ਨਵੀਂ ਦਿੱਲੀ, 25 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਉੱਤਰੀ ਦਿੱਲੀ ਜ਼ਿਲ੍ਹੇ ਦੇ ਥਾਣੇ ਵਜ਼ੀਰਾਬਾਦ ਦੀ ਪੁਲਿਸ ਨੇ ਹਥਿਆਰਾਂ ਦੇ ਕੱਚੇ ਮਾਲ ਦਾ ਭੰਡਾਰ ਤੇ ਗੈਰ-ਕਾਨੂੰਨੀ ਹਥਿਆਰ ਬਣਾਉਣ ਵਾਲੀ ਫੈਕਟਰੀ ਫੜੀ ਹੈ ਅਤੇ ਇਸ ਵਿਚ ਸ਼ਾਮਿਲ ਤਿੰਨ ਮੁਲਾਜ਼ਮਾਂ ਨੂੰ ਕਾਬੂ ਕੀਤਾ ਹੈ | ਇਹ ਫੈਕਟਰੀ ਮੁਰਾਦਾਬਾਦ ਵਿਚ ਚਲਾਈ ਜਾ ਰਹੀ ਸੀ | ਇਨ੍ਹਾਂ ਦੇ ਕੋਲੋਂ ਪੁਲਿਸ ਨੇ ਤਿੰਨ ਦੇਸੀ ਪਿਸਤੌਲ, 12 ਜ਼ਿੰਦਾ ਕਾਰਤੂਸ, ਦੇਸੀ ਕੱਟੇ ਬਣਾਉਣ ਵਾਲੇ 14 ਬੈਰਲ, 6 ਦੇਸੀ ਕੱਟੇ, ਲੋਹੇ ਦਾ ਮੋਲਡ, ਬਲੋਅਰ ਵਾਲੀ ਭੱਠੀ ਇਕ ਟੂਲਬਾਕਸ, ਹਥੌੜੇ ਤੇ ਹੋਰ ਸਾਮਾਨ ਫੜਿਆ ਹੈ | ਫੜੇ ਗਏ ਮੁਲਜ਼ਮਾਂ ਵਿਚ ਮੁਹੰਮਦ ਇਊਬ (49) ਵਾਸੀ ਮੁਰਾਦਾਬਾਦ, ਇਦਰੀਸ (60) ਨਿਵਾਸੀ ਰਹਿਮਤ ਨਗਰ ਅਤੇ ਸਾਬਾਦ (40) ਨਿਵਾਸੀ ਮੁਰਾਦਾਬਾਦ ਸ਼ਾਮਿਲ ਸਨ | ਇਨ੍ਹਾਂ ਪ੍ਰਤੀ ਪੁਲਿਸ ਨੂੰ ਉਦੋਂ ਜਾਣਕਾਰੀ ਮਿਲੀ ਜਦੋਂ ਪੁਲਿਸ ਗਸ਼ਤ ਕਰ ਰਹੀ ਸੀ ਅਤੇ ਇਨ੍ਹਾਂ ਨੂੰ ਜਮੁਨਾ ਖਾਦਰ ਪੁਸਤਾ ਰੋਡ ਹਨੂੰਮਾਨ ਚੌਕ ਵਜ਼ੀਰਾਬਾਦ ਦੇ ਕੋਲ ਪੁੱਜਦੇ ਹੀ ਇਕ ਗੁਪਤ ਸੂਚਨਾ ਮਿਲੀ ਕਿ ਇਕ ਵਿਅਕਤੀ ਗੈਰ-ਕਾਨੂੰਨੀ ਹਥਿਆਰ ਲੈ ਕੇ ਘੁੰਮ ਰਿਹਾ ਹੈ | ਪੁਲਿਸ ਨੇ ਮੌਕੇ 'ਤੇ ਜਾ ਕੇ ਮੁਹੰਮਦ ਮਯੂਰ ਨੂੰ ਫੜ ਲਿਆ | ਜਦੋਂ ਉਸ ਦੀ ਪੁਲਿਸ ਨੇ ਤਲਾਸ਼ੀ ਲਈ ਤਾਂ ਉਸ ਕੋਲੋਂ ਦੋ ਦੇਸੀ ਪਿਸਤੌਲ ਅਤੇ 10 ਜ਼ਿੰਦਾ ਕਾਰਤੂਸ ਬਰਾਮਦ ਕੀਤੇ | ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਜਦੋਂ ਮੁਲਜ਼ਮ ਤੋਂ ਪੁੱਛ ਪੜਤਾਲ ਕੀਤੀ ਤਾਂ ਉਸ ਨੇ ਸਾਰੀ ਜਾਣਕਾਰੀ ਪੁਲਿਸ ਨੂੰ ਦੇ ਦਿੱਤੀ | ਪੁਲਿਸ ਇਨ੍ਹਾਂ ਤੋਂ ਹੋਰ ਜਾਣਕਾਰੀ ਲੈ ਰਹੀ ਹੈ |
