ਘੁੰਮਣਾਂ, 24 ਫਰਵਰੀ (ਮਹਿੰਦਰ ਪਾਲ ਸਿੰਘ)-ਪੰਜਾਬ ਦੇ ਪੇਂਡੂ ਲੋਕਾਂ ਦਾ ਸੜਕਾਂ ਹੀ ਸਰਮਾਇਆ ਹੁੰਦੀਆਂ ਹਨ ਜਿੱਥੋਂ ਦੀ ਲੰਘ ਕੇ ਸ਼ਹਿਰਾਂ 'ਚ ਕੰਮਾਂ-ਕਾਰਾਂ 'ਤੇ ਮਜ਼ਦੂਰਾਂ ਨੇ ਜਾਣਾ ਹੁੰਦਾ | ਕਿਸਾਨਾਂ ਨੇ ਫ਼ਸਲ ਦੀ ਢੋਅ-ਢੋਆਈ ਮੰਡੀਕਰਨ ਲਈ ਸੜਕਾਂ ਤੋਂ ਗੁਜਰਨਾ ਹੁੰਦਾ | ਪਰ ਜੇਕਰ ਸੜਕਾਂ 'ਤੇ ਡੂੰਘੇ-ਡੂੰਘੇ ਟੋਏ ਪਏ ਹੋਣ ਜਾਂ ਮਸ਼ੀਨਰੀ ਹੋਣ ਦੇ ਬਾਵਜੂਦ ਵੀ ਲੰਘਣਾ ਔਖਾ ਹੁੰਦਾ | ਮਸ਼ੀਨਰੀ ਦਾ ਨੁਕਸਾਨ ਹੁੰਦਾ, ਤੇਲ ਖਰਚਾ ਵਧਦਾ ਤੇ ਸਮਾਂ ਖਰਾਬ ਹੁੰਦਾ | ਇਹ ਵਿਚਾਰ ਪਿੰਡ ਮੁੰਨਾ ਤੋਂ ਜੱਸੋਮਜਾਰਾ ਗੁਜ਼ਰਦੇ ਹੋਏ ਪ੍ਰਵਾਸੀ ਭਾਰਤੀ ਬਲਵਿੰਦਰ ਸਿੰਘ ਯੂ. ਕੇ ਤੇ ਪਿੰਡ ਵਾਸੀਆਂ ਨੇ ਦੁੱਖੀ ਮਨ ਨਾਲ ਪ੍ਰਗਟ ਕਰਦਿਆਂ ਪੱਤਰਕਾਰਾਂ ਨਾਲ ਸਾਂਝੇ ਕੀਤੇ | ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਅਸੀ ਆਪਣੀ ਜਨਮ ਭੂਮੀ ਨਾਲ ਪਿਆਰ ਕਰਕੇ ਪੰਜਾਬ 'ਚ ਘੁੰਮਣ ਆਉਦੇ ਹਾਂ ਪਰ ਪਿੰਡਾਂ ਦੀਆਂ ਸੜਕਾਂ ਦਾ ਬਹੁਤ ਮਾੜਾ ਹਾਲ ਹੈ | ਹਰ ਰੋਜ਼ ਸੜਕ ਦੁਰਘਟਨਾਵਾਂ ਵਾਪਰਦੀਆਂ ਹਨ | ਅਸੀਂ ਇੱਥੇ ਗੱਡੀ ਚਲਾਉਣ ਤੋਂ ਵੀ ਡਰਦੇ ਹਾਂ | ਸੜਕਾਂ ਟੁੱਟੀਆਂ ਹੋਣ ਕਰਕੇ ਪਿੰਡਾਂ ਦੇ ਵਿਕਾਸ ਦੀ ਫੂਕ ਨਿਕਲੀ ਪਈ ਹੈ | ਸਰਕਾਰ ਸੜਕਾਂ ਬਣਾਉਣ ਵੱਲ ਧਿਆਨ ਦੇਵੇ | ਇਸ ਮੌਕੇ ਸਰਪੰਚ ਪਰਮਜੀਤ ਕੌਰ, ਬਲਵਿੰਦਰ ਸਿੰਘ ਯੂ.ਕੇ, ਦੀਦਾਰ ਸਿੰਘ ਪੰਚ, ਸੁਰਜੀਤ ਸਿੰਘ ਪੰਚ, ਰਛਪਾਲ ਸਿੰਘ ਆਦਿ ਹਾਜ਼ਰ ਸਨ |
