ਚੰਡੀਗੜ੍ਹ, 27 ਮਾਰਚ (ਮਾਰਕੰਡਾ)-ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦੇ ਕਨਵੈੱਨਸ਼ਨ ਸੈਂਟਰ ਵਿਖੇ ਡਿਗਰੀ ਐਵਾਰਡ ਸਮਾਰੋਹ 2026 ਮਨਾਇਆ, ਜਿਸ 'ਚ 804 ਯੂਨੀਵਰਸਿਟੀ ਇੰਸਟੀਚਿਊਟ ਆਫ਼ ਇੰਜੀਨੀਅਰਿੰਗ ਐਂਡ ਟੈਕਨਾਲੋਜੀ (ਯੂ. ਆਈ. ਈ. ਟੀ) ਦੇ ਇੰਜੀਨੀਅਰਿੰਗ ਗ੍ਰੈਜੂਏਟਾਂ ਨੂੰ ਡਿਗਰੀਆਂ ਦਿੱਤੀਆਂ ਗਈਆਂ | ਇਨ੍ਹਾਂ ਸਾਰੀਆਂ ਗ੍ਰੈਜੂਏਟਾਂ 'ਚੋਂ ਕੰਪਿਊਟਰ ਸਾਇੰਸ ਇੰਜੀਨੀਅਰਿੰਗ ਦੇ 185, ਸੂਚਨਾ ਤਕਨਾਲੋਜੀ ਦੇ 101, ਇਲੈਕਟ੍ਰਾਨਿਕਸ ਤੇ ਸੰਚਾਰ ਇੰਜੀਨੀਅਰਿੰਗ ਦੇ 190, ਮਕੈਨੀਕਲ ਇੰਜੀਨੀਅਰਿੰਗ ਦੇ 107, ਇਲੈਕਟ੍ਰੀਕਲ ਅਤੇ ਇਲੈਕਟ੍ਰਾਨਿਕਸ ਇੰਜੀਨੀਅਰਿੰਗ ਦੇ 147 ਅਤੇ ਬਾਇਓਟੈਕਨਾਲੋਜੀ ਦੇ 74 ਵਿਦਿਆਰਥੀ ਸ਼ਾਮਿਲ ਸਨ | ਇਸ ਸਮਾਗਮ ਦਾ ਇਕ ਮੁੱਖ ਆਕਰਸ਼ਣ ਨਮਨ ਅਗਰਵਾਲ, ਅਖਿਲ ਫਿਰਾਨੀ, ਵਿਕਰਮ ਸਿੰਘ ਬਾਜਵਾ, ਪ੍ਰੇਰਨਾ ਸਿੰਘ, ਧਰਮਪਾਲ ਚੌਧਰੀ ਸਮੇਤ ਹੋਰਾਂ ਸਮੇਤ ਉੱਘੇ ਸਾਬਕਾ ਵਿਦਿਆਰਥੀਆਂ ਦਾ ਸਨਮਾਨ ਸੀ, ਨਾਲ ਹੀ ਹੋਣਹਾਰ ਵਿਦਿਆਰਥੀਆਂ ਨੂੰ ਮੈਡਲ ਅਤੇ ਅਕਾਦਮਿਕ ਸਨਮਾਨ ਵੀ ਦਿੱਤੇ ਗਏ | ਸਮਾਰੋਹ 2024 ਅਤੇ 2025 ਦੇ ਗ੍ਰੈਜੂਏਟ ਬੈਚਾਂ ਨੂੰ ਰਸਮੀ ਤੌਰ 'ਤੇ ਡਿਗਰੀਆਂ ਪ੍ਰਦਾਨ ਕਰਨ ਨਾਲ ਸਮਾਪਤ ਹੋਇਆ | ਅਕਾਦਮਿਕ ਉੱਤਮਤਾ ਅਤੇ ਪੇਸ਼ੇਵਾਰ ਪ੍ਰਾਪਤੀਆਂ ਨੂੰ ਮਾਨਤਾ ਦੇਣ ਲਈ ਮੈਡਲ ਅਤੇ ਵਿਸ਼ੇਸ਼ ਸਾਬਕਾ ਵਿਦਿਆਰਥੀ ਪੁਰਸਕਾਰ ਵੀ ਪੇਸ਼ ਕੀਤੇ ਗਏ | ਨਵੇਂ ਕਾਰਜਸ਼ੀਲ ਸਥਾਨ 'ਤੇ ਆਪਣੇ ਪਹਿਲੇ ਵੱਡੇ ਅਕਾਦਮਿਕ ਸਮਾਗਮ ਦੀ ਸ਼ੁਰੂਆਤ ਕਰਦੇ ਹੋਏ, ਇਸ ਸਮਾਰੋਹ ਦੀ ਪ੍ਰਧਾਨਗੀ ਪੀ. ਯੂ. ਦੀ ਉਪ ਕੁਲਪਤੀ ਪ੍ਰੋ. ਰੇਨੂੰ ਨੇ ਕੀਤੀ | ਜਿਸ 'ਚ ਕੇਂਦਰੀ ਸਾਸ਼ਤ ਪ੍ਰਦੇਸ਼ ਦੇ ਮੁੱਖ ਸਕੱਤਰ ਐਚ. ਰਾਜੇਸ਼ ਪ੍ਰਸਾਦ ਆਈ. ਏ. ਐਸ. ਮੁੱਖ ਮਹਿਮਾਨ ਵਜੋਂ ਸ਼ਾਮਿਲ ਹੋਏ | ਇਸ ਤੋਂ ਪਹਿਲਾਂ ਡਿਗਰੀ ਪੁਰਸਕਾਰ ਸਮਾਰੋਹ ਦੀ ਸ਼ੁਰੂਆਤ ਪੀ. ਯੂ. ਦੇ ਡੀਨ ਪ੍ਰੋ. ਯੋਜਨਾ ਰਾਵਤ, ਪੀ. ਯੂ. ਰਜਿਸਟਰਾਰ ਪ੍ਰੋ. ਵਾਈ. ਪੀ. ਵਰਮਾ, ਕੰਟਰੋਲਰ ਆਫ਼ ਪ੍ਰੀਖਿਆ ਪ੍ਰੋ. ਜਗਤ ਭੂਸ਼ਣ ਤੇ ਡਾਇਰੈਕਟਰ ਯੂ. ਆਈ. ਈ. ਟੀ. ਪ੍ਰੋ. ਸੁਖਵਿੰਦਰ ਸਿੰਘ ਦੀ ਮੌਜੂਦਗੀ ਦੇਖੀ ਗਈ | ਪ੍ਰੋ. ਰੇਨੂੰ ਵਿਗ ਨੇ 2002 ਵਿਚ ਇਸਦੀ ਸਥਾਪਨਾ ਤੋਂ ਬਾਅਦ ਯੂ. ਆਈ. ਈ. ਟੀ ਦੇ ਵਿਕਾਸ 'ਤੇ ਚਾਨਣਾ ਪਾਇਆ | ਯੂ. ਆਈ. ਈ. ਟੀ ਦੇ ਡਾਇਰੈਕਟਰ ਪ੍ਰੋ. ਸੁਖਵਿੰਦਰ ਸਿੰਘ ਤੇ ਪੀ. ਯੂ. ਰਜਿਸਟਰਾਰ ਪ੍ਰੋ. ਵਾਈ. ਪੀ. ਵਰਮਾ ਨੇ ਵੀ ਭਾਸ਼ਨ ਦਿੱਤਾ | ਸਮਾਰੋਹ 'ਚ ਵਿਦਿਆਰਥੀਆਂ, ਫੈਕਲਟੀ ਮੈਂਬਰਾਂ ਤੇ ਮਾਪਿਆਂ ਦੀ ਭਾਗੀਦਾਰੀ ਦੇਖਣ ਨੂੰ ਮਿਲੀ |
