ਮੁੰਬਈ, 31 ਦਸੰਬਰ (ਏਜੰਸੀ)-ਹਵਾਬਾਜ਼ੀ ਖੇਤਰ ਦੀ ਨਿਗਰਾਨੀ ਕਰਨ ਵਾਲੀ ਸੰਸਥਾ ਡੀ.ਜੀ.ਸੀ.ਏ. ਨੇ ਏਅਰ ਇੰਡੀਆ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਹੈ | ਇਹ ਕਾਰਵਾਈ ਇਕ ਬੋਇੰਗ 787-8 ਡ੍ਰੀਮਲਾਈਨਰ ਜਹਾਜ਼ ਨੂੰ ਵਾਰ-ਵਾਰ ਆ ਰਹੀਆਂ ਤਕਨੀਕੀ ਖ਼ਰਾਬੀਆਂ ਦੇ ਬਾਵਜੂਦ ਉਡਾਉਣ ਦੇ ਖ਼ਿਲਾਫ਼ ਕੀਤੀ ਗਈ ਹੈ | ਇਸ ਹਫ਼ਤੇ ਜਾਰੀ ਕੀਤੇ ਨੋਟਿਸ 'ਚ ਅਥਾਰਟੀ ਨੇ ਜਹਾਜ਼ ਨੰਬਰ ਵੀ.ਟੀ.-ਏ.ਐਨ.ਆਈ. 'ਚ ਪਾਈਆਂ ਗਈਆਂ ਲਗਾਤਾਰ ਖ਼ਾਮੀਆਂ 'ਤੇ ਗੰਭੀਰ ਚਿੰਤਾ ਪ੍ਰਗਟਾਈ ਹੈ | ਨੋਟਿਸ 'ਚ ਇਸ ਸਾਲ 28 ਜੂਨ ਨੂੰ ਸੰਚਾਲਿਤ ਇਕ ਉਡਾਣ ਦੌਰਾਨ ਘੱਟੋ-ਘੱਟ ਉਪਕਰਨ ਸੂਚੀ ਦੇ ਨਿਯਮਾਂ ਦੀ ਉਲੰਘਣਾ ਕਰਨ ਦਾ ਮੁੱਦਾ ਵੀ ਚੁੱਕਿਆ ਗਿਆ ਹੈ | ਅਥਾਰਟੀ ਦਾ ਕਹਿਣਾ ਹੈ ਕਿ ਦਿੱਲੀ-ਟੋਕੀਓ ਰੂਟ 'ਤੇ ਚੱਲਣ ਵਾਲੀਆਂ ਉਡਾਣਾਂ ਏ.ਆਈ. 258 ਅਤੇ ਏ.ਆਈ. 357 ਦੇ ਸੰਚਾਲਨ ਦੌਰਾਨ ਜਹਾਜ਼ ਦੀ ਸੁਰੱਖਿਆ, ਨਿਯਮਾਂ ਦੀ ਪਾਲਣਾ ਅਤੇ ਚਾਲਕ ਦਲ ਦੇ ਫੈਸਲਿਆਂ 'ਚ ਵੱਡੀਆਂ ਖ਼ਾਮੀਆਂ ਪਾਈਆਂ ਗਈਆਂ |
