ਸੈਕਰਾਮੈਂਟੋ, 1 ਨਵੰਬਰ (ਹੁਸਨ ਲੜੋਆ ਬੰਗਾ)-ਜੈੱਟ ਬਲਿਊ ਜਹਾਜ਼ ਅਚਾਨਕ ਹੇਠਾਂ ਆ ਜਾਣ ਕਾਰਨ ਟੈਂਪਾ ਵਿਚ ਹੰਗਾਮੀ ਹਾਲਤ ਵਿਚ ਉਤਾਰਨਾ ਪਿਆ ਹੈ | ਫਲੋਰਿਡਾ ਵਿਚ ਵਾਪਰੀ ਇਸ ਘਟਨਾ ਵਿਚ ਬੱਚਿਆਂ ਸਮੇਤ 15 ਯਾਤਰੀ ਜ਼ਖ਼ਮੀ ਹੋਏ, ਜਿਨ੍ਹਾਂ ਨੂੰ ਇਲਾਜ ਲਈ ਹਸਪਤਾਲ ਦਾਖਲ ਕਰਵਾਉਣਾ ਪਿਆ | ਘਟਨਾ ਦੀ ਸੰਘੀ ਜਾਂਚ ਹੋ ਰਹੀ ਹੈ | ਜੈੱਟ ਬਲਿਊ ਨੇ ਜਾਰੀ ਇਕ ਬਿਆਨ ਵਿਚ ਕਿਹਾ ਕਿ ਜਹਾਜ਼ 1230 ਕੈਨਕਨ, ਮੈਕਸੀਕੋ ਤੋਂ ਨਿਊਯਾਰਕ, ਨਿਊਜਰਸੀ ਜਾ ਰਿਹਾ ਸੀ ਜਦੋਂ ਇਹ 7 ਸਕਿੰਟਾਂ ਵਿਚ ਤਕਰੀਬਨ 100 ਫੁੱਟ ਹੇਠਾਂ ਆ ਗਿਆ | ਪਾਇਲਟ ਨੇ ਡਾਕਟਰੀ ਸਹਾਇਤਾ ਮੰਗੀ ਤੇ ਜਹਾਜ਼ ਨੂੰ ਟੈਂਪਾ ਇੰਟਰਨੈਸ਼ਨਲ ਹਵਾਈ ਅੱਡੇ ਵੱਲ ਮੋੜ ਦਿੱਤਾ | ਸੰਘੀ ਐਵੀਏਸ਼ਨ ਅਨੁਸਾਰ ਬਾਅਦ ਵਿਚ ਜਹਾਜ਼ ਆਮ ਹਾਲਤ ਵਿਚ ਆ ਗਿਆ ਤੇ ਇਸਨੂੰ ਸੁਰੱਖਿਅਤ ਟੈਂਪਾ ਵਿਚ ਉਤਾਰ ਲਿਆ ਗਿਆ | ਇਸ ਘਟਨਾ ਦੀ 'ਫਲਾਈਟ ਕੰਟਰੋਲ ਮੁੱਦੇ' ਨੂੰ ਮੁੱਖ ਰੱਖ ਕੇ ਜਾਂਚ ਕੀਤੀ ਜਾ ਰਹੀ ਹੈ | ਨੈਸ਼ਨਲ ਟਰਾਂਸਪੋਰਟ ਸੇਫਟੀ ਬੋਰਡ ਘਟਨਾ ਦੀ ਆਪਣੇ ਤੌਰ 'ਤੇ ਜਾਂਚ ਕਰੇਗਾ |
