ਲੰਡਨ, 19 ਦਸੰਬਰ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਲੰਡਨ ਦੇ ਰਹਿਣ ਵਾਲੇ ਅਤੇ ਲਾਫਬਰੋ ਯੂਨੀਵਰਸਿਟੀ ਦਾ ਭਾਰਤੀ ਮੂਲ ਦਾ ਇੱਕ ਵਿਦਿਆਰਥੀ 20 ਸਾਲਾ ਆਰੀਅਨ ਸ਼ਰਮਾ ਬੀਤੀ 22 ਨਵੰਬਰ ਤੋਂ ਲਾਪਤਾ ਸੀ, ਜਿਸ ਦੀ ਪੁਲਿਸ ਨੂੰ ਹੁਣ ਲਾਸ਼ ਮਿਲੀ ਹੈ | ਮੈਟਰੋਪੁਲੀਟਨ ਪੁਲਿਸ ਨੇ ਕਿਹਾ ਕਿ ਆਰੀਅਨ ਸ਼ਰਮਾ ਨੂੰ ਆਖਰੀ ਵਾਰ 22 ਨਵੰਬਰ ਨੂੰ ਲਗਭਗ 00:30 ਵਜੇ ਲੌਫਬਰੋ ਦੇ ਬਾਹਰਵਾਰ ਮੈਡੋ ਲੇਨ ਵਿਚ ਸੀ ਸੀ ਟੀ ਵੀ 'ਤੇ ਦੇਖਿਆ ਗਿਆ ਸੀ | ਜਦ ਕਿ ਬੀਤੇ ਐਤਵਾਰ ਨੂੰ ਨੌਰਮਨਟਨ ਓਨ ਸੋਅਰ ਵਿਚ ਸੋਅਰ ਨਦੀ ਵਿਚੋਂ ਇਕ ਲਾਸ਼ ਮਿਲੀ | ਪੁਲਿਸ ਨੇ ਅੱਗੇ ਕਿਹਾ ਕਿ ਹਾਲਾਂਕਿ ਰਸਮੀ ਪਛਾਣ ਅਜੇ ਬਾਕੀ ਹੈ, ਪਰ ਇਹ ਲਾਸ਼ ਆਰੀਅਨ ਦੀ ਹੀ ਹੈ | ਲੰਡਨ ਵਿਚ ਰਹਿੰਦੇ ਆਰੀਅਨ ਦੇ ਮਾਪਿਆਂ ਸੁੱਖੀ ਅਤੇ ਰਾਕੇਸ਼ ਸ਼ਰਮਾ ਨੇ ਆਪਣੇ ਬੇਟੇ ਨੂੰ ਲੱਭਣ ਲਈ ਵੀ ਲੋਕਾਂ ਨੂੰ ਅਪੀਲ ਕੀਤੀ ਸੀ | ਪੁਲਿਸ ਵੱਲੋਂ ਮੌਤ ਦੇ ਕਾਰਨਾਂ ਦੀ ਅਜੇ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਗਈ |
