ਪੋਜੇਵਾਲ ਸਰਾਂ, 25 ਮਈ (ਨਵਾਂਗਰਾਈਾ)-ਪਿੰਡ ਚਾਂਦਪੁਰ ਰੁੜਕੀ ਕਲਾਂ ਦੇ ਨੰਬਰਦਾਰ ਰੌਸ਼ਨ ਲਾਲ ਮੀਲੂ ਨੇ ਇਮਾਨਦਾਰੀ ਦੀ ਮਿਸਾਲ ਪੈਦਾ ਕੀਤੀ | ਬੀਤੇ ਦਿਨੀਂ ਨੰਬਰਦਾਰ ਰੌਸ਼ਨ ਲਾਲ ਮੀਲੂ ਨੂੰ ਇਕ ਪਰਸ ਲੱਭਿਆ, ਜਿਸ ਵਿਚ 3500 ਰੁਪਏ ਦੀ ਨਕਦ ਰਾਸ਼ੀ, 3 ਏ. ਟੀ. ਐਮ. ਕਾਰਡ, ਆਧਾਰ ਕਾਰਡ, ਪੈਨ ਕਾਰਡ ਤੇ ਹੋਰ ਕੁਝ ਜ਼ਰੂਰੀ ਦਸਤਾਵੇਜ਼ ਸਨ | ਇਸ ਸੰਬੰਧੀ ਰੋਸ਼ਨ ਲਾਲ ਮੀਲੂ ਨੇ ਇਸ ਪਰਸ ਦੇ ਅਸਲ ਮਾਲਕ ਸੁਰਿੰਦਰ ਪੁੱਤਰ ਉਦੇਵੀਰ ਉੱਤਰ ਪ੍ਰਦੇਸ਼ ਹਾਲ ਵਾਸੀ ਬਲਾਚੌਰ ਜੋ ਕਿ ਟਾਈਲਾਂ ਲਗਾਉਣ ਦਾ ਕੰਮ ਕਰਦਾ ਹੈ, ਦਾ ਪਤਾ ਲੱਭ ਕੇ ਇਹ ਪਰਸ ਪੰਚਾਇਤ ਦੀ ਮੌਜੂਦਗੀ ਵਿਚ ਉਸ ਵਿਅਕਤੀ ਨੂੰ ਸੌਂਪਿਆ | ਇਸ ਮੌਕੇ ਸੁਰਿੰਦਰ ਨੇ ਨੰਬਰਦਾਰ ਰੌਸ਼ਨ ਲਾਲ ਮੀਲੂ ਦਾ ਧੰਨਵਾਦ ਕਰਦੇ ਹੋਏ ਕਿਹਾ ਕਿ ਉਹ ਇਕ ਦਿਹਾੜੀਦਾਰ ਵਿਅਕਤੀ ਹੈ ਤੇ ਮੁਸ਼ਕਿਲ ਨਾਲ ਕਮਾਈ ਕਰਦਾ ਹੈ | ਇਸ ਮੌਕੇ ਸਰਪੰਚ ਜਤਿੰਦਰ ਸਿੰਘ ਜਿੰਦੂ, ਬਿੰਦਰ ਕੁਮਾਰ ਸਾਬਕਾ ਸਰਪੰਚ, ਰਵਿੰਦਰ ਸਿੰਘ ਪ੍ਰਧਾਨ ਗੁਰਦੁਆਰਾ ਕਮੇਟੀ, ਚਰਨਜੀਤ ਪੰਚ, ਪਰਮਜੀਤ ਪੰਚ, ਗੁਰਬਚਨ ਚਾਂਦਪੁਰੀ ਆਦਿ ਹਾਜ਼ਰ ਸਨ |
