ਨਾਭਾ, 2 ਨਵੰਬਰ (ਜਗਨਾਰ ਸਿੰਘ ਦੁਲੱਦੀ)-ਨਾਭਾ ਵਿਖੇ ਸੈਂਕੜਿਆਂ ਦੀ ਗਿਣਤੀ ਵਿਚ ਸਥਾਨਕ ਲੋਕਾਂ ਨੇ ਮੋਮਬੱਤੀ ਮਾਰਚ ਕਰਕੇ ਸਰਕੁਲਰ ਰੋਡ ਹਾਦਸਿਆਂ 'ਚ ਮਾਰੇ ਗਏ ਮਿ੍ਤਕਾਂ ਨੂੰ ਯਾਦ ਕੀਤਾ, ਨਾਲ ਹੀ ਉਨ੍ਹਾਂ ਨੇ ਪ੍ਰਸ਼ਾਸਨ ਦੀ ਅਣਗਹਿਲੀ 'ਤੇ ਅੱਜ ਤੱਕ ਇਸ ਮੁੱਦੇ ਉੱਪਰ ਆਪਣੀ ਚੁੱਪੀ ਲਈ ਮਿ੍ਤਕਾਂ ਕੋਲੋਂ ਮੁਆਫ਼ੀ ਮੰਗੀ | ਬਾਈਪਾਸ ਸੜਕ ਉੱਪਰ ਵੱਖ-ਵੱਖ ਹਾਦਸਿਆਂ 'ਚ ਮਾਰੇ ਗਏ 20 ਦੇ ਕਰੀਬ ਮਿ੍ਤਕਾਂ ਦੇ ਪਰਿਵਾਰਕ ਮੈਂਬਰ ਵੀ ਇਸ ਮੋਮਬੱਤੀ ਮਾਰਚ ਵਿਚ ਪਹੁੰਚੇ | ਕਈਆਂ ਨੇ ਲੋਕਾਂ ਨੂੰ ਸੰਬੋਧਨ ਵੀ ਕੀਤਾ ਤੇ ਦੱਸਿਆ ਕਿ ਉਹ ਕਿਸ ਤਰੀਕੇ ਉੱਜੜੇ ਘਰ ਵਿਚ ਜ਼ਿੰਦਗੀ ਗੁਜ਼ਾਰ ਰਹੇ ਹਨ | ਇਕ ਮਿ੍ਤਕ ਅਜੇ ਕੁਮਾਰ ਦੇ ਰਿਸ਼ਤੇਦਾਰਾਂ ਨੇ ਦੱਸਿਆ ਕਿ ਅਜੇ ਦਾ ਵਿਆਹ ਤੋਂ ਪੰਜ ਦਿਨ ਬਾਅਦ ਹੀ ਬਾਈਪਾਸ ਸੜਕ ਉੱਪਰ ਹਾਦਸਾ ਹੋ ਗਿਆ ਸੀ | ਉਸ ਦੇ ਮਾਪੇ ਅੱਜ ਤੱਕ ਗਹਿਰੇ ਸਦਮੇ 'ਚ ਚਲੇ ਗਏ ਤੇ ਡਿਪਰੈੱਸ਼ਨ ਦੇ ਸ਼ਿਕਾਰ ਹੋ ਗਏ ਹਨ | ਉਹ ਆਪਣੀ ਰੋਜ਼ਾਨਾ ਜ਼ਿੰਦਗੀ ਦੇ ਛੋਟੇ-ਛੋਟੇ ਕੰਮ ਤੋਂ ਵੀ ਅਸਮਰਥ ਹੋ ਗਏ ਹਨ | ਦੀਵਾਲੀ ਤੋਂ ਇਕ ਦਿਨ ਪਹਿਲਾਂ ਬਾਈਪਾਸ ਸੜਕ ਹਾਦਸੇ ਵਿਚ ਮਰੇ 9 ਸਾਲਾ ਨੇਹਾਨ ਦੇ ਮਾਪਿਆਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਬੱਚੇ ਨੂੰ ਇਕ ਕੱਪੜੇ ਦੀ ਕੰਪਨੀ ਨੇ ਫੋਟੋਸ਼ੂਟ ਲਈ ਚੁਣ ਲਿਆ ਸੀ ਤੇ ਉਸ ਖ਼ੂਬਸੂਰਤ ਬੱਚੇ ਨੂੰ ਕਿਸੇ ਟਰਾਲੇ ਨੇ ਕੁਚਲ ਦਿੱਤਾ ਸੀ, ਉਹ ਤਾਂ ਆਪਣੀ ਮਾਤਾ ਨਾਲ ਸੜਕ ਦੇ ਇਕ ਪਾਸੇ ਰੁਕੀ ਹੋਈ ਸਕੂਟੀ ਉੱਪਰ ਬੈਠਾ ਸੀ ਤੇ ਉਸ ਦੀ ਮਾਤਾ ਰਸਤਾ ਸਾਫ਼ ਹੋਣ ਦਾ ਇੰਤਜ਼ਾਰ ਕਰ ਰਹੀ ਸੀ ਤਾਂਕਿ ਉਹ ਸੜਕ ਪਾਰ ਕਰ ਸਕੇ | ਇਹ ਮੋਮਬੱਤੀ ਮਾਰਚ ਸਥਾਨਕ ਸ਼ਾਹੀ ਸਮਾਧਾਂ ਤੋਂ ਸ਼ੁਰੂ ਹੋ ਕੇ ਉਸ ਸਥਾਨ 'ਤੇ ਖ਼ਤਮ ਕੀਤਾ ਗਿਆ ਜਿੱਥੇ 9 ਸਾਲਾ ਬੱਚੇ ਦੀ ਮੌਤ ਹੋਈ ਸੀ | ਸੰਵਾਦ ਮੈਂਬਰ ਰੀਤ ਇਕਬਾਲ ਸਿੰਘ ਮਝੈਲ, ਰਾਜੇਸ਼ ਢੀਂਗਰਾ, ਸਨੀ ਰਹੇਜਾ, ਗੁਰਮੀਤ ਸਿੰਘ ਥੂਹੀ, ਗੁਰਮੀਤ ਸਿੰਘ ਗੈਰੀ, ਰਾਜਿੰਦਰ ਸਿੱਧੂ, ਮੋਹਨ ਸਿੰਘ, ਨਵਦੀਪ ਵਰਮਾ ਆਦਿ ਸਥਾਨਕ ਲੋਕਾਂ ਨੇ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਕਿ ਅੱਗੇ ਤੋਂ ਹੋਣ ਵਾਲੇ ਹਾਦਸੇ ਕਾਬੂ ਕਰਨ ਲਈ ਯੋਗ ਪ੍ਰਬੰਧ ਕੀਤੇ ਜਾਣ |
