ਚੰਡੀਗੜ੍ਹ, 10 ਅਪ੍ਰੈਲ (ਸੁਖਵਿੰਦਰ ਸਿੰਘ ਸ਼ਾਨ)-ਕੇਂਦਰੀ ਰਿਜ਼ਰਵ ਪੁਲਿਸ ਫੋਰਸ (ਸੀ. ਆਰ. ਪੀ. ਐਫ.) ਵਲੋਂ 'ਸ਼ੌਰਿਆ ਦਿਵਸ' ਮਾਣ ਤੇ ਸਨਮਾਨ ਨਾਲ ਮਨਾਇਆ | ਇਸ ਸੰਬੰਧੀ ਫੋਰਸ ਦੇ ਉੱਤਰ ਪੱਛਮੀ ਖੇਤਰ ਕੈਂਪਸ ਹੱਲੋਮਾਜਰਾ (ਚੰਡੀਗੜ੍ਹ) ਵਿਖੇ ਇਕ ਸੈਨਿਕ ਸੰਮੇਲਨ ਕਰਵਾਇਆ, ਜਿਸ 'ਚ ਫੋਰਸ ਨੇ ਆਪਣੇ ਬਹਾਦਰ ਸੈਨਿਕਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ, ਜਿਨ੍ਹਾਂ ਨੇ 1965 ਦੀ ਜੰਗ ਦੌਰਾਨ ਗੁਜਰਾਤ ਦੇ ਰਣ ਕੱਛ ਵਿਚ ਸਰਦਾਰ ਪੋਸਟ 'ਤੇ ਅਦੁੱਤੀ ਹਿੰਮਤ, ਬਹਾਦਰੀ ਤੇ ਸਰਵਉੱਚ ਕੁਰਬਾਨੀ ਦਿੱਤੀ ਸੀ | ਸਮਾਗਮ ਦੌਰਾਨ ਫੋਰਸ ਦੇ ਇੰਸਪੈਕਟਰ ਜਨਰਲ ਆਫ਼ ਪੁਲਿਸ ਜੀ. ਐਸ. ਸੋਢੀ ਵਲੋਂ ਸੇਵਾਮੁਕਤ ਸਹਾਇਕ ਕਮਾਂਡੈਂਟ ਛਤਰਪਾਲ ਸਿੰਘ ਨੂੰ ਉਨ੍ਹਾਂ ਦੀਆਂ ਸ਼ਾਨਦਾਰ ਸੇਵਾਵਾਂ ਲਈ ਰਾਸ਼ਟਰਪਤੀ ਪੁਲਿਸ ਮੈਡਲ ਨਾਲ ਸਨਮਾਨਿਤ ਕੀਤਾ | ਇਹ ਵੱਕਾਰੀ ਪ੍ਰਾਪਤੀ ਨਾ ਸਿਰਫ਼ ਕੇਂਦਰੀ ਰਿਜ਼ਰਵ ਪੁਲਿਸ ਫੋਰਸ ਲਈ ਸਗੋਂ ਪੂਰੇ ਦੇਸ਼ ਲਈ ਮਾਣ, ਪ੍ਰੇਰਨਾ ਅਤੇ ਸਨਮਾਨ ਦਾ ਪ੍ਰਤੀਕ ਹੈ |
