ਅੰਮ੍ਰਿਤਸਰ, 13 ਜੂਨ (ਰੇਸ਼ਮ ਸਿੰਘ)-ਨਿਊਜਲੈਂਡ ਤੋਂ ਪਰਤੀ ਇਕ �ਔਰਤ ਨੇ ਆਪਣੇ 5 ਸਾਲਾ ਮਾਸੂਮ ਬੱਚੇ ਦੇ ਅਗਵਾ ਹੋਣ ਦੇ ਮਾਮਲੇ ’ਚ ਆਪਣੀ ਪਤੀ ਖ਼ਿਲਾਫ਼ ਸ਼ਿਕਾਇਤ ਕੀਤੀ ਹੈ ਕਿ ਉਹ ਉਸ ਦੇ ਪੁੱਤਰ ਨੂੰ ਅਗਵਾ ਕਰਕੇ ਕਿਧਰੇ ਲੈ ਗਿਆ ਹੈ। ਪੁਲਿਸ ਵਲੋਂ ਮਾਮਲਾ ਦਰਜ ਕਰਕੇ ਲਾਪਤਾ ਹੋਏ ਬੱਚੇ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਸ੍ਰੀਮਤੀ ਰਮਨਪ੍ਰੀਤ ਕੌਰ ਵਾਸੀ ਨਿਊਜਲੈਂਡ ਹਾਲ ਭੋਗਪੁਰ ਜਲੰਧਰ ਨੇ ਦੱਸਿਆ ਕਿ ਉਸ ਦਾ ਵਿਆਹ 2019 ‘ਚ ਸੁਖਦੀਪ ਸਿੰਘ ਨਾਲ ਹੋਇਆ ਸੀ ਤੇ ਉਹ ਪਤੀ ਨਾਲ ਨਿਊਜਲੈਂਡ ’ਚ ਰਹਿੰਦੀ ਸੀ ਪਰ ਉਸ ਦੇ ਪਤੀ ਤੇ ਸਹੁਰੇ ਪਰਿਵਾਰ ਵਲੋਂ ਉਸ ਨੂੰ ਦਾਜ ਖਾਤਰ ਤੰਗ ਪ੍ਰੇਸ਼ਾਨ ਕੀਤਾ ਜਾਂਦਾ ਸੀ। ਉਸ ਦਾ ਇਕ ਬੱਚਾ ਸਾਹਿਬਜੋਤ ਸਿੰਘ ਹੈ ਜਿਸ ਦੀ ਉਮਰ 5 ਸਾਲ ਦੀ ਹੈ। ਉਹ ਆਪਣੇ ਪਤੀ ਨਾਲ 9 ਜੂਨ ਨੂੰ ਅੰਮ੍ਰਿਤਸਰ ਆਈ ਸੀ ਤੇ ਇਥੇ ਉਹ ਇਕ ਸਰਾਂ ’ਚ ਠਹਿਰੇ ਸਨ। ਉਸ ਦੇ ਪਤੀ ਨੇ ਉਸ ਨੂੰ ਕੋਈ ਨਸ਼ੀਲੀ ਚੀਜ ਦੇ ਕੇ ਬੇਹੋਸ਼ ਕਰ ਦਿੱਤਾ ਤੇ ਉਸਦੇ ਪੁੱਤਰ ਨੂੰ ਲੈ ਕੇ ਗਾਇਬ ਹੋ ਗਿਆ। ਉਸ ਦੇ ਪਰਸ ’ਚ 2 ਹਜ਼ਾਰ ਨਿਊਜਲੈਂਡ ਡਾਲਰ ਤੇ ਭਾਰਤੀ ਪਾਸਪੋਰਟ ਵੀ ਗਾਇਬ ਸੀ। ਪੁਲਿਸ ਵਲੋਂ ਪਰਚਾ ਦਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
