ਜਲੰਧਰ, 6 ਦਸੰਬਰ (ਸ਼ਿਵ)- ਨਗਰ ਨਿਗਮ ਦੇ ਬਿਲਡਿੰਗ ਵਿਭਾਗ ਨੇ ਲੰਬੇ ਸਮੇਂ ਬਾਅਦ ਨਾਜਾਇਜ਼ ਉਸਾਰੀਆਂ ਦੇ ਮਾਮਲੇ ਵਿਚ ਕਾਰਵਾਈ ਸ਼ੁਰੂ ਕੀਤੀ ਹੈ | ਬਿਲਡਿੰਗ ਵਿਭਾਗ ਦੀ ਡਿੱਚ ਨਾ ਸਿਰਫ਼ ਨਿਊ ਜਵਾਹਰ ਨਗਰ ਮਾਰਕੀਟ ਸਥਿਤ ਬਾਂਸਲ ਸਵੀਟਸ ਸ਼ਾਪ ਦੀ ਬਣੀ ਨਾਜਾਇਜ਼ ਉਸਾਰੀ 'ਤੇ ਚੱਲੀ ਹੈ ਜਦਕਿ ਬਿਲਡਿੰਗ ਵਿਭਾਗ ਨੇ ਪੁਰਾਣੀ ਨਿਊ ਜਵਾਹਰ ਨਗਰ ਵਿਚ ਇੱਕ ਇਮਾਰਤ ਦੀ ਨਾਜਾਇਜ਼ ਉਸਾਰੀ ਦੇ ਹਿੱਸੇ ਅਤੇ ਤੇਲ ਵਾਲੀ ਗਲੀ ਵਿਚ ਦੁਕਾਨਾਂ ਸੀਲ ਕੀਤੀਆਂ ਹਨ | ਦੁਪਹਿਰ ਬਾਅਦ ਨਗਰ ਨਿਗਮ ਦੀ ਬਿਲਡਿੰਗ ਵਿਭਾਗ ਦੀ ਟੀਮ ਨੇ ਨਿਗਮ ਕਮਿਸ਼ਨਰ ਸੰਦੀਪ ਰਿਸ਼ੀ ਤੇ ਐਮ. ਟੀ. ਪੀ. ਮਿਹਰਬਾਨ ਦੀ ਹਦਾਇਤ 'ਤੇ ਇਹ ਕਾਰਵਾਈ ਕੀਤੀ ਹੈ | ਨਿਗਮ ਦੀ ਬਿਲਡਿੰਗ ਵਿਭਾਗ ਦੀ ਟੀਮ ਵਲੋਂ ਦੁਪਹਿਰ ਬਾਅਦ ਡਿੱਚ ਅਤੇ ਪੁਲਿਸ ਕਰਮਚਾਰੀਆਂ ਦੇ ਨਾਲ ਬਾਂਸਲ ਸਵੀਟਸ ਸ਼ਾਪ ਦੀ ਨਾਜਾਇਜ਼ ਉਸਾਰੀ 'ਤੇ ਕਾਰਵਾਈ ਕੀਤੀ ਗਈ | ਨਗਰ ਨਿਗਮ ਨੂੰ ਇਹ ਕਾਰਵਾਈ ਇਸ ਕਰਕੇ ਵੀ ਕਰਨੀ ਪਈ ਕਿਉਂਕਿ ਇਸ ਤੋਂ ਪਹਿਲਾਂ ਨਿਊ ਜਵਾਹਰ ਨਗਰ ਦੇ ਸ੍ਰੀ ਰਾਜਵਿੰਦਰ ਸਿੰਘ ਭੱਲਾ ਇਹ ਮਾਮਲਾ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਵਿਚ ਲੈ ਗਏ ਸੀ ਤੇ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਦੀ ਹਦਾਇਤ ਤੋਂ ਬਾਅਦ ਹੁਣ ਇਹ ਕਾਰਵਾਈ ਕਰਨੀ ਪਈ | ਇਸ ਮਾਮਲੇ ਵਿਚ ਨਿਗਮ ਅਫ਼ਸਰਾਂ ਨੂੰ ਨੋਟਿਸ ਵੀ ਜਾਰੀ ਕੀਤੇ ਗਏ ਸਨ | ਨਿਗਮ ਦੀ ਡਿੱਚ ਨੇ ਬਾਂਸਲ ਸਵੀਟਸ ਦੀ ਨਾਜਾਇਜ਼ ਉਸਾਰੀ ਦਾ ਹਿੱਸਾ ਤੋੜਿਆ ਤੇ ਉਸ ਵਿਚ ਜਿਹੜੇ ਲੋਹੇ ਦੇ ਸਰੀਏ ਵੀ ਬਾਹਰ ਆਏ ਸਨ ਤਾਂ ਉਨਾਂ ਨੂੰ ਨਿਗਮ ਪੁਲਿਸ ਕਰਮਚਾਰੀਆਂ ਵਲੋਂ ਚੁੱਕ ਕੇ ਸਾਈਡ 'ਤੇ ਕੀਤਾ ਗਿਆ ਤਾਂ ਜੋ ਕਿਸੇ ਦੇ ਲੱਗ ਨਾ ਜਾਣ | ਇਸ ਮਾਮਲੇ ਵਿਚ ਹੁਣ 18 ਦਸੰਬਰ ਨੂੰ ਹਾਈ ਕੋਰਟ ਵਿਚ ਸੁਣਵਾਈ ਹੋਣੀ ਹੈ |
