ਮੁੱਲਾਂਪੁਰ-ਦਾਖਾ, 5 ਸਤੰਬਰ (ਨਿਰਮਲ ਸਿੰਘ ਧਾਲੀਵਾਲ)-ਹੜ੍ਹ ਪ੍ਰਭਾਵਿਤ ਖੇਤਰਾਂ ਵਿਚ ਹੋਏ ਨੁਕਸਾਨ ਬਾਅਦ ਸਮਾਜ ਸੇਵੀ ਜਥੇਬੰਦੀਆਂ ਨਾਲ ਇਸ ਵੱਡੇ ਸੰਕਟ ਵਿਚ ਸਹਾਇਤਾ ਲਈ ਪੰਜਾਬ ਕਾਂਗਰਸ ਵੀ ਖੁੱਲ੍ਹਦਿਲੀ ਨਾਲ ਹੜ੍ਹ ਪੀੜ੍ਹਤਾਂ ਦੀ ਸਹਾਇਤਾ ਵਿਚ ਲੱਗੀ ਹੋਈ ਹੈ | ਸੂਬਾ ਕਾਂਗਰਸ ਪ੍ਰਧਾਨ/ਸਾਂਸਦ ਅਮਰਿੰਦਰ ਸਿੰਘ ਰਾਜਾ ਵੜਿੰਗ, ਜਨ: ਸਕੱਤਰ (ਇੰਚਾਰਜ) ਕੈਪਟਨ ਸੰਦੀਪ ਸਿੰਘ ਸੰਧੂ ਦੇ ਆਦੇਸ਼ਾਂ ਹੇਠ ਲੋਕ ਸਭਾ ਹਲਕਾ ਲੁਧਿਆਣਾ ਅੰਦਰ 9 ਵਿਧਾਨ ਸਭਾ ਹਲਕਿਆਂ ਲਈ ਗਠਿਤ 6 ਮੈਂਬਰੀ ਕਮੇਟੀ ਵਿਚ ਲੁਧਿਆਣਾ ਦਿਹਾਤੀ ਜ਼ਿਲ੍ਹਾ ਕਾਂਗਰਸ ਪ੍ਰਧਾਨ ਮੇਜਰ ਸਿੰਘ ਮੁੱਲਾਂਪੁਰ ਵਲੋਂ ਹੜ੍ਹ ਪੀੜ੍ਹਤਾਂ ਲਈ ਇਕੱਤਰ ਕੀਤੀ ਜਾਣ ਵਾਲੀ ਸਹਾਇਤਾ ਸਮੇਂ ਮੁੱਲਾਂਪੁਰ ਨੂੰ ਇਕ ਲੱਖ ਰੁਪਏ ਦਰਸ਼ਨ ਸਿੰਘ ਬੀਰਮੀ ਅਤੇ ਇਕ ਲੱਖ ਰੁਪਏ ਮਨਜੀਤ ਸਿੰਘ ਹੰਬੜਾਂ (ਤਿੰਨ ਵਿਧਾਨ ਸਭਾ ਹਲਕਿਆਂ ਲਈ ਕਾਂਗਰਸ ਦੇ ਅਬਜ਼ਰਬਰ) ਕੁੱਲ 2 ਲੱਖ ਰੁਪਏ ਸਹਾਇਤਾ ਭੇਜੀ ਗਈ | ਕਾਂਗਰਸ ਪਾਰਟੀ ਵਲੋਂ ਲੋਕ ਸਭਾ ਹਲਕਾਵਾਰ ਹੜ੍ਹ ਪੀੜ੍ਹਤਾਂ ਲਈ 6 ਮੈਂਬਰੀ ਕਮੇਟੀ ਦੇ ਮੈਂਬਰ ਮੇਜਰ ਸਿੰਘ ਮੁੱਲਾਂਪੁਰ ਨੇ ਦੱਸਿਆ ਕਿ ਹੜ੍ਹ ਪੀੜ੍ਹਤਾਂ ਲਈ ਪ੍ਰਾਪਤ ਕੁੱਲ ਸਹਾਇਤਾ ਸੂਬਾ ਕਾਂਗਰਸ ਪ੍ਰਧਾਨ/ਸਾਂਸਦ ਅਮਰਿੰਦਰ ਸਿੰਘ ਰਾਜਾ ਵੜਿੰਗ, ਜਨ: ਸਕੱਤਰ (ਇੰਚਾਰਜ) ਕੈਪਟਨ ਸੰਧੂ ਦੇ ਧਿਆਨ ਵਿਚ ਲਿਆ ਕੇ 9 ਹਲਕਿਆਂ ਵਿਚ ਵੰਡੀ ਜਾਵੇਗੀ | ਮੇਜਰ ਸਿੰਘ ਮੁੱਲਾਂਪੁਰ ਨੇ ਦੱਸਿਆ ਕਿ ਵਿਧਾਨ ਸਭਾ ਹਲਕੇ ਦਾਖਾ, ਗਿੱਲ, ਜਗਰਾਉਂ, ਸਾਹਨੇਵਾਲ ਦੇ ਬਹੁਤੇ ਪਿੰਡ ਸਤਲੁਜ ਦਰਿਆ ਕਿਨਾਰੇ ਵਸੇ ਹੋਣ ਕਰਕੇ ਉਥੇ ਕਾਫ਼ੀ ਨੁਕਸਾਨ ਪਾਇਆ ਗਿਆ | ਕਾਂਗਰਸ ਦਾ ਯਤਨ ਹੋਵੇਗਾ ਕਿ ਸਹਾਇਤਾ ਰਾਸ਼ੀ ਵੰਡੇ ਜਾਣ ਦੀ ਪ੍ਰਕਿਰਿਆ ਦਿਹਾਤੀ ਹਲਕਿਆਂ ਤੋਂ ਸ਼ੁਰੂ ਹੋਵੇ | ਜ਼ਿਕਰਯੋਗ ਹੈ ਕਿ ਕਾਂਗਰਸ ਵਲੋਂ ਹੜ੍ਹ ਪੀੜ੍ਹਤਾਂ ਲਈ ਇਕੱਤਰ ਕੀਤੀ ਜਾ ਰਹੀ ਸਹਾਇਤਾ ਰਕਮ ਕੋਈ ਜ਼ਬਰੀ ਨਹੀਂ, ਕਾਂਗਰਸ ਪਾਰਟੀ ਦਾ ਸੀਨੀਅਰ, ਜੂਨੀਅਰ ਵਰਕਰ ਜਾਂ ਵੋਟਰ ਆਪਣੀ ਮਰਜ਼ੀ ਨਾਲ ਹਿੱਸਾ ਪਾ ਸਕਦਾ ਹੈ |