ਐੱਸ. ਏ. ਐੱਸ. ਨਗਰ, 24 ਸਤੰਬਰ (ਕਪਿਲ ਵਧਵਾ)-ਇੰਮੀਗ੍ਰੇਸ਼ਨ ਏਜੰਟ ਰਾਜਦੀਪ ਸਿੰਘ ਵਲੋਂ ਖ਼ੁੁਦਕੁਸ਼ੀ ਮਾਮਲੇ 'ਚ ਨਾਮਜ਼ਦ ਏ. ਆਈ. ਜੀ. ਗੁਰਜੋਤ ਸਿੰਘ ਕਲੇਰ ਨੂੰ ਉਸ ਸਮੇਂ ਵੱਡਾ ਝਟਕਾ ਲੱਗਿਆ, ਜਦੋਂ ਮੁਹਾਲੀ ਅਦਾਲਤ ਨੇ ਉਸ ਦੀ ਅਗਾਊਾ ਜ਼ਮਾਨਤ ਦੀ ਅਰਜ਼ੀ ਰੱਦ ਕਰ ਦਿੱਤੀ | ਅਦਾਲਤ 'ਚ ਬੁੱਧਵਾਰ ਨੂੰ ਜੱਜ ਹਰਦੀਪ ਸਿੰਘ ਦੀ ਅਦਾਲਤ ਵਿਚ ਸੁਣਵਾਈ ਹੋਈ | ਇਸ ਦੌਰਾਨ ਬਚਾਅ ਪੱਖ ਵਲੋਂ ਐਡਵੋਕੇਟ ਐੱਚ. ਐੱਸ. ਧਨੋਆ ਹਾਜ਼ਰ ਹੋਏ ਅਤੇ ਏ. ਆਈ. ਜੀ. ਦੇ ਸਾਫ ਸਰਵਿਸ ਰਿਕਾਰਡ ਦਾ ਹਵਾਲਾ ਦਿੰਦਿਆਂ ਉਸ ਨੂੰ ਜ਼ਮਾਨਤ ਦੇ ਯੋਗ ਦੱਸਿਆ | ਦੂਜੇ ਪਾਸੇ, ਮੁਕੱਦਮਾ ਪੱਖ ਨੇ ਇਸ ਦਾ ਸਖ਼ਤ ਵਿਰੋਧ ਕਰਦਿਆਂ ਕਿਹਾ ਕਿ ਘਟਨਾ ਵਾਲੇ ਦਿਨ ਏ. ਆਈ. ਜੀ. ਗੁਰਜੋਤ ਸਿੰਘ ਕਲੇਰ ਦੇ ਕਹਿਣ 'ਤੇ ਉਸ ਦਾ ਗੰਨਮੈਨ ਅਤੇ ਇਕ ਹੋਰ ਵਿਅਕਤੀ ਰਾਜਦੀਪ ਸਿੰਘ ਨੂੰ ਜ਼ਬਰਦਸਤੀ ਏ. ਆਈ. ਜੀ. ਦੀ ਰਿਹਾਇਸ਼ ਵਿਖੇ ਲੈ ਕੇ ਗਏ ਸਨ, ਜਿਥੇ ਉਸ ਨੂੰ ਜਲੀਲ ਕਰਨ ਤੋਂ ਬਾਅਦ ਇਕ ਨਿੱਜੀ ਬੈਂਕ ਤੋਂ ਕਰਜਾ ਕਰਵਾ ਕੇ ਏ. ਆਈ. ਜੀ. ਨੂੰ ਭੁਗਤਾਨ ਕਰਨ ਲਈ ਲਿਜਾਇਆ ਗਿਆ ਸੀ | ਦੋਵਾਂ ਪੱਖਾਂ ਦੀਆਂ ਦਲੀਲਾਂ ਸੁਣਨ ਤੋਂ ਬਾਅਦ ਅਦਾਲਤ ਨੇ ਜ਼ਮਾਨਤ ਅਰਜ਼ੀ ਮਨਜ਼ੂਰ ਕਰਨ ਤੋਂ ਇਨਕਾਰ ਕਰ ਦਿੱਤਾ | ਜ਼ਿਕਰਯੋਗ ਹੈ ਕਿ ਸਥਾਨਕ ਫੇਜ਼-11 ਦੇ ਰਹਿਣ ਵਾਲੇ ਇੰਮੀਗ੍ਰੇਸ਼ਨ ਏਜੰਟ ਰਾਜਦੀਪ ਸਿੰਘ ਨੇ 10 ਸਤੰਬਰ ਨੂੰ ਖ਼ੁਦ ਨੂੰ ਗੋਲੀ ਮਾਰ ਕੇ ਆਤਮ ਹੱਤਿਆ ਕਰ ਲਈ ਸੀ |
