ਮੁੰਬਈ, 19 ਦਸੰਬਰ (ਏਜੰਸੀ)-ਮਸ਼ਹੂਰ ਕਾਮੇਡੀਅਨ ਭਾਰਤੀ ਸਿੰਘ ਅਤੇ ਹਰਸ਼ ਲਿੰਬਾਚੀਆ ਦੂਜੀ ਵਾਰ ਮਾਂ-ਬਾਪ ਬਣ ਗਏ | ਭਾਰਤੀ ਨੂੰ ਉਸ ਸਮੇਂ ਹਸਪਤਾਲ ਲਿਜਾਇਆ ਗਿਆ ਜਦੋਂ ਉਹ ਇਕ ਪ੍ਰੋਗਰਾਮ ਦੀ ਸ਼ੂਟਿੰਗ ਕਰ ਰਹੀ ਸੀ | ਹਸਪਤਾਲ ਪਹੁੰਚਣ ਤੋਂ ਬਾਅਦ ਉਨ੍ਹਾਂ ਦੇ ਘਰ ਦੂਜੇ ਬੇਟੇ ਨੇ ਜਨਮ ਲਿਆ | ਇਸ ਮੌਕੇ ਉਸ ਦੇ ਪਤੀ ਹਰਸ਼ ਲਿੰਬਾਚੀਆ ਵੀ ਮੌਜੂਦ ਸਨ | ਇਸ ਜੋੜੇ ਦਾ ਪਹਿਲਾਂ ਵੀ ਇਕ ਬੇਟਾ ਹੈ ਜਿਸ ਦਾ ਨਾਂਅ ਲਕਸ਼ੈ ਹੈ | ਭਾਰਤੀ ਅਤੇ ਹਰਸ਼ ਨੇ ਸਤੰਬਰ 'ਚ ਸਵਿਟਜ਼ਰਲੈਂਡ ਦੀ ਯਾਤਰਾ ਦੌਰਾਨ ਆਪਣੀ ਦੂਜੀ ਪ੍ਰੈਗਨੈਂਸੀ ਦਾ ਐਲਾਨ ਕੀਤਾ ਸੀ | ਭਾਰਤੀ ਚਾਹੁੰਦੀ ਸੀ ਕਿ ਇਸ ਵਾਰ ਉਸ ਦੇ ਘਰ ਧੀ ਆਵੇ, ਪਰ ਕੁਦਰਤ ਨੇ ਉਸ ਨੂੰ ਫਿਰ ਤੋਂ ਪੁੱਤਰ ਦੀ ਦਾਤ ਬਖ਼ਸ਼ੀ ਹੈ | ਪੂਰੇ ਪਰਿਵਾਰ 'ਚ ਇਸ ਸਮੇਂ ਜਸ਼ਨ ਦਾ ਮਾਹੌਲ ਹੈ | ਆਪਣੇ ਇਕ ਬਲਾਗ 'ਚ ਭਾਰਤੀ ਨੇ ਦੱਸਿਆ ਸੀ ਕਿ ਉਸ ਦੇ ਵੱਡੇ ਬੇਟੇ ਨੇ ਆਪਣੇ ਛੋਟੇ ਭਰਾ ਦਾ ਨਿੱਕ-ਨੇਮ (ਉਪਨਾਮ) ਪਹਿਲਾਂ ਹੀ 'ਕਾਜੂ' ਚੁਣ ਲਿਆ ਸੀ | ਭਾਰਤੀ ਅਤੇ ਹਰਸ਼ 2022 'ਚ ਪਹਿਲੀ ਵਾਰ ਮਾਂ-ਬਾਪ ਬਣੇ ਸਨ |
