ਨਵੀਂ ਦਿੱਲੀ, 23 ਅਪ੍ਰੈਲ (ਉਪਮਾ ਡਾਗਾ ਪਾਰਥ)-ਪੰਜਾਬ 'ਚ ਨਵਿਆਉਣਯੋਗ ਊਰਜਾ ਨੂੰ ਹੁਲਾਰਾ ਦੇਣ ਲਈ ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਟਿਡ (ਪੀ.ਐਸ.ਪੀ.ਸੀ.ਐਲ.) ਵਲੋਂ ਸ਼ੁਰੂ ਕੀਤੀ ਕਵਾਇਦ ਹੇਠ ਹਿੰਦੁਸਤਾਨ ਪਾਵਰ ਨੇ ਬਾਜ਼ੀ ਮਾਰਦਿਆਂ 100 ਮੈਗਾਵਾਟ ਏ.ਸੀ. ਦਾ ਸੂਰਜੀ ਊਰਜਾ ਪ੍ਰਾਜੈਕਟ ਹਾਸਿਲ ਕੀਤਾ ਹੈ | ਹਿੰਦੁਸਤਾਨ ਪਾਵਰ ਨੂੰ ਇਹ ਪ੍ਰਾਜੈਕਟ ਈ.ਟੀ.ਐਸ. ਪੋਰਟਲ 'ਤੇ ਲੱਗੀ ਬੋਲੀ ਅਤੇ ਈ-ਰਿਵਰਸ ਨਿਲਾਮੀ ਦੇ ਅਮਲ ਤੋਂ ਬਾਅਦ ਹਾਸਿਲ ਹੋਇਆ ਹੈ | ਇਸ ਨਾਲ ਤਕਰੀਬਨ 140 ਤੋਂ 150 ਮੈਗਾਵਾਟ ਸੂਰਜੀ ਊਰਜਾ ਸਮਰੱਥਾ ਪੈਦਾ ਹੋਣ ਦੀ ਸੰਭਾਵਨਾ ਹੈ | ਸਮਝੌਤੇ ਤਹਿਤ ਹਿੰਦੁਸਤਾਨ ਪਾਵਰ ਪੀ.ਐਸ.ਪੀ.ਸੀ.ਐਲ. ਨਾਲ 25 ਸਾਲ ਦੇ ਊਰਜਾ ਖਰੀਦ ਸਮਝੌਤੇ 'ਤੇ ਦਸਤਖ਼ਤ ਕਰੇਗਾ, ਜਿਸ ਤਹਿਤ ਉਹ ਪੰਜਾਬ ਨੂੰ ਸਵੱਛ ਊਰਜਾ ਦੀ ਸਪਲਾਈ ਕਰੇਗਾ | ਇਹ ਪ੍ਰਾਜੈਕਟ ਸਮਝੌਤੇ ਦੇ 24 ਮਹੀਨੇ ਬਾਅਦ ਚਾਲੂ ਹੋਵੇਗਾ | ਇਸ ਸੰਬੰਧ 'ਚ ਟਿੱਪਣੀ ਕਰਦਿਆਂ ਹਿੰਦੁਸਤਾਨ ਪਾਵਰ ਦੇ ਚੇਅਰਮੈਨ ਰਤੁਲ ਪੁਰੀ ਨੇ ਕਿਹਾ ਕਿ ਪੰਜਾਬ ਸਾਡੇ ਲਈ ਇਕ ਅਹਿਮ ਬਾਜ਼ਾਰ ਰਿਹਾ ਹੈ ਜਿਥੇ ਸਵੱਛ ਊਰਜਾ ਦੀ ਸਥਿਰ ਮੰਗ ਹੈ | ਉਨ੍ਹਾਂ ਕਿਹਾ ਕਿ ਇਸ ਪ੍ਰਾਜੈਕਟ ਰਾਹੀਂ ਅਸੀਂ ਨਾ ਸਿਰਫ ਸੂਬੇ ਦੇ ਊਰਜਾ ਦੇ ਬਦਲ 'ਚ ਅਰਥਪੂਰਨ ਯੋਗਦਾਨ ਪਾਵਾਂਗੇ, ਸਗੋਂ ਖਿੱਤੇ 'ਚ ਆਪਣੀ ਹੋਂਦ ਨੂੰ ਵੀ ਮਜ਼ਬੂਤ ਕਰਾਂਗੇ |
