ਸਿੱਧਵਾਂ ਬੇਟ (ਲੁਧਿਆਣਾ), 23 ਨਵੰਬਰ (ਜਸਵੰਤ ਸਿੰਘ ਸਲੇਮਪੁਰੀ, ਭੁਪਿੰਦਰ ਸਿੰਘ ਬੈਂਸ)-ਲਾਗਲੇ ਪਿੰਡ ਬੰਗਸੀਪੁਰਾ ਵਿਖੇ ਪਿਛਲੇ ਲੰਬੇ ਸਮੇਂ ਤੋਂ ਰਹਿ ਰਹੀ ਇਕ ਬੇਸਹਾਰਾ ਔਰਤ ਮਹੇਸਰੀ ਦੇਵੀ ਦੀ ਬੇਟੀ ਸਹਿਜ ਵਲੋਂ ਪਾਈ ਟਿਕਟ ਸਦਕਾ ਤਿੰਨ ਕਰੋੜ ਦੀ ਲਾਟਰੀ ਨਿਕਲੀ ਹੈ | ਇਸ ਮੌਕੇ ਆਪਣੇ ਵਲੋਂ ਪਾਈ ਟਿਕਟ ਵਿਖਾਉਂਦੇ ਹੋਏ ਮਹੇਸਰੀ ਦੇਵੀ ਨੇ ਦੱਸਿਆ ਕਿ ਕੁਝ ਸਾਲ ਪਹਿਲਾਂ ਮੇਰਾ ਪਤੀ ਅਤੇ ਪੁੱਤਰ ਮੋਟਰਸਾਈਕਲ 'ਤੇ ਸਿੱਧਵਾਂ ਬੇਟ ਨੂੰ ਜਾ ਰਹੇ ਸਨ ਜਿਨ੍ਹਾਂ ਨਾਲ ਰਸਤੇ ਵਿਚ ਹਾਦਸਾ ਵਾਪਰ ਗਿਆ ਅਤੇ ਮੇਰੇ ਪੁੱਤਰ ਦੀ ਮੌਤ ਹੋ ਗਈ | ਉਸ ਸਮੇਂ ਮੇਰਾ ਪਤੀ ਵੀ ਗੰਭੀਰ ਜ਼ਖ਼ਮੀ ਹੋ ਗਿਆ ਸੀ, ਪਰ ਬਾਅਦ ਵਿਚ ਮੇਰਾ ਪਤੀ ਮੈਨੂੰ ਛੱਡ ਕੇ ਕਿੱਧਰੇ ਚਲਾ ਗਿਆ | ਹੁਣ ਮੈਂ ਆਪਣੀ ਬੇਟੀ ਦੇ ਨਾਲ ਹੀ ਰਹਿ ਰਹੀ ਸੀ | ਹੁਣ ਪ੍ਰਮਾਤਮਾ ਨੇ ਮੇਰੀ ਇਕ ਤਰ੍ਹਾਂ ਨਾਲ ਬਾਂਹ ਫੜ੍ਹ ਲਈ ਹੈ | ਉਸ ਨੇ ਆਖਿਆ ਕਿ ਸਭ ਤੋਂ ਪਹਿਲਾਂ ਮੈਂ ਆਪਣਾ ਘਰ ਬਣਾਵਾਂਗੀ ਅਤੇ ਆਪਣੀ ਬੇਟੀ ਨੂੰ ਵਧੀਆ ਪੜ੍ਹਾਈ ਕਰਵਾ ਕੇ ਚੰਗੀ ਨੌਕਰੀ 'ਤੇ ਲਗਾਵਾਂਗੀ |
