ਨਵੀਂ ਦਿੱਲੀ, 20 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਪੁਲਿਸ ਥਾਣਾ ਕਿਸ਼ਨਗੜ੍ਹ (ਜ਼ਿਲ੍ਹਾ ਦੱਖਣੀ ਪੱਛਮੀ ਦਿੱਲੀ) ਦੇ ਸਟਾਫ਼ ਨੇ ਕਾਰਵਾਈ ਕਰਦੇ ਹੋਏ ਨਸ਼ੀਲੇ ਪਦਾਰਥਾਂ ਦੀ ਸਪਲਾਈ ਕਰਨ ਵਾਲੇ 3 ਦੋਸ਼ੀਆਂ ਨੂੰ ਕਾਬੂ ਕੀਤਾ ਹੈ ਅਤੇ ਇਨ੍ਹਾਂ ਕੋਲੋਂ 3.142 ਕਿੱਲੋਗ੍ਰਾਮ ਗਾਂਜਾ ਬਰਾਮਦ ਕੀਤਾ ਹੈ | ਫੜੇ ਗਏ ਦੋਸ਼ੀਆਂ ਵਿਚ ਕੇ. ਕੈਨਾਕਾ ਰੋਚਿਲ (20) ਨਿਵਾਸੀ ਮੁਨਿਰਕਾ ਦਿੱਲੀ ਜੋ ਕਿ ਅਸਲ ਵਿਚ ਨਾਗਾਲੈਂਡ ਦਾ ਸਥਾਈ ਨਿਵਾਸੀ ਹੈ | ਇਹ ਬੇਰੁਜ਼ਗਾਰੀ ਕਾਰਨ ਇਥੇ ਆਇਆ ਸੀ ਅਤੇ ਹੋਟਲਾਂ ਵਿਚ ਫੂਡ ਡਲਿਵਰੀ ਦਾ ਕੰਮ ਕਰਦਾ ਸੀ ਪ੍ਰੰਤੂ ਬਾਅਦ ਵਿਚ ਇਹ ਨਸ਼ੀਲੇ ਪਦਾਰਥਾਂ ਦਾ ਧੰਦਾ ਕਰਨ ਲੱਗ ਪਿਆ | ਦੂਸਰੇ ਫੜੇ ਗਏ ਅਪਰਾਧੀ ਦਾ ਨਾਂਅ ਪੁਲੈਟੋ ਨਿਵਾਸੀ ਕਿਸ਼ਨਗੜ੍ਹ (24) ਜੋ ਕਿ ਨਾਗਾਲੈਂਡ ਦਾ ਸਥਾਈ ਨਿਵਾਸੀ ਹੈ | ਇਹ ਪਹਿਲਾਂ ਕੈਫ਼ੇ ਵਿਚ ਨੌਕਰੀ ਕਰਦਾ ਸੀ ਅਤੇ ਬਾਅਦ ਵਿਚ ਆਪਣੇ ਸਾਥੀਆਂ ਦੇ ਪ੍ਰਭਾਵ ਕਾਰਨ ਇਸ ਧੰਦੇ ਵਿਚ ਸ਼ਾਮਿਲ ਹੋ ਗਿਆ | ਤੀਸਰੇ ਅਪਰਾਧੀ ਦਾ ਨਾਂਅ ਉਰਜੀਤ ਲਾਮਾ (29) ਨਿਵਾਸੀ ਕਿਸ਼ਨਗੜ੍ਹ ਅਤੇ ਸਥਾਈ ਨਿਵਾਸੀ ਨਾਗਾਲੈਂਡ ਜੋ ਕਿ ਪਹਿਲਾਂ ਕਿਸੇ ਹੋਟਲ ਵਿਚ ਕੰਮ ਕਰਦਾ ਸੀ | ਬਾਅਦ ਵਿਚ ਪੈਸੇ ਦੇ ਲਾਲਚ ਵਿਚ ਆ ਕੇ ਇਸ ਧੰਦੇ ਵਿਚ ਪੈ ਗਿਆ | ਪੁਲਿਸ ਨੇ ਇਨ੍ਹਾਂ ਨੂੰ ਗਸ਼ਤ ਦੌਰਾਨ ਪਹਿਲਾਂ ਸ਼ੱਕੀ ਹਾਲਤ ਵਿਚ ਫੜਿਆ ਪ੍ਰੰਤੂ ਤਲਾਸ਼ੀ ਲੈਣ 'ਤੇ ਇਨ੍ਹਾਂ ਕੋਲੋਂ ਗਾਂਜਾ ਫੜਿਆ | ਪੁਲਿਸ ਇਨ੍ਹਾਂ ਤੋਂ ਹੋਰ ਪੁੱਛ ਪੜਤਾਲ ਕਰ ਰਹੀ ਹੈ |
