ਦਸੂਹਾ, 5 ਅਪ੍ਰੈਲ (ਭੁੱਲਰ)-ਸਰਪੰਚ ਐਡਵੋਕੇਟ ਬਲਜਿੰਦਰ ਸਿੰਘ ਹੁੰਦਲ ਨੇ ਕਿਹਾ ਕਿ ਦੁੱਧ ਦੀ ਕੀਮਤ ਪ੍ਰਤੀ ਫੈਟ ਦੀ ਜਗ੍ਹਾ ਪ੍ਰਤੀ ਲੀਟਰ ਵਧਾਉਣੀ ਚਾਹੀਦੀ ਹੈ | ਉਨ੍ਹਾਂ ਕਿਹਾ ਕਿ 10 ਤੋਂ 15 ਰੁਪਏ ਪ੍ਰਤੀ ਫੈਟ ਕੀਮਤ ਵਧਾਈ ਗਈ ਹੈ, ਜਿਸ ਨਾਲ 30 ਤੋਂ 35 ਪੈਸੇ ਪ੍ਰਤੀ ਲੀਟਰ ਦੁੱਧ ਵਿਚ ਨਿਗੂਣਾ ਜਿਹਾ ਵਾਧਾ ਹੋਇਆ ਹੈ ਜੋ ਕਿ ਪਸ਼ੂਆਂ ਦੇ ਮਾਲਕਾਂ ਨਾਲ ਕੋਝਾ ਮਜ਼ਾਕ ਹੈ | ਉਨ੍ਹਾਂ ਦੱਸਿਆ ਕਿ 10 ਤੋਂ 15 ਰੁਪਏ ਪ੍ਰਤੀ ਫੈਟ ਦੀ ਕੀਮਤ ਵਧਾਉਣ ਨਾਲ ਇਕ ਕੁਇੰਟਲ ਦੁੱਧ ਵਿਚੋਂ ਸਿਰਫ਼ ਚਾਰ ਕਿੱਲੋ ਗ੍ਰਾਮ ਫੈਟ ਨਿਕਲਦੀ ਹੈ ਅਤੇ ਦੁੱਧ ਦੀ ਕੀਮਤ ਵਿਚ ਕੋਈ ਬਹੁਤਾ ਫ਼ਰਕ ਨਹੀਂ ਪੈਦਾ | ਉਨ੍ਹਾਂ ਦੱਸਿਆ ਕਿ ਜੇਕਰ 100 ਕੈਟਲ ਦੇ ਫਾਰਮ ਦੇ ਖ਼ਰਚੇ ਦਾ ਅਨੁਮਾਨ ਲਗਾਇਆ ਜਾਵੇ ਤਾਂ 10 ਲੱਖ ਰੁਪਏ ਵਿਚੋਂ ਕਿਸਾਨ ਨੂੰ 5 ਲੱਖ ਰੁਪਏ ਦੀ ਸਿੱਧੇ ਤੌਰ 'ਤੇ ਫੀਡ ਕੈਟਲ ਲਈ ਖ਼ਰੀਦਣੀ ਪੈਂਦੀ ਹੈ ਜਦਕਿ ਬਾਕੀ ਖ਼ਰਚੇ ਅਲੱਗ ਝੱਲਣੇ ਪੈਂਦੇ ਹਨ | ਸਿੱਟੇ ਵਜੋਂ ਕਿਸਾਨਾਂ ਨੂੰ ਕੋਈ ਵੀ ਲਾਭ ਨਹੀਂ ਹੁੰਦਾ ਉਨ੍ਹਾਂ ਦੱਸਿਆ ਕਿ ਫੀਡ ਦੀਆਂ ਕੰਪਨੀਆਂ ਵਲੋਂ ਹਰ ਛੇ ਮਹੀਨੇ ਬਾਅਦ 40-100 ਰੁਪਏ ਦੇ ਲਗਪਗ ਕੀਮਤ ਵਿਚ ਵਾਧਾ ਕੀਤਾ ਜਾਂਦਾ ਹੈ ਕਿਸਾਨਾਂ ਨੂੰ ਮਹਿੰਗੇ ਭਾਅ ਫੀਡ ਲੈ ਕੇ ਤੇ ਹੋਰ ਵੱਡੇ ਖ਼ਰਚੇ ਕਰਕੇ ਦੁੱਧ ਦੇ ਕਾਰੋਬਾਰ ਵਿਚੋਂ ਘਾਟਾ ਸਹਿਣਾ ਪੈ ਰਿਹਾ ਹੈ ਉਨ੍ਹਾਂ ਕਿਹਾ ਕਿ ਦੁੱਧ ਦੇ ਕਾਰੋਬਾਰ ਨੂੰ ਹੋਰ ਉਤਸ਼ਾਹਿਤ ਕਰਨ ਲਈ ਫੈਟ ਦੀ ਕੀਮਤ ਵਧਾਉਣ ਦੀ ਬਜਾਏ ਦੁੱਧ ਦੀ ਕੀਮਤ ਸਿੱਧੇ ਤੌਰ ਤੇ ਵਧਾਉਣੀ ਚਾਹੀਦੀ ਹੈ ਉਨ੍ਹਾਂ ਮੰਗ ਕੀਤੀ ਗਈ ਗਾਂ ਦੇ ਦੁੱਧ ਦੀ ਕੀਮਤ 60 ਰੁਪਏ ਅਤੇ ਮੱਝ ਦੇ ਦੁੱਧ ਦੀ ਕੀਮਤ ਘੱਟ ਤੋਂ ਘੱਟ 100 ਰੁਪਏ ਪ੍ਰਤੀ ਲੀਟਰ ਕਰਨੀ ਚਾਹੀਦੀ ਹੈ ਤਾਂ ਹੀ ਕਿਸਾਨ ਆਪਣਾ ਗੁਜ਼ਾਰਾ ਕਰ ਸਕਦੇ ਹਨ ਅਤੇ ਚਿੱਟੀ ਕ੍ਰਾਂਤੀ ਲਿਆਂਦੀ ਜਾ ਸਕਦੀ ਹੈ |
