ਰੂਪਨਗਰ

ਪਰਾਲੀ ਦੀਆਂ ਗੱਠਾਂ ਨੂੰ ਲੱਗੀ ਅੱਗ, ਲੱਖਾਂ ਰੁਪਏ ਦਾ ਨੁਕਸਾਨ

ਅ

ਅਜੀਤ ਡੈਸਕ 23-11-2025

ਮੋਰਿੰਡਾ, 22 ਨਵੰਬਰ (ਤਰਲੋਚਨ ਸਿੰਘ ਕੰਗ)-ਮੋਰਿੰਡਾ-ਚੁੰਨੀ ਰੋਡ 'ਤੇ ਪੈਂਦੇ ਪਿੰਡ ਭਟੇੜੀ ਵਿਖੇ ਖੱਟੜਾ ਟਰੇਡਿੰਗ ਕੰਪਨੀ ਵਲੋਂ ਲਗਪਗ 500 ਏਕੜ ਜੀਰੀ ਦੀ ਰਹਿੰਦ-ਖੂੰਹਦ ਦੀਆਂ ਗੱਠਾਂ ਬਣਾ ਕੇ ਰੱਖੀਆਂ ਹੋਈਆਂ ਸਨ, ਜਿਨ੍ਹਾਂ ਨੂੰ ਕਿਸੇ ਕਾਰਨ ਬੀਤੇ ਦਿਨ ਅੱਗ ਲੱਗ ਗਈ ਅਤੇ ਸਾਰੇ ਦੀਆਂ ਸਾਰੀਆਂ ਗੱਠਾਂ ਸੜ ਕੇ ਸੁਆਹ ਹੋ ਗਈਆਂ | ਇਸ ਸੰਬੰਧੀ ਅਵਤਾਰ ਸਿੰਘ ਪੁੱਤਰ ਪਾਲ ਸਿੰਘ ਵਾਸੀ ਫਤਿਹਪੁਰ ਥੇੜੀ ਨੇ ਦੱਸਿਆ ਕਿ ਉਨ੍ਹਾਂ ਵਲੋਂ ਪਿੰਡ ਭਟੇੜੀ ਵਿਖੇ ਜਗਤਾਰ ਸਿੰਘ ਵਾਸੀ ਪਿੰਡ ਭਟੇੜੀ ਤੋਂ ਸੜਕ ਲਾਗੇ 10 ਕਨਾਲ ਜਗ੍ਹਾ ਕਿਰਾਏ 'ਤੇ ਲੈ ਕੇ ਜਿਥੇ ਉਨ੍ਹਾਂ ਵਲੋਂ ਲਗਪਗ 500 ਏਕੜ ਦੀ ਪਰਾਲੀ ਦੀਆਂ ਗੱਠਾਂ ਬਣਾ ਕੇ ਸਟੈਗ ਕੀਤੀਆਂ ਹੋਈਆਂ ਸਨ, ਜਿਨ੍ਹਾਂ ਨੂੰ ਕਿ ਮਿਤੀ 19 ਨਵੰਬਰ 2025 ਦੀ ਰਾਤ ਨੂੰ ਅੱਗ ਲੱਗ ਗਈ | ਉਨ੍ਹਾਂ ਵਲੋਂ ਪੁਲਿਸ ਸਟੇਸ਼ਨ ਬਸੀ ਪਠਾਣਾਂ ਵਿਖੇ ਰਿਪੋਰਟ ਲਿਖਵਾਈ ਹੈ, ਜਿਸ ਦੀ ਅਜੇ ਤੱਕ ਪੁਲਿਸ ਵਲੋਂ ਕੋਈ ਐੱਫ. ਆਈ. ਆਰ. ਦਰਜ ਨਹੀਂ ਕੀਤੀ ਗਈ | ਅਵਤਾਰ ਸਿੰਘ ਦਾ ਕਹਿਣਾ ਹੈ ਕਿ ਦੋ ਫਾਇਰ ਬਿ੍ਗੇਡ ਦੀਆਂ ਗੱਡੀਆਂ ਮੋਰਿੰਡਾ ਤੋਂ ਆਈਆਂ ਸਨ ਤੇ ਇਕ ਗੱਡੀ ਸ੍ਰੀ ਫਤਹਿਗੜ੍ਹ ਸਾਹਿਬ ਤੋਂ ਪਹੁੰਚੀ ਸੀ | ਮੋਰਿੰਡਾ ਤੋਂ ਆਈਆਂ ਗੱਡੀਆਂ ਦੇ ਪਾਈਪ ਫਟਣ ਕਾਰਨ ਅੱਗ ਨਹੀਂ ਬੁਝਾ ਸਕੀਆਂ | ਜੋ ਫਾਇਰ ਬਿ੍ਗੇਡ ਦੀ ਗੱਡੀ ਸ੍ਰੀ ਫਤਹਿਗੜ੍ਹ ਸਾਹਿਬ ਤੋਂ ਭਟੇੜੀ ਅੱਗ ਬੁਝਾਉਣ ਆਈ ਸੀ, ਉਸ ਦਾ ਵੀ ਕੰਪ੍ਰੈਸ਼ਰ ਖਰਾਬ ਹੋਣ ਕਾਰਨ ਕੋਈ ਫਾਇਦਾ ਨਹੀਂ ਹੋਇਆ | ਉਨ੍ਹਾਂ ਕਿਹਾ ਕਿ ਪਹਿਲਾਂ ਇਹ ਗੱਡੀਆਂ ਫੋਨ ਕਰਨ ਤੋਂ ਸਵਾ ਘੰਟੇ ਬਾਅਦ ਪੁੱਜੀਆਂ, ਜਦੋਂ ਇਹ ਗੱਡੀਆਂ ਪੁੱਜੀਆਂ ਤੋਂ ਅੱਗ ਬੁਝਾਉਣ 'ਚ ਕਾਮਯਾਬ ਨਹੀਂ ਹੋ ਸਕੀਆਂ | ਦੇਖਦੇ ਹੀ ਦੇਖਦੇ ਪਰਾਲੀ ਦੀਆਂ ਲਗਪਗ 25 ਲੱਖ ਦੀਆਂ ਗੱਠਾਂ ਸੜ ਕੇ ਸੁਆਹ ਹੋ ਗਈਆਂ | ਅਵਤਾਰ ਸਿੰਘ ਨੇ ਮੰਗ ਕੀਤੀ ਹੈ ਕਿ ਉਨ੍ਹਾਂ ਨੂੰ ਇਨਸਾਫ ਦਵਾਇਆ ਜਾਵੇ |