ਹਾਦਸਾਗ੍ਰਸਤ ਹੋਈ ਕਾਰ ਨੂੰ ਅਚਾਨਕ ਪਈ ਅੱਗ-ਸੜ ਕੇ ਹੋਈ ਸੁਆਹ
ਨਵਾਂ ਪਿੰਡ ਟੱਪਰੀਆਂ ਵਿਖੇ ਹਾਦਸਾਗ੍ਰਸਤ ਹੋਈ ਕਾਰ ਦੀਆਂ ਤਸਵੀਰਾਂ | ਤਸਵੀਰਾਂ : ਨਰੇਸ਼ ਧੌਲ
<br/>
02-06-2025
ਜਾਣਕਾਰੀ ਅਨੁਸਾਰ ਆਈ ਟਵੰਟੀ ਕਾਰ ਨੰਬਰ ਪੀ.ਬੀ 10 ਈ.ਜੀ 2034 ਜਿਸ ਨੂੰ ਮੰਗਤ ਰਾਮ ਪੁੱਤਰ ਸੁਰਿੰਦਰ ਪਾਲ ਪਿੰਡ ਮਣਸੇਵਾਲ ਥਾਣਾ ਬਲਾਚੌਰ ਚਲਾ ਰਿਹਾ ਸੀ ਜੋ ਲੁਧਿਆਣਾ ਤੋਂ ਬਲਾਚੌਰ ਦੇ ਪਿੰਡ ਮੰਗੂਪੁਰ ਨੂੰ ਆਪਣੇ ਰਿਸ਼ਤੇਦਾਰ ਦੇ ਘਰ ਜਾ ਰਿਹਾ ਸੀ, ਕਿ ਨਵਾਂ ਪਿੰਡ ਟੱਪਰੀਆਂ ਵਿਖੇ ਰਾਤ ਦੇ ਲਗਭਗ 11 ਵਜੇ ਅਚਾਨਕ ਗੱਡੀ ਅੱਗੇ ਅਵਾਰਾ ਪਸ਼ੂ ਆ ਗਿਆ ਅਤੇ ਕਾਰ ਵੱਡੇ ਖੱਡੇ ਵਿੱਚ ਵੱਜ ਕੇ ਇੱਕ ਦਰਖ਼ਤ ਨਾਲ ਜਾ ਟਕਰਾਈ | ਇਸ ਜ਼ਬਰਦਸਤ ਟੱਕਰ ਉਪਰੰਤ ਚਾਲਕ ਮੰਗਤ ਰਾਮ ਦੀ ਇੱਕ ਲੱਤ ਟੁੱਟ ਗਈ, ਜਿਸ ਨੂੰ ਨਜ਼ਦੀਕੀ ਲੋਕਾਂ ਵੱਲੋਂ ਬਾਹਰ ਕੱਢਿਆ ਗਿਆ | ਉਪਰੰਤ ਪਹਿਲਾਂ ਨਿੱਜੀ ਹਸਪਤਾਲ ਬਲਾਚੌਰ ਅਤੇ ਫਿਰ ਰੋਪੜ ਵਿਖੇ ਦਾਖਲ ਕਰਵਾਇਆ ਗਿਆ | ਮੰਗਤ ਰਾਮ ਨੇ ਦੱਸਿਆ ਕਿ ਹਾਦਸਾ ਹੋਣ ਤੱਕ ਕਾਰ ਸਿਰਫ਼ ਦਰਖ਼ਤ ਵਿੱਚ ਵੱਜ ਕੇ ਸਿਰਫ਼ ਅੱਗੇ ਤੋਂ ਹੀ ਨੁਕਸਾਨੀ ਗਈ ਸੀ ਪ੍ਰੰਤੂ ਕੁੱਝ ਹੀ ਸਮੇਂ ਉਪਰੰਤ ਅਚਾਨਕ ਅੱਗ ਲੱਗਣ ਕਾਰਨ ਕਾਰ ਬੁਰੀ ਤਰਾਂ ਨੁਕਸਾਨੀ ਗਈ | ਮੰਗਤ ਰਾਮ ਨੇ ਦੱਸਿਆ ਕਿ ਕਾਰ ਦੇ ਕਾਗ਼ਜ਼ਾਤ ਬਿਲਕੁਲ ਪੂਰੇ ਹਨ ਅਤੇ ਇੰਸ਼ੋਰੈਂਸ ਵੀ ਫੁੱਲ ਕਰਵਾਈ ਹੋਈ ਹੈ | ਉਸ ਨੇ ਇੰਸ਼ੋਰੈਂਸ ਕੰਪਨੀ, ਸਰਕਾਰ ਅਤੇ ਪ੍ਰਸ਼ਾਸਨ ਤੋਂ ਪੁਰਜ਼ੋਰ ਮੰਗ ਕੀਤੀ ਹੈ ਕਿ ਉਸ ਦੇ ਹੋਏ ਨੁਕਸਾਨ ਦੀ ਭਰਪਾਈ ਕਰਵਾਈ ਜਾਵੇ | ਦੂਜੇ ਪਾਸੇ ਇਲਾਕਾ ਵਾਸੀਆਂ ਨੇ ਮੰਗ ਕੀਤੀ ਹੈ ਕਿ ਜਿੱਥੇ ਇਲਾਕੇ ਅੰਦਰ ਘੁੰਮ ਰਹੇ ਬਹੁ ਤਾਦਾਦ ਅਵਾਰਾ ਪਸ਼ੂਆਂ ਦਾ ਪੁਖ਼ਤਾ ਹੱਲ ਕੀਤਾ ਜਾਵੇ, ਉੱਥੇ ਇਲਾਕੇ ਦੀਆਂ ਸੜਕਾਂ ਅੰਦਰ ਪਏ ਵੱਡੇ-ਵੱਡੇ ਖੱਡਿਆਂ ਦੀ ਮੁਰੰਮਤ ਵੀ ਪਹਿਲ ਦੇ ਆਧਾਰ 'ਤੇ ਕਰਵਾਏ ਜਾਵੇ |
