ਕੈਨੇਡਾ 'ਚ ਪੰਜਾਬੀ ਟੈਕਸੀ ਡਰਾਈਵਰ 'ਤੇ ਚਾਕੂ ਨਾਲ ਹਮਲਾ
ਅਜੀਤ ਡੈਸਕ
05-09-2025
ਐਬਟਸਫੋਰਡ, 4 ਸਤੰਬਰ (ਗੁਰਦੀਪ ਸਿੰਘ ਗਰੇਵਾਲ)-ਕੈਨੇਡਾ ਦੇ ਬਿ੍ਟਿਸ਼ ਕੋਲੰਬੀਆ ਸੂਬੇ ਦੇ ਸ਼ਹਿਰ ਕਲੋਨਾ ਨਿਵਾਸੀ ਪੰਜਾਬੀ ਟੈਕਸੀ ਡਰਾਈਵਰ ਜਰਮਨਪ੍ਰੀਤ ਸਿੰਘ 'ਤੇ ਇਕ ਵਿਅਕਤੀ ਨੇ ਚਾਕੂ ਨਾਲ ਹਮਲਾ ਕਰ ਦਿੱਤਾ | ਇਸ ਹਮਲੇ 'ਚ ਗੰਭੀਰ ਜ਼ਖ਼ਮੀ ਹੋਏ ਜਰਮਨਪ੍ਰੀਤ ਸਿੰਘ ਨੂੰ ਤੁਰੰਤ ਹਸਪਤਾਲ ਪਹੁੰਚਾਇਆ ਗਿਆ | ਜਿਥੇ ਡਾਕਟਰਾਂ ਨੂੰ ਉਸਦੀ ਬਾਂਹ ਤੇ ਲੱਤ 'ਤੇ 30 ਟਾਂਕੇ ਲਾਉਣੇ ਪਏ | ਪਰ ਉਸਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ | ਘਟਨਾ ਪਹਿਲੀ ਤੇ 2 ਸਤੰਬਰ ਦੀ ਰਾਤ 12:30 ਵਜੇ ਦੀ ਹੈ ਜਦੋਂ ਜਰਮਨਪ੍ਰੀਤ 'ਕਲੋਨਾ ਕੈਬਜ' ਕੰਪਨੀ ਦੀ ਟੈਕਸੀ ਚਲਾਉਣ ਦੀ ਸ਼ਿਫਟ ਕਰ ਰਿਹਾ ਸੀ ਤੇ ਜਦੋਂ ਉਹ ਕਲੋਨਾ ਡਾਊਨਟਾਊਨ ਦੀ ਵਾਟਰ ਸਟਰੀਟ ਤੇ ਬਰਨਰਡ ਐਵੇਨਿਊ ਦੇ ਚੌਰਸਤੇ 'ਤੇ ਰੁਕਿਆ ਤਾਂ ਇਕ ਵਿਅਕਤੀ ਨੇ ਉਸ ਦੀ ਟੈਕਸੀ ਦਾ ਸ਼ੀਸ਼ਾ ਖੜਕਾਇਆ ਤੇ 100 ਡਾਲਰ ਦੀ ਮੰਗ ਕਰਨ ਲੱਗਾ | ਇਸ ਦੌਰਾਨ ਉਸ ਨੇ ਜਰਮਨਪ੍ਰੀਤ 'ਤੇ ਵੱਡੇ ਚਾਕੂ ਨਾਲ ਹਮਲਾ ਕਰ ਦਿੱਤਾ | ਦੱਸਿਆ ਜਾਂਦਾ ਹੈ ਕਿ ਹਮਲਾਵਰ ਇਕ ਬੇਘਰਾ ਵਿਅਕਤੀ ਹੈ | ਜਿਸ ਨੂੰ ਪੁਲਿਸ ਨੇ ਬਾਅਦ ਵਿਚ ਗਿ੍ਫ਼ਤਾਰ ਕਰ ਲਿਆ ਹੈ | ਕੌਂਸਲਰ ਮੋਹਣੀ ਸਿੰਘ ਤੇ ਮੀਡੀਆ ਸ਼ਖ਼ਸੀਅਤ ਗੁਰਪ੍ਰੀਤ ਬਾਸੀ ਜਰਮਨਪ੍ਰੀਤ ਦੀ ਮਦਦ ਕਰ ਰਹੇ ਹਨ |
