ਨਵੀਂ ਦਿੱਲੀ, 4 ਜੁਲਾਈ (ਡਾ. ਬਲਵਿੰਦਰ ਸਿੰਘ ਸੋਢੀ)- ਦਿੱਲੀ ਦੇ ਪੂਰਬੀ ਜ਼ਿਲ੍ਹੇ ਦੇ ਨਾਰਕੋਟਿਕਸ ਵਿਰੋਧੀ ਸਕੁਐਡ ਨਸ਼ੀਲੇ ਪਦਾਰਥਾਂ ਦੇ ਤਸਕਰਾਂ, ਸਪਲਾਇਰਾਂ ਨੂੰ ਫੜ੍ਹਨ ਲਈ ਇਕ ਮੁਹਿੰਮ ਚਲਾਈ। ਇਸ ਟੀਮ ਵਿਚ ਐਸ.ਆਈ. ਵਿਕਾਸ, ਐਸ.ਆਈ. ਦਵਿੰਦਰ, ਏ.ਐਸ.ਆਈ. ਅਰੁਣ ਤੇ ਹੋਰ ਮੈਂਬਰ ਸ਼ਾਮਿਲ ਕੀਤੇ ਗਏ। ਇਸ ਟੀਮ ਨੇ ਸਥਾਨਕ ਮੁਖ਼ਬਰਾਂ ਨੂੰ ਸੁਚੇਤ ਕਰ ਕੇ ਖ਼ੁਫੀਆ ਜਾਣਕਾਰੀ ਇਕੱਠੀ ਕਰਨ ਨੂੰ ਕਿਹਾ। ਇਨ੍ਹਾਂ ਦੇ ਯਤਨਾਂ ਨਾਲ ਪੁਲਿਸ ਨੂੰ ਇਕ ਗੁਪਤ ਸੂਚਨਾ ਦਿੱਤੀ ਗਈ ਕਿ ਇਕ ਜੌਨ ਨਾਂਅ ਦਾ ਅਫ਼ਰੀਕੀ ਮਨੋਵਿਗਿਆਨਕ ਪਦਾਰਥ (ਐਮ.ਡੀ.ਐਮ.ਏ.) ਸਪਲਾਈ ਕਰਨ ਲਈ ਨੋਇਡਾ ਲਿੰਕ ਰੋਡ ’ਤੇ ਆਵੇਗਾ। ਪੁਲਿਸ ਨੇ ਆਪਣਾ ਜਾਲ ਵਿਛਾਇਆ। ਜੌਨ ਨੇ ਜਦੋਂ ਪੁਲਿਸ ਨੂੰ ਵੇਖਿਆ ਤਾਂ ਇਸ ਨੇ ਆਪਣੀ ਸਕੂਟਰੀ ਮੋੜਨੀ ਚਾਹੀ, ਪ੍ਰੰਤੂ ਉਹ ਡਿਵਾਈਡਰ ਨਾਲ ਟਕਰਾਅ ਗਈ। ਜੌਨ ਨੇ ਭੱਜਣ ਦੀ ਕੋਸ਼ਿਸ਼ ਕੀਤੀ, ਪ੍ਰੰੰਤੂ ਪੁਲਿਸ ਨੇ ਇਸ ਨੂੰ ਕਾਬੂ ਕਰ ਲਿਆ। ਜੌਨ ਤੋਂ ਪੁੱਛਗਿੱਛ ਤੋਂ ਬਾਅਦ ਦਿਵਾਕਰ ਨਾਂਅ ਦੇ ਵਿਅਕਤੀ ਨੂੰ ਫੜਿਆ। ਇਸ ਦੇ ਨਾਲ ਹੀ ਇਨ੍ਹਾਂ ਤੋਂ ਮਿਲੀ ਜਾਣਕਾਰੀ ਦੇ ਆਧਾਰ ’ਤੇ ਪੁਲਿਸ ਨੇ ਸੁਲੇਮਾਨ ਨੂੰ ਹੋਰ ਥਾਂ ਤੋਂ ਕਾਬੂ ਕੀਤਾ। ਇਨ੍ਹਾਂ ਤਿੰਨਾਂ ਕੋਲੋਂ 21.09 ਗ੍ਰਾਮ ਐਨ.ਡੀ.ਐਮ.ਏ. ਅਤੇ 30 ਗ੍ਰਾਮ ਗਾਂਜਾ ਫੜਿਆ ਹੈ। ਇਹ ਤਿੰਨੇ ਵਿਅਕਤੀ ਆਪਸੀ ਤਾਲਮੇਲ ਨਾਲ ਨਸ਼ੀਲੇ ਪਦਾਰਥਾਂ ਦੀ ਸਪਲਾਈ ਕਰਦੇ ਸਨ। ਪੁਲਿਸ ਮਾਮਲਾ ਦਰਜ ਕਰਕੇ ਇਨ੍ਹਾਂ ਦੀ ਪੂਰੀ ਚੇਨ ਦਾ ਪਤਾ ਲਗਾ ਰਹੀ ਹੈ।
