ਪਟਿਆਲਾ ਜੇਲ੍ਹ 2025 'ਚ ਵੀ ਨਹੀਂ ਬਣੀ ਸੁਧਾਰ ਘਰ

ਅ

ਅਜੀਤ ਡੈਸਕ 31-12-2025

ਪਟਿਆਲਾ, 30 ਦਸੰਬਰ (ਮਨਦੀਪ ਸਿੰਘ ਖਰੌੜ)-ਸੂਬਾ ਸਰਕਾਰ ਅਤੇ ਜੇਲ੍ਹ ਵਿਭਾਗ ਵਲੋਂ ਅਕਸਰ ਪੰਜਾਬ ਦੀਆਂ ਜੇਲ੍ਹਾਂ ਨੂੰ ਸੁਧਾਰ ਘਰ ਬਣਾਉਣ ਦੇ ਦਾਅਵੇ ਕੀਤੇ ਜਾਂਦੇ ਹਨ ਤਾਂ ਜੋ ਸਜ਼ਾ ਕੱਟ ਰਹੇ ਕੈਦੀਆਂ ਤੇ ਹਵਾਲਾਤੀਆਂ ਨੂੰ ਜੁਰਮ ਦੀ ਦੁਨੀਆ 'ਚੋਂ ਬਾਹਰ ਕੱਢ ਕੇ ਮੁੜ ਤੋਂ ਸਮਾਜ 'ਚ ਚੰਗਾ ਜੀਵਨ ਬਸਰ ਕਰ ਸਕੇ, ਪਰ ਜੇਲ੍ਹਾਂ ਦੇ ਮੌਜੂਦਾ ਹਾਲਾਤ ਦੇਖਦੇ ਹੋਏ ਇਹ ਦਾਅਵੇ ਸਿਰਫ਼ ਕਹਿਣ ਤੱਕ ਸੀ ਸੀਮਤ ਜਾਪਦੇ ਹਨ | ਪਟਿਆਲਾ ਜੇਲ੍ਹ 'ਚੋਂ ਮੋਬਾਈਲ ਅਤੇ ਨਸ਼ੀਲੇ ਪਦਾਰਥ ਬਰਾਮਦ ਹੋਣ ਦੇ ਨਾਲ ਬੰਦੀਆਂ ਦੀ ਕੁੱਟਮਾਰ ਅਤੇ ਝਗੜੇ ਦੀਆਂ ਘਟਨਾਵਾਂ ਅਕਸਰ ਸਾਹਮਣੇ ਆਉਂਦੀਆਂ ਰਹਿੰਦੀਆਂ ਹਨ | ਜਿਸ ਤਹਿਤ 2025 ਦੇ ਅੰਕੜਿਆਂ ਅਨੁਸਾਰ ਪਟਿਆਲਾ ਜੇਲ੍ਹ ਨਾਲ ਸੰਬੰਧਿਤ 107 ਮੁਕੱਦਮੇ ਦਰਜ ਹੋਏ ਹਨ, ਜਿਨ੍ਹਾਂ ਵਿਚੋਂ 82 ਪਰਚੇ ਮੋਬਾਈਲ ਬਰਾਮਦ ਹੋਣ ਦੇ, 17 ਨਸ਼ੀਲੇ ਪਦਾਰਥਾਂ ਅਤੇ 8 ਪਰਚੇ ਜੇਲ੍ਹ ਅੰਦਰ ਹੋਏ ਲੜਾਈ ਝਗੜਿਆਂ ਦੇ ਥਾਣਾ ਤਿ੍ਪੜੀ 'ਚ ਦਰਜ ਕੀਤੇ ਗਏ ਹਨ | ਇਨ੍ਹਾਂ ਮਸਲਿਆਂ ਤੋਂ ਅਸੀਂ ਅੰਦਾਜ਼ਾ ਲਗਾ ਸਕਦੇ ਹਾਂ ਕਿ ਕੇਂਦਰੀ ਜੇਲ੍ਹ 'ਚ ਬੰਦੀਆਂ ਦੇ ਵਿਅਕਤੀਗਤ ਸੁਧਾਰ ਲਈ ਕਿੰਨੀ ਕੁ ਕਾਰਗਰ ਸਿੱਧ ਹੋ ਰਹੀ ਹੈ | ਅੰਕੜਿਆਂ ਅਨੁਸਾਰ ਕੇਂਦਰੀ ਜੇਲ੍ਹ ਪਟਿਆਲਾ 'ਚੋਂ 170 ਤੋਂ ਵੱਧ ਦੇ ਮੋਬਾਈਲ ਅਤੇ ਕਾਫ਼ੀ ਮਾਤਰਾ 'ਚ ਨਸ਼ੀਲੇ ਪਦਾਰਥ ਬਰਾਮਦ ਹੋਏ ਹਨ | ਇਸ ਤਰ੍ਹਾਂ ਲੰਘੇ ਵਰ੍ਹੇ ਪਟਿਆਲਾ ਜੇਲ੍ਹ 'ਚ ਬੰਦ 2 ਕੈਦੀਆਂ ਵਲੋਂ ਪੈਰੋਲ ਦੀ ਉਲੰਘਣਾ ਵੀ ਕੀਤੀ ਗਈ ਸੀ | ਹੈਰਾਨੀ ਦੀ ਗੱਲ ਹੈ ਕਿ ਜੇਲ੍ਹ ਅੰਦਰ ਸੁਰੱਖਿਆ ਦੇ ਸਖ਼ਤ ਪ੍ਰਬੰਧ ਹੋਣ ਦੇ ਬਾਵਜੂਦ ਵੀ ਅੰਦਰ ਮੋਬਾਈਲ ਅਤੇ ਨਸ਼ੀਲੇ ਪਦਾਰਥ ਕਿਵੇਂ ਪਹੁੰਚਦੇ ਹਨ | ਭਾਵੇਂ ਕਿ ਜੇਲ੍ਹ ਪ੍ਰਸ਼ਾਸਨ ਵਲੋਂ ਅਜਿਹੇ ਕੁੱਝ ਮਾਮਲਿਆਂ 'ਚ ਸ਼ਾਮਲ ਪੁਲਿਸ ਮੁਲਾਜ਼ਮਾਂ ਨੂੰ ਨੌਕਰੀ ਤੋਂ ਫ਼ਾਰਗ ਵੀ ਕਰ ਦਿੱਤਾ ਸੀ | ਪਰੰਤੂ ਹਾਲੇ ਇਹ ਰਹੱਸ ਹੀ ਬਣਿਆ ਹੋਇਆ ਹੈ ਕਿ ਜੇਲ੍ਹ 'ਚ ਬੰਦ ਬੰਦੀਆਂ ਕੋਲ ਮੋਬਾਈਲ ਅਤੇ ਨਸ਼ਾ ਕਿਵੇਂ ਪਹੁੰਚਦਾ ਹੈ | ਲੰਘੇ ਵਰੇ੍ਹ ਪਟਿਆਲਾ ਪੁਲਿਸ ਵਲੋਂ ਗਿ੍ਫ਼ਤਾਰ ਕੀਤੇ ਗਏ ਕਈ ਮੁਲਜ਼ਮਾਂ ਦੀਆਂ ਤਾਰਾਂ ਕੇਂਦਰੀ ਜੇਲ੍ਹ ਪਟਿਆਲਾ ਨਾਲ ਜੁੜੇ ਹੋਣ ਦੇ ਸਬੂਤ ਵੀ ਮਿਲੇ ਸੀ |
• ਬਾਹਰੋਂ ਸੁੱਟੇ ਜਾਂਦੇ ਨੇ ਜੇਲ੍ਹ 'ਚ ਪੈਕਟ- ਜੇਲ੍ਹ ਅੰਦਰ ਬਾਹਰੋਂ ਟੇਪ ਨਾਲ ਲਪੇਟ ਕੇ ਸੁੱਟੇ ਪੈਕਟ ਅਕਸਰ ਜੇਲ੍ਹ ਪ੍ਰਸ਼ਾਸਨ ਵਲੋਂ ਬਰਾਮਦ ਕੀਤੇ ਜਾਂਦੇ ਹਨ | ਇਨ੍ਹਾਂ ਪੈਕਟਾਂ 'ਚੋ ਜ਼ਿਆਦਾਤਰ ਜਰਦੇ ਦੀਆਂ ਪੁੜੀਆਂ, ਮੋਬਾਈਲ ਅਤੇ ਹੋਰ ਨਸ਼ੀਲਾ ਪਦਾਰਥ ਬਰਾਮਦ ਹੁੰਦੇ ਹਨ | ਸੁੱਟੇ ਹੋਏ ਪੈਕਟਾਂ ਦਾ ਸਮਾਨ ਬੈਰਕਾਂ ਵਿਚ ਬੰਦ ਬੰਦੀਆਂ ਕੋਲ ਕਿਵੇਂ ਪਹੁੰਚਦਾ ਹੈ ਇਹ ਭੇਦ ਵੀ ਹਾਲੇ ਬਰਕਰਾਰ ਹੈ | ਦੂਜੇ ਪਾਸੇ ਜੇਲ੍ਹ ਅੰਦਰੋਂ ਬਰਾਮਦ ਹੋਏ ਪੈਕਟਾਂ ਸੰਬੰਧੀ ਇਕਾ-ਦੁੱਕਾ ਕੇਸਾਂ ਨੂੰ ਛੱਡ ਕੇ ਪੁਲਿਸ ਵਲੋਂ ਹਾਲੇ ਤੱਕ ਇਸ ਸੰਬੰਧੀ ਕੋਈ ਠੋਸ ਕਾਰਵਾਈ ਸਾਹਮਣੇ ਨਹੀਂ ਆਈ ਹੈ | ਇਸ ਸੰਬੰਧੀ ਥਾਣਾ ਤਿ੍ਪੜੀ ਦੇ ਮੁਖੀ ਇੰਸ. ਸੁਖਵਿੰਦਰ ਸਿੰਘ ਗਿੱਲ ਨੇ ਦੱਸਿਆ ਕਿ ਜੇਲ੍ਹ ਪੈਕਟ ਸੁੱਟਣ ਸੰਬੰਧੀ ਜ਼ਿਆਦਾਤਰ ਕੇਸ ਟਰੇਸ ਕਰ ਲਏ ਗਏ ਹਨ | ਪੁਲਿਸ ਦੀ ਮੁਸਤੈਦੀ ਕਾਰਨ ਜੇਲ੍ਹ 'ਚ ਪੈਕਟ ਅਤੇ ਮੋਬਾਈਲ ਦੀ ਬਰਾਮਦਗੀ 'ਚ ਸਾਲ 2024 ਦੀ ਤੁਲਨਾ 'ਚ 50 ਫ਼ੀਸਦੀ ਕਮੀ ਆਈ ਹੈ |
• ਜੇਲ੍ਹ 'ਚ ਵਾਪਰੀਆਂ ਘਟਨਾਵਾਂ- ਸਤੰਬਰ 2025 'ਚ ਭਾਈ ਸੰਦੀਪ ਸਿੰਘ ਸਨੀ ਵਲੋਂ ਚਾਰ ਪੁਲਿਸ ਅਫ਼ਸਰਾਂ ਨਾਲ ਝਗੜਾ ਹੋ ਗਿਆ, ਬਾਅਦ 'ਚ ਇਲਾਜ ਦੌਰਾਨ ਝਗੜੇ 'ਚ ਜ਼ਖ਼ਮੀ ਇੰਸ. ਸੂਬਾ ਸਿੰਘ ਦੀ ਮੌਤ ਹੋ ਗਈ | ਜੇਲ੍ਹ 'ਚੋਂ ਭੇਜਿਆ ਕੈਦੀ ਅਮਰੀਕ ਸਿੰਘ ਰਾਜਿੰਦਰਾ ਹਸਪਤਾਲ ਵਿਚੋਂ ਫ਼ਰਾਰ ਹੋ ਗਿਆ ਸੀ | 2020 ਦੌਰਾਨ ਪਟਿਆਲਾ ਜੇਲ੍ਹ ਅੰਦਰੋਂ ਇਕ ਕੈਦੀ ਨੇ ਵੀਡੀਓ ਵਾਇਰਲ ਕੀਤੀ ਸੀ ਕਿ ਕਿਸ ਤਰ੍ਹਾਂ ਜੇਲ੍ਹ ਅੰਦਰ ਉਸ ਦੀ ਕੁੱਟਮਾਰ ਕਰਕੇ ਉਸ ਦੇ ਘਰਵਾਲਿਆਂ ਤੋਂ ਪੈਸੈ ਮੰਗੇ ਸੀ, ਅਗਸਤ 2020 ਨੂੰ ਜੇਲ੍ਹ ਅੰਦਰ ਬੰਦ ਬੰਦੀਆਂ ਇਕ ਸਹਾਇਕ ਸੁਪਰਡੈਂਟ ਅਤੇ ਜੇਲ੍ਹ ਵਾਰਡਰ ਸਮੇਤ ਪੁਲਿਸ ਮੁਲਜ਼ਮਾਂ 'ਤੇ ਹਮਲਾ ਕਰਕੇ ਜ਼ਖਮੀ ਕਰ ਦਿੱਤਾ ਸੀ | ਫਰਵਰੀ 2020 'ਚ ਇਕ ਵਿਅਕਤੀ ਨੇ ਜੇਲ੍ਹ ਸੁਪਰਡੈਂਟ ਦੇ ਗੰਨਮੈਨ ਨੂੰ 50 ਰੁਪਏ ਦੇਣ ਸੰਬੰਧੀ ਡੀ.ਜੀ.ਪੀ. ਜੇਲ੍ਹਾਂ ਨੂੰ ਪੱਤਰ ਵੀ ਲਿਖਿਆ ਸੀ | ਅਪੈ੍ਰਲ 2019 'ਚ ਫਿਰੌਤੀ ਲੈਣ ਦੇ ਦੋਸ਼ਾਂ ਤਹਿਤ ਜੇਲ੍ਹ ਮੰਤਰੀ ਵਲੋਂ ਪਟਿਆਲਾ ਜੇਲ੍ਹ ਦੇ ਸੁਪਰਡੈਂਟ ਸਮੇਤ ਚਾਰ ਅਫ਼ਸਰਾਂ ਨੂੰ ਸਸਪੈਂਡ ਕਰ ਦਿੱਤਾ ਗਿਆ ਸੀ |

ਪਟਿਆਲਾ ਜੇਲ੍ਹ 2025 'ਚ ਵੀ ਨਹੀਂ ਬਣੀ ਸੁਧਾਰ ਘਰ

ਸੰਬੰਧਿਤ ਖ਼ਬਰਾਂ