ਜਲੰਧਰ, 5 ਅਪ੍ਰੈਲ (ਸ਼ਿਵ)-ਸ਼ਹਿਰ ਦੇ ਕਈ ਇਲਾਕਿਆਂ 'ਚ ਕੂੜੇ ਦੇ ਡੰਪਾਂ ਦੀ ਸਮੱਸਿਆ ਖ਼ਤਮ ਹੋਣ ਦਾ ਨਾਂਅ ਨਹੀਂ ਲੈ ਰਹੀ ਹੈ | ਨਿਗਮ ਕਮਿਸ਼ਨਰ ਸੰਦੀਪ ਰਿਸ਼ੀ ਵਲੋਂ ਕੁੱਝ ਦਿਨ ਪਹਿਲਾਂ ਡੰਪਾਂ ਤੋਂ ਸਮੇਂ ਸਿਰ ਕੂੜਾ ਚੁੱਕਣ ਦੀ ਹਦਾਇਤ ਦਿੱਤੀ ਗਈ ਸੀ | ਅੱਜ ਕਈ ਡੰਪਾਂ 'ਤੇ ਕੂੜਾ ਪਿਆ ਨਜ਼ਰ ਆ ਰਿਹਾ ਸੀ | ਮੱਛੀ ਮਾਰਕੀਟ ਜਿਸ ਦੇ ਆਲੇ ਦੁਆਲੇ ਸਾਰਾ ਕਾਰੋਬਾਰੀ ਇਲਾਕਾ ਹੈ | ਉਸ ਦਾ ਕੂੜਾ ਨਾ ਚੁੱਕੇ ਜਾਣ ਕਰਕੇ ਕੂੜਾ ਸੜਕ ਤੱਕ ਆਇਆ ਪਿਆ ਸੀ | ਮੱਛੀ ਮਾਰਕੀਟ 'ਚ ਕਾਫ਼ੀ ਸਮਾਂ ਪਹਿਲਾਂ ਕੂੜਾ ਨਹੀਂ ਸੁੱਟਿਆ ਜਾਂਦਾ ਸੀ ਪਰ ਆਲੇ ਦੁਆਲੇ ਦੇ ਕਈ ਡੰਪ ਬੰਦ ਕਰਕੇ ਮੱਛੀ ਮਾਰਕੀਟ 'ਚ ਵੱਡਾ ਡੰਪ ਹੀ ਬਣਾ ਦਿੱਤਾ ਗਿਆ ਹੈ ਜਦਕਿ ਕਈ ਲੋਕਾਂ ਵਲੋਂ ਬਾਰ-ਬਾਰ ਮੰਗ ਕੀਤੀ ਜਾ ਰਹੀ ਹੈ ਕਿ ਕੂੜੇ ਦੇ ਡੰਪ ਸ਼ਹਿਰ ਦੇ ਬਾਹਰੀ ਇਲਾਕਿਆਂ 'ਚ ਹੋਣੇ ਚਾਹੀਦੇ ਹਨ |
