ਮਜਾਰੀ-ਸਾਹਿਬਾ, 1 ਨਵੰਬਰ (ਨਿਰਮਲਜੀਤ ਸਿੰਘ ਚਾਹਲ)-ਪੰਜਾਬ ਸਰਕਾਰ ਦੀ ਮਾਰਕਫੈੱਡ ਖ਼ਰੀਦ ਏਜੰਸੀ ਵੱਲੋਂ ਸਾਹਿਬਾ ਮੰਡੀ ਵਿਚੋਂ ਖ਼ਰੀਦੇ ਹੋਏ ਝੋਨੇ ਦੀਆਂ ਬੋਰੀਆਂ ਦੀ ਲਿਫ਼ਟਿੰਗ ਨਾ ਹੋਣ ਕਾਰਨ ਆੜ੍ਹਤੀ ਤੇ ਮਜ਼ਦੂਰ ਪ੍ਰੇਸ਼ਾਨ ਹੋ ਰਹੇ ਹਨ | ਇਸ ਮੰਡੀ ਵਿਚੋਂ ਅਜੇ ਤੱਕ ਮਾਰਕਫੈੱਡ ਵੱਲੋਂ ਸਿਰਫ਼ 5300 ਬੋਰੀ ਹੀ 25 ਅਕਤੂਬਰ ਨੂੰ ਚੁੱਕੀ ਗਈ ਹੈ | ਉਸ ਤੋਂ ਬਾਅਦ ਅਜੇ ਤੱਕ ਕੋਈ ਬੋਰੀ ਨਹੀਂ ਚੁੱਕੀ ਗਈ | ਇਸ ਮੰਡੀ ਵਿਚੋਂ ਪਨਸਪ ਏਜੰਸੀ ਵੱਲੋਂ ਲਿਫ਼ਟਿੰਗ ਨਾਨ ਦੀ ਨਾਲ ਕੀਤੀ ਜਾ ਰਹੀ ਹੈ | ਇਸ ਮੌਕੇ ਬਿਹਾਰ ਤੋਂ ਆਏ ਮਜ਼ਦੂਰਾਂ ਨੇ ਦੱਸਿਆ ਕਿ ਇਸ ਵਾਰ ਝੋਨਾ ਬਹੁਤ ਘੱਟ ਆਉਣ ਕਾਰਨ ਖ਼ਰਚੇ ਵੀ ਪੂਰੇ ਨਹੀਂ ਹੋਣੇ | ਉਨ੍ਹਾਂ ਨੇ ਬਿਹਾਰ ਦੀਆਂ ਹੋ ਰਹੀਆਂ ਵਿਧਾਨ ਸਭਾ ਚੋਣਾਂ ਵਿਚ ਜਾ ਕੇ ਵੋਟਾਂ ਵੀ ਪਾਉਣੀਆਂ ਹਨ | ਜਦੋਂ ਤੱਕ ਲਿਫ਼ਟਿੰਗ ਨਹੀਂ ਹੋ ਜਾਂਦੀ ਉਦੋਂ ਤੱਕ ਆੜ੍ਹਤੀ ਨੇ ਸਾਡਾ ਹਿਸਾਬ ਨਹੀਂ ਕਰਨਾ, ਅਸੀਂ ਇਸ ਵੇਲੇ ਵਿਹਲੇ ਬੈਠੇ ਹਾਂ | ਉਨ੍ਹਾਂ ਪੰਜਾਬ ਸਰਕਾਰ ਤੇ ਮਾਰਕਫੈੱਡ ਏਜੰਸੀ ਵਿਰੁੱਧ ਨਾਅਰੇਬਾਜ਼ੀ ਵੀ ਕੀਤੀ | ਇਸ ਬਾਰੇ ਜ਼ਿਲ੍ਹਾ ਫੂਡ ਸਪਲਾਈ ਅਫ਼ਸਰ ਮਿਸ ਸੰਯੋਗਤਾ ਨੇ ਦੱਸਿਆ ਕਿ ਸਰਕਾਰ ਵੱਲੋਂ ਨਵੇਂ ਹੁਕਮਾਂ ਅਨੁਸਾਰ ਇਹ ਝੋਨਾ ਜ਼ਿਲੇ੍ਹ ਦੇ ਸ਼ੈਲਰਾਂ ਵਿਚ ਹੀ ਭੇਜਿਆ ਜਾਣਾ ਹੈ | ਸਰਕਾਰ ਵੱਲੋਂ ਲਿਖਤੀ ਹੁਕਮ ਆਉਣ 'ਤੇ ਜਲਦੀ ਲਿਫ਼ਟਿੰਗ ਕਰਵਾ ਦਿੱਤੀ ਜਾਵੇਗੀ |
