ਲੁੱਟਖੋਹ ’ਚ ਸ਼ਾਮਿਲ 2 ਮੁਲਜ਼ਮ ਹਠੂਰ ਪੁਲਿਸ ਨੇ ਕੀਤੇ ਗ੍ਰਿਫਤਾਰ

ਹਠੂਰ, 24 ਜੂਨ (ਜਸਵਿੰਦਰ ਸਿੰਘ ਛਿੰਦਾ)-ਪੁਲਿਸ ਥਾਣਾ ਹਠੂਰ ਵਿਖੇ ਇਕ ਲੁੱਟਖੋਹ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ। ਜਿਸ ਸਬੰਧੀ ਮੁਦਈ ਅਮਰਜੀਤ ਸਿੰਘ ਪੁੱਤਰ ਸਰੂਪ ਸਿੰਘ ਪਿੰਡ ਕੋਠੇ ਪੋਨਾ ਵਲੋਂ ਦਿੱਤੀ ਦਰਖਾਸ਼ਤ ਤਹਿਤ ਬਖਸ਼ੀਸ਼ ਸਿੰਘ ਪੁੱਤਰ ਮੰਗਲ ਸਿੰਘ ਵਾਸੀ ਕਾਉਂਕੇ ਕਲੋਨੀਆ ਜਗਰਾਉਂ ਅਤੇ ਜੈਦੀਪ ਸਿੰਘ ਪੁੱਤਰ ਨਿੱਕਾ ਸਿੰਘ ਵਾਸੀ ਲਹਿੰਦੀ ਭੈਣੀ ਜਗਰਾਉਂ ਵਿਰੁੱਧ ਮੁਕੱਦਮਾ ਨੰਬਰ 107, 304, 3(5), ਬੀ.ਐੱਨ.ਐੱਸ. ਵਾਧਾ ਜ਼ੁਰਮ 317 (2) ਬੀ.ਐੱਸ ਮੁਕੱਦਮਾਂ ਦਰਜ ਕੀਤਾ ਹੈ। ਥਾਣਾ ਮੁਖੀ ਗੁਰਸੇਵਕ ਸਿੰਘ ਨੇ ਦੱਸਿਆ ਕਿ ਮੁਦਈ ਅਮਰਜੀਤ ਸਿੰਘ ਆਪਣੀ ਐਕਟਿਵਾ ਸਕੂਟਰੀ ’ਤੇ ਜਗਰਾਉਂ ਤੋਂ ਪਿੰਡ ਚੀਮਾ ਨੂੰ ਆ ਰਿਹਾ ਸੀ ਕਿ ਰੂਮੀ ਤੋਂ ਚੀਮਾ ਨੂੰ ਆਉਂਦੀ ਸੜਕ ’ਤੇ ਉਸ ਪਿੱਛੇ ਦੋ ਮੋਟਰਸਾਇਕਲ ਸਵਾਰ ਲੱਗ ਗਏ ਜਿੰਨ੍ਹਾਂ ਦੇ ਮੂੰਹ ਬੰਨ੍ਹੇ ਹੋਏ ਸਨ ਅਤੇ ਉਸਦੀ ਕਮੀਜ਼ ਦਾ ਖੀਸਾ ਖਿੱਚ ਕੇ ਪਾੜ ਕੇ ਵਿਚੋਂ ਉਸਦਾ ਬਟੂਆ ਖੋਹ ਕੇ ਭੱਜ ਗਏ। ਜਿਸ ਵਿਚ ਉਸਦੇ ਜ਼ਰੂਰੀ ਦਸਤਾਵੇਜ਼ ਤੋਂ ਇਲਾਵਾ 20 ਹਜ਼ਾਰ ਰੁਪਏ ਸਨ। ਜਿਸ ਸਬੰਧੀ ਪੁਲਿਸ ਨੇ ਤੁਰੰਤ ਕਾਰਵਾਈ ਕਰਦਿਆਂ ਉਕਤ ਦੋਵੇਂ ਮੁਲਜ਼ਮਾਂ ਨੂੰ ਫੁਰਤੀ ਨਾਲ ਮੋਟਰਸਾਇਕਲ ਸਮੇਤ ਗ੍ਰਿਫਤਾਰ ਕਰ ਲਿਆ ਹੈ।