ਜਲੰਧਰ, 7 ਜੁਲਾਈ (ਸ਼ਿਵ)- ਫੋਲੜੀਵਾਲ ਦੇ ਕੋਲ ਏ. ਜੀ. ਆਈ. ਫਲੈਟਾਂ ਦੇ ਕੋਲ ਲੋਕ ਨਿਰਮਾਣ ਵਿਭਾਗ ਵਲੋਂ ਜਿਹੜੀ ਕੰਕਰੀਟ ਦੀ ਬੀਤੇ ਦਿਨੀਂ ਕੰਕਰੀਟ ਦੀ ਅਧੂਰੀ ਸੜਕ ਬਣਾਉਣ ਦਾ ਕੰਮ ਕੀਤਾ ਗਿਆ ਸੀ ਤੇ ਉਸ ਦੀ ਚੰਗੀ ਤਰਾਂ ਨਾਲ ਸੰਭਾਲ ਨਾ ਹੋਣ ਕਰਕੇ ਉਹ ਕਈ ਥਾਵਾਂ ਤੋਂ ਅੱਜ ਧਸ ਗਈ ਹੈ। ਸਮਾਜ ਸੇਵੀ ਸੁਦੇਸ਼ ਵਿਜ ਨੇ ਪੰਜਾਬ ਸਰਕਾਰ ਤੋਂ ਇਸ ਮਾਮਲੇ ਵਿਚ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ। ਸੁਦੇਸ਼ ਵਿਜ ਨੇ ਜਾਣਕਾਰੀ ਦਿੰਦੇ ਹੋਏ ਕਿਹਾ ਕਿ ਇਸ ਕੰਕਰੀਟ ਦੀ ਸੜਕ ਦਾ ਕੁੱਝ ਹਿੱਸਾ ਬਣਨ ਤੋਂ ਰਹਿ ਗਿਆ ਸੀ ਤਾਂ ਬੀਤੇ ਦਿਨੀਂ ਠੇਕੇਦਾਰ ਵਲੋਂ ਇਸ ਸੜਕ ਦਾ ਰਹਿੰਦਾ ਹਿੱਸਾ ਬਣਾਇਆ ਗਿਆ ਸੀ। ਜਦੋਂ ਕੰਕਰੀਟ ਦੀ ਸੜਕ ਦਾ ਬੈੱਡ ਬਣਾਇਆ ਜਾਂਦਾ ਹੈ ਤਾਂ ਉੱਥੇ ਪੰਜ ਦਿਨ ਤੱਕ ਕਿਸੇ ਤਰਾਂ ਦੀ ਟ੍ਰੈਫਿਕ ਨਹੀਂ ਚਲਾਇਆ ਜਾ ਸਕਦਾ ਹੈ। ਪਰ ਅੱਜ ਬਾਅਦ ਵਿਚ ਉਸ ਦੇ ਉੱਪਰ ਕੰਕਰੀਟ ਪਾ ਦਿੱਤਾ ਗਿਆ ਸੀ ਜਦਕਿ ਬੈਰੀਕੇਟਿੰਗ ਵੀ ਨਹੀਂ ਕੀਤੀ ਗਈ। ਅੱਜ ਇਸ ਸੜਕ ’ਤੇ ਟਰੈਫ਼ਿਕ ਚੱਲਣਾ ਸ਼ੁਰੂ ਹੋ ਗਿਆ ਸੀ ਜਿਸ ਕਰਕੇ ਇਹ ਸੜਕ ਜਗਾ ਤੋਂ ਧਸ ਗਈ ਹੈ। ਸੁਦੇਸ਼ ਵਿਜ ਦਾ ਕਹਿਣਾ ਸੀ ਕਿ ਲੋਕਾਂ ਦੇ ਕਰਾਂ ਤੋਂ ਇਕੱਠੇ ਕੀਤੇ ਜਾਂਦੇ ਫ਼ੰਡਾਂ ਨਾਲ ਇਹ ਵਿਕਾਸ ਦੇ ਕੰਮ ਕਰਵਾਏ ਜਾਂਦੇ ਹਨ ਤਾਂ ਵਿਭਾਗਾਂ ਨੂੰ ਇਸ ਤਰਾਂ ਨਾਲ ਇਨ੍ਹਾਂ ਸੜਕਾਂ ਨੂੰ ਚੰਗੀ ਤਰਾਂ ਨਾਲ ਬਣਵਾਉਣਾ ਚਾਹੀਦਾ ਹੈ। ਸੁਦੇਸ਼ ਵਿਜ ਦਾ ਕਹਿਣਾ ਸੀ ਕਿ ਉਹ ਇਸ ਦੀ ਸ਼ਿਕਾਇਤ ਪੰਜਾਬ ਸਰਕਾਰ ਤੋਂ ਇਲਾਵਾ ਵਿਜੀਲੈਂਸ ਬਿਊਰੋ ਨੂੰ ਵੀ ਦੇਣਗੇ ਤਾਂ ਜੋ ਇਸ ਮਾਮਲੇ ਵਿਚ ਕਾਰਵਾਈ ਹੋ ਸਕੇ।
