾਇਤ ਮਿਲਣ 'ਤੇ, ਭਾਜਪਾ ਮੰਡਲ ਪ੍ਰਧਾਨ ਲਵਲੀ ਗਰਗ, ਭਾਜਪਾ ਮੈਡੀਕਲ ਸੈੱਲ ਦੇ ਜ਼ਿਲ੍ਹਾ ਪ੍ਰਧਾਨ ਸੰਜੀਵ ਸਿੰਗਲਾ, ਸ਼ਹਿਰ ਦੇ ਕੌਂਸਲਰ ਸੁਭਾਸ਼ ਸ਼ਰਮਾ, ਹਰਵਿੰਦਰ ਸਿੰਘ, ਦਾਰਾ ਸਿੰਘ, ਨਿਤਿਨ ਗਰਗ, ਗੋਬਿੰਦ ਸ਼ਰਮਾ ਅਤੇ ਭਾਜਪਾ ਮੰਡਲ ਮੰਤਰੀ ਮਹੇਸ਼ ਆਜ਼ਾਦ ਅਤੇ ਜੋਤੀ ਸਰਾਂ ਮੌਕੇ 'ਤੇ ਪਹੁੰਚੇ ਤੇ ਆਪਣੀ ਨਾਰਾਜ਼ਗੀ ਪ੍ਰਗਟ ਕੀਤੀ | ਇਸ ਮਾਮਲੇ 'ਚ ਨਗਰ ਪਾਲਿਕਾ ਦੇ ਜੇ. ਈ. ਹਿਤੇਸ਼ ਯਾਦਵ ਨੂੰ ਤਲਬ ਕਰਕੇ ਨਿਰਮਾਣ ਕੰਮ ਰੋਕਿਆ ਗਿਆ ਅਤੇ ਵਰਤੀ ਗਈ ਸਮੱਗਰੀ ਦੀ ਜਾਂਚ ਦੀ ਮੰਗ ਕੀਤੀ | ਅੱਜ ਨਗਰ ਪਾਲਿਕਾ ਦੇ ਕਾਰਜਕਾਰੀ ਨਿਰਦੇਸ਼ਕ ਸੁਮਿਤ ਚੋਪੜਾ ਦੀ ਮੌਜੂਦਗੀ 'ਚ ਉਸਾਰੀ ਵਿਚ ਵਰਤੀ ਗਈ ਸਮੱਗਰੀ ਦੇ ਨਮੂਨੇ ਲਏ ਗਏ | ਇਸ ਮੌਕੇ ਭਾਜਪਾ ਮੰਡਲ ਪ੍ਰਧਾਨ ਲਵਲੀ ਗਰਗ, ਭਾਜਪਾ ਮੰਡਲ ਮੰਤਰੀ ਮਹੇਸ਼ ਆਜ਼ਾਦ, ਨਗਰ ਕੌਂਸਲਰ ਹਰਵਿੰਦਰ ਸਿੰਘ, ਦਾਰਾ ਸਿੰਘ, ਸੰਤੋਖ ਸਿੰਘ ਸੋਹਲ ਤੇ ਹੋਰ ਮੌਜੂਦ ਸਨ |
