ਨੱਥੂਵਾਲਾ ਗਰਬੀ, 25 ਦਸੰਬਰ (ਨਵਦੀਪ ਸਿੰਘ)-ਪਿੰਡ ਡੇਮਰੂ ਵਿਚੋਂ ਦੀ ਲੰਘਦੀ ਲੰਗੇਆਣਾ ਡਰੇਨ ਦਾ ਪੁਲ ਜੋ ਕਿ ਕੁਝ ਸਮਾਂ ਪਹਿਲਾਂ ਆਏ ਹੜ੍ਹਾਂ ਕਾਰਨ ਰੁੜ੍ਹ ਗਿਆ ਸੀ ਤੇ ਇਸੇ ਡਰੇਨ ਦਾ ਹੀ ਭਲੂਰ ਸੜਕ 'ਤੇ ਵੀ ਬਣਿਆ ਆਰਜ਼ੀ ਪੁਲ ਵੀ ਤੇਜ਼ ਪਾਣੀ ਦੇ ਵਹਾਅ 'ਚ ਰੁੜ੍ਹ ਗਿਆ ਸੀ | ਇਸ ਡਰੇਨ 'ਤੇ ਦੋਨੋਂ ਥਾਵਾਂ 'ਤੇ ਅਜੇ ਤੱਕ ਪੁਲ ਨਹੀਂ ਬਣੇ | ਬੇਸ਼ੱਕ ਸੜਕ ਤਾਂ ਬਣ ਗਈ ਪਰ ਵਿਭਾਗ ਨੇ ਨਾ ਤਾਂ ਪੁਲ ਬਣਾਏ ਤੇ ਨਾ ਹੀ ਕੋਈ ਇਸ ਸਬੰਧੀ ਸਾਈਨ ਬੋਰਡ ਲਗਾਏ ਹਨ | ਪਿੰਡ ਵਾਸੀਆਂ ਵਲੋਂ ਪੁਲੀਆਂ ਦੱਬ ਕੇ ਖੁਦ ਹੀ ਆਰਜ਼ੀ ਪੁਲ ਬਣਾਏ ਗਏ ਸਨ ਪਰ ਇਹ ਆਰਜ਼ੀ ਪੁਲ ਲੋਕਾਂ ਦੀਆਂ ਸਮੱਸਿਆਵਾਂ ਦਾ ਹੱਲ ਨਹੀਂ ਕਰ ਰਹੇ ਬਲਕਿ ਇਸ ਰਾਸਤੇ ਜਾਣ ਵਾਲੇ ਲੋਕਾਂ ਨੂੰ ਮੁਸੀਬਤਾਂ ਦਾ ਸਾਹਮਣਾ ਕਰਨਾ ਪੈਦਾ ਹੈ | ਇਕ ਤਾਂ ਧੁੰਦ ਦੇ ਕਾਰਨ ਕੋਈ ਵੀ ਵੱਡਾ ਹਾਦਸਾ ਵਾਪਰਨ ਦਾ ਡਰ ਰਹਿੰਦਾ ਹੈ | ਦੂਜਾ ਕੋਈ ਵੀ ਵੱਡਾ ਜਾਂ ਭਾਰੀ ਵਾਹਨ ਇਸ ਆਰਜ਼ੀ ਪੁਲ ਉੱਤੋਂ ਨਹੀਂ ਲੰਘ ਸਕਦਾ | ਬੀਤੇ ਕੱਲ੍ਹ ਇਕ ਰੇਤਾ ਦਾ ਟਰਾਲਾ ਪੁਲ 'ਤੇ ਫਸ ਗਿਆ ਤੇ ਇਹ ਰਸਤਾ ਸਾਰਾ ਦਿਨ ਬੰਦ ਰਿਹਾ | ਬਹੁਤ ਮੁਸ਼ਕਿਲ ਨਾਲ ਟਰਾਲੇ ਤੋਂ ਰੇਤਾ ਉਤਾਰ ਕੇ ਟਰਾਲਾ ਕੱਢਿਆ ਗਿਆ | ਪਿੰਡ ਵਾਸੀ ਸਤਨਾਮ ਸਿੰਘ, ਜੋਗਿੰਦਰ ਸਿੰਘ, ਬਲਵਿੰਦਰ ਸਿੰਘ ਸੰਧੂ, ਰੇਸ਼ਮ ਸਿੰਘ ਨੇ ਪ੍ਰਸ਼ਾਸਨ ਅਤੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਇਹ ਦੋਨੋਂ ਪੁਲ ਜਲਦੀ ਬਣਾਏ ਜਾਣ |
