ਸ਼ਹਿਣਾ, 3 ਸਤੰਬਰ (ਸੁਰੇਸ਼ ਗੋਗੀ)-ਇਲਾਕੇ ਅੰਦਰ ਲਗਾਤਾਰ ਪੈ ਰਹੀ ਬਰਸਾਤ ਅਤੇ ਤੇਜ਼ ਹਨੇਰੀ ਝੱਖੜ ਕਾਰਨ ਨਜ਼ਦੀਕੀ ਪਿੰਡ ਮੌੜ ਨਾਭਾ ਵਿਖੇ ਸ਼ੈਲਰਾਂ ਦੀਆਂ ਕੰਧਾਂ ਡਿੱਗਣ ਕਾਰਨ ਲੱਖਾਂ ਰੁਪਏ ਦਾ ਨੁਕਸਾਨ ਹੋ ਜਾਣ ਦਾ ਸਮਾਚਾਰ ਹੈ | ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਸ੍ਰੀ ਕਿ੍ਸ਼ਨਾ ਐਗਰੋ ਫੂਡਸ ਦੇ ਮਾਲਕ ਮੁਨੀਸ਼ ਗਰਗ ਅਤੇ ਪੁਨੀਤ ਰਾਈਸ ਮਿੱਲ ਦੇ ਮਾਲਕ ਪੁਨੀਤ ਗਰਗ ਵਾਸੀ ਤਪਾ ਨੇ ਦੱਸਿਆ ਕਿ ਉਨਾਂ ਦੇ ਸ਼ੈਲਰ ਨਜ਼ਦੀਕੀ ਪਿੰਡ ਮੌੜ ਨਾਭਾ ਵਿਖੇ ਹਨ, ਜਿੱਥੇ ਮੀਂਹ ਅਤੇ ਤੇਜ਼ ਹਨੇਰੀ ਝੱਖੜ ਚੱਲਣ ਕਾਰਨ ਉਨਾਂ ਦੇ ਸ਼ੈਲਰਾਂ ਦੀਆਂ ਕੰਧਾਂ ਡਿਗ ਗਈਆਂ, ਜਿਨਾਂ ਦੀ ਲੰਬਾਈ ਲਗਭਗ 150 ਫੁੱਟ ਦੇ ਕਰੀਬ ਸੀ | ਜਿਸ ਕਾਰਨ ਉਨਾਂ ਦਾ ਲੱਖਾਂ ਦਾ ਨੁਕਸਾਨ ਹੋ ਗਿਆ | ਦੱਸ ਦਈਏ ਕਿ ਬੀਤੇ ਕੁੱਝ ਦਿਨ ਪਹਿਲਾਂ ਵੀ ਪਏ ਮੀਂਹ ਅਤੇ ਤੇਜ਼ ਹਨੇਰੀ ਕਾਰਨ ਉਨਾਂ ਦੇ ਸ਼ੈਲਰਾਂ ਦੀਆਂ ਕੰਧਾਂ ਡਿਗ ਗਈਆਂ ਸਨ |
