ਨਵਾਂਸ਼ਹਿਰ, 27 ਦਸੰਬਰ (ਦੀਦਾਰ ਸਿੰਘ ਸ਼ੇਤਰਾ, ਹਰਮਿੰਦਰ ਸਿੰਘ ਪਿੰਟੂ)-ਸਵੇਰੇ ਕਰੀਬ ਪੌਣੇ ਗਿਆਰਾਂ ਵਜੇ ਦਿਨ-ਦਿਹਾੜੇ ਇੱਕ ਦੁਕਾਨਦਾਰ 'ਤੇ ਦੋ ਹਮਲਾਵਰਾਂ ਵਲੋਂ ਗੋਲੀ ਚਲਾਏ ਜਾਣ ਦੀ ਸਨਸਨੀਖੇਜ਼ ਖ਼ਬਰ ਪ੍ਰਾਪਤ ਹੋਈ ਹੈ | ਮੰਦਰ ਬਾਬਾ ਬਾਲਕ ਨਾਥ ਦੇ ਨਾਲ ਸਥਿਤ ਰੈਡੀਮੇਡ ਕੱਪੜੇ ਦੀ ਦੁਕਾਨ ਵਰਮਾ ਕਲੈਕਸ਼ਨ ਦੇ ਮਾਲਕ ਨੇ ਦੱਸਿਆ ਕਿ ਅੱਜ ਦੀ ਧੁੰਦਲੀ ਸਵੇਰ ਵਿਚ ਉਸ ਦੀ ਦੁਕਾਨ 'ਤੇ ਬੁਲਿਟ ਮੋਟਰਸਾਈਕਲ 'ਤੇ ਸਵਾਰ ਦੋ ਅਣਪਛਾਤੇ ਨੌਜਵਾਨ ਆਏ, ਜਿਨ੍ਹਾਂ ਦੀ ਉਮਰ ਕਰੀਬ ਤੀਹ-ਪੈਂਤੀ ਸਾਲ ਦੀ ਜਾਪਦੀ ਸੀ, ਨੇ ਆਪਣੇ ਮੂੰਹ ਢਕੇ ਹੋਏ ਸਨ | ਦੁਕਾਨਦਾਰ ਵਲੋਂ ਤਾੜ ਲਿਆ ਗਿਆ ਕਿ ਦਾਲ 'ਚ ਕੁੱਝ ਕਾਲਾ ਹੈ, ਉਹ ਸੁਚੇਤ ਹੋ ਗਿਆ | ਨੌਜਵਾਨਾਂ ਵਲੋਂ ਗੋਲੀ ਚਲਾਈ ਗਈ, ਪਰ ਉਹ ਮਿਸ ਹੋ ਗਈ | ਉਦੋਂ ਤੱਕ ਦੁਕਾਨਦਾਰ ਨੇ ਆਪਣਾ ਲਾਇਸੰਸੀ ਹਥਿਆਰ ਕੱਢਿਆ, ਨੌਜਵਾਨ ਖਿਸਕਣ ਵਿਚ ਸਫਲ ਹੋ ਗਏ | ਦੁਕਾਨਦਾਰ ਵਲੋਂ ਪੁਲਿਸ ਨੂੰ ਸੂਚਨਾ ਦਿੱਤੇ ਜਾਣ 'ਤੇ ਡੀ.ਐਸ.ਪੀ ਰਾਜ ਕੁਮਾਰ ਅਤੇ ਐਸ.ਐਚ.ਓ ਸਿਟੀ ਨੇ ਤੁਰੰਤ ਮੌਕੇ 'ਤੇ ਪਹੁੰਚ ਕੇ ਘਟਨਾ ਦੀ ਜਾਣਕਾਰੀ ਪ੍ਰਾਪਤ ਕੀਤੀ | ਦੁਕਾਨਦਾਰ ਨੇ ਹਮਲਾਵਰਾਂ ਵਲੋਂ ਹਮਲਾ ਕਰਨ ਸਮੇਂ ਡਿੱਗੇ ਉਹਨਾਂ ਦੇ ਹਥਿਆਰ ਦੇ ਕਾਰਤੂਸ/ਗੋਲੀਆਂ ਪੁਲੀਸ ਨੂੰ ਦੇ ਦਿੱਤੀਆਂ ਗਈਆਂ | ਪੁਲਿਸ ਮਾਮਲੇ ਦੀ ਪੜਤਾਲ ਕਰ ਰਹੀ ਹੈ |
