ਬੰਗਾ, 18 ਅਕਤੂਬਰ (ਧਰਮਵੀਰ ਪਾਲ)-ਸਾਰੇ ਤਿਉਹਾਰਾਂ 'ਚੋਂ ਦੀਵਾਲੀ ਦਾ ਵਿਸ਼ੇਸ਼ ਮਹੱਤਵ ਹੈ | ਇਹ ਤਿਉਹਾਰ ਹਰ ਸਾਲ ਕੱਤਕ ਮਹੀਨੇ ਦੀ ਮੱਸਿਆ ਨੂੰ ਮਨਾਇਆ ਜਾਂਦਾ ਹੈ | ਇਸ ਦਿਨ ਵਿਸ਼ੇਸ਼ ਤੌਰ 'ਤੇ ਭਗਵਾਨ ਸ੍ਰੀ ਗਣੇਸ਼, ਮਾਤਾ ਮਹਾਲਕਸ਼ਮੀ, ਮਾਂ ਸਰਸਵਤੀ ਤੇ ਕੁਬੇਰ ਆਦਿ ਦੇਵੀ-ਦੇਵਤਿਆਂ ਦੀ ਪੂਜਾ ਕੀਤੀ ਜਾਂਦੀ ਹੈ ਅਤੇ ਮੰਤਰ ਜਾਪ ਕੀਤਾ ਜਾਂਦਾ ਹੈ | ਇਹ ਸਾਰੇ ਦੇਵੀ-ਦੇਵਤਾ ਸੁਖ-ਸਮਰਿੱਧੀ ਦੇ ਪ੍ਰਤੀਕ ਹਨ | ਇਹ ਪ੍ਰਗਟਾਵਾ ਪੰਡਿਤ ਪ੍ਰਦੀਪ ਸ਼ਰਮਾ ਬੰਗਾ ਨੇ ਕੀਤਾ | ਉਨ੍ਹਾਂ ਕਿਹਾ ਕਿ ਕਈ ਦਹਾਕਿਆਂ ਬਾਅਦ ਦੀਵਾਲੀ ਦੇ ਸ਼ੁੱਭ ਮੌਕੇ 'ਤੇ ਕਈ ਮੰਗਲਕਾਰੀ ਸੰਯੋਗ ਬਣ ਰਹੇ ਹਨ | ਇਸ ਸਾਲ 20 ਅਕਤੂਬਰ ਨੂੰ ਮੱਸਿਆ ਦੀ ਤਰੀਕ ਦੁਪਹਿਰ 3:45 ਵਜੇ ਤੋਂ ਸ਼ੁਰੂ ਹੋ ਕੇ ਅਗਲੇ ਦਿਨ 21 ਅਕਤੂਬਰ ਨੂੰ ਸ਼ਾਮ 5:54 ਵਜੇ ਤੱਕ ਰਹੇਗੀ | ਇਹ ਤਿਉਹਾਰ ਪੂਰਨ ਰਾਤਰੀ ਕਾਲ ਵਿਚ ਮਨਾਇਆ ਜਾਂਦਾ ਹੈ | ਸ਼ਾਸਤਰਾਂ ਦੇ ਅਨੁਸਾਰ ਭਗਵਾਨ ਸ੍ਰੀ ਰਾਮ ਚੌਦਾਂ ਸਾਲ ਦਾ ਬਣਵਾਸ ਕੱਟ ਕੇ ਅਯੁੱਧਿਆ ਵਾਪਸ ਆਏ ਸਨ | ਲੋਕਾਂ ਨੇ ਉਨ੍ਹਾਂ ਦੇ ਆਉਣ ਦੀ ਖ਼ੁਸ਼ੀ ਵਿਚ ਸ਼ਾਮ ਨੂੰ ਘਿਓ ਦੇ ਦੀਵੇ ਜਲਾ ਕੇ ਉਨ੍ਹਾਂ ਦਾ ਸਵਾਗਤ ਕੀਤਾ ਸੀ |
