ਬਟਾਲਾ, 23 ਫਰਵਰੀ (ਸਤਿੰਦਰ ਸਿੰਘ)-ਗੁੱਡਵਿਲ ਇੰਟਰਨੈਸ਼ਨਲ ਸਕੂਲ ਢਡਿਆਲਾ ਨੱਤ ਵਿਖੇ ਸਕੂਲ ਦੀ ਈਕੋ ਕਲੱਬ ਵਲੋਂ ਵਿਸ਼ਾਲ ਫੁੱਲਵਾੜੀ ਉਤਸਵ ਕਰਵਾਇਆ ਗਿਆ | ਇਸ ਮੌਕੇ ਨਰਸਰੀ ਤੋਂ ਨੌਵੀਂ ਜਮਾਤ ਦੇ 200 ਤੋਂ ਵੀ ਵੱਧ ਵਿਦਿਆਰਥੀਆਂ ਨੇ ਗਮਲੇ ਵਾਲੇ ਫੁੱਲਾਂ ਤੇ ਮੌਸਮੀ ਫੁੱਲਾਂ ਦੀਆਂ ਕਿਸਮਾਂ ਪ੍ਰਦਰਸ਼ਿਤ ਕੀਤੀਆਂ | ਇਸ ਪ੍ਰੋਗਰਾਮ ਦਾ ਮੁੱਢ ਉਦੇਸ਼ ਵਿਦਿਆਰਥੀਆਂ ਵਿਚ ਫੁੱਲਾਂ ਤੇ ਬੂਟਿਆਂ ਬਾਰੇ ਦਿਲਚਸਪੀ ਤੇ ਜਾਣਕਾਰੀ ਪੈਦਾ ਕਰਨਾ ਹੈ | ਇਸ ਮੌਕੇ ਚੇਅਰਮੈਨ ਗੁਰਦਿਆਲ ਸਿੰਘ ਨੇ ਦੱਸਿਆ ਕਿ ਸਾਡੇ ਜੀਵਨ 'ਚ ਫੁੱਲਾਂ ਦਾ ਅਹਿਮ ਰੋਲ ਹੈ | ਫੁੱਲਾਂ ਨੂੰ ਦੇਖ ਕੇ ਸਾਡੇ ਜੀਵਨ ਨੂੰ ਖੁਸ਼ੀ ਤੇ ਖੇੜਾ ਮਿਲਦਾ ਹੈ | ਉਨ੍ਹਾਂ ਨੇ ਭਾਈ ਵੀਰ ਸਿੰਘ ਦੀ ਕਵਿਤਾ ਦੀਆਂ ਸਤਰਾਂ ਵਿਦਿਆਰਥੀਆਂ ਨਾਲ ਸਾਂਝੀਆਂ ਕੀਤੀਆਂ | ਇਸ ਮੌਕੇ ਨਰਸਰੀ ਤੋਂ ਯੂ.ਕੇ.ਜੀ., ਪਹਿਲੀ ਤੋਂ 5ਵੀਂ ਅਤੇ 6ਵੇਂ ਤੋਂ ਨੌਵੀਂ ਤੱਕ ਦੇ ਵਿਦਿਆਰਥੀਆਂ ਨੇ ਭਾਗ ਲਿਆ | ਇਸ ਮੁਕਾਬਲੇ 'ਚ ਅਵੀਰਾਜ ਸਿੰਘ ਯੂ.ਕੇ.ਜੀ., ਰਿਆਨ ਸਿੰਘ ਨਰਸਰੀ ਬੀ, ਗੁਰਸੀਰਤ ਕੌਰ, ਐਲ.ਕੇ.ਜੀ. ਕ੍ਰਮਵਾਰ ਪਹਿਲੇ, ਦੂਜੇ ਤੇ ਤੀਜੇ ਸਥਾਨ 'ਤੇ ਰਹੇ | ਦੂਜੇ ਗਰੁੱਪ ਵਿਚ ਕਰਮਨਜੋਤ ਸਿੰਘ ਸਿੰਘ ਤੀਜੀ, ਦਮਨਪ੍ਰੀਤ ਕੌਰ ਚੌਥੀ ਤੇ ਮਨਸੀਰਤ ਕੌਰ ਪੰਜਵੀਂ ਜਮਾਤ ਪਹਿਲੇ, ਦੂਜੇ ਤੇ ਤੀਜੇ ਸਥਾਨ 'ਤੇ ਰਹੇ | ਤੀਜੇ ਗਰੁੱਪ 'ਚ ਨਿਮਰਤਪ੍ਰੀਤ ਕੌਰ ਸੱਤਵੀਂ, ਅਨੁਪ੍ਰੀਤ ਕੌਰ 8ਵੀਂ ਤੇ ਅਨਮੋਲ ਕੌਰ, ਗੁਰਸੀਰਤ ਕੌਰ 6ਵੀਂ ਕਲਾਸ ਕ੍ਰਮਵਾਰ ਪਹਿਲੇ, ਦੂਜੇ ਤੇ ਤੀਜੇ ਸਥਾਨ 'ਤੇ ਰਹੇ | ਇਸ ਮੇਲੇ 'ਚ ਅਧਿਆਪਕਾਂ ਨੇ ਵੀ ਵੱਖ-ਵੱਖ ਕਿਸਮਾਂ ਦੇ ਫੁੱਲ ਪ੍ਰਦਰਸ਼ਿਤ ਕੀਤੇ | ਡਾਇਰੈਕਟਰ-ਪਿ੍ੰਸੀਪਲ ਜਸਬਿੰਦਰ ਕੌਰ ਨੇ ਵਿਦਿਆਰਥੀਆਂ ਨੂੰ ਆਪਣੇ ਘਰ 'ਚ 'ਮਿੰਨੀ ਫੁੱਲਵਾੜੀ' ਵਿਕਸਿਤ ਕਰਨ ਲਈ ਪ੍ਰੇਰਿਤ ਕੀਤਾ | ਜੇਤੂਆਂ ਨੂੰ ਵਧਾਈ ਦਿੱਤੀ ਤੇ ਸਰਟੀਫਿਕੇਟ ਦੇ ਕੇ ਸਨਮਾਨਿਤ ਵੀ ਕੀਤਾ | ਇਸ ਮੌਕੇ ਈਕੋ ਕਲੱਬ ਦੇ ਇੰਚਾਰਜ ਅਧਿਆਪਕ ਅਕਾਸ਼ਪ੍ਰੀਤ ਸਿੰਘ ਤੇ ਸਮੂਹ ਅਧਿਆਪਕ ਵੀ ਹਾਜ਼ਰ ਸਨ |
