ਡੇਰਾਬੱਸੀ, 25 ਮਈ (ਗੁਰਮੀਤ ਸਿੰਘ) - ਅੱਜ ਸਵੇਰ 8 ਵਜੇ ਤੋਂ ਲੈ ਕੇ ਸ਼ਾਮ ਦੇ 5 ਵਜੇ ਤੱਕ ਵੋਟਾਂ ਪੈਣਗੀਆਂ | ਡੇਰਾਬੱਸੀ ਨਗਰ ਕੌਂਸਲ 'ਚ ਕੁੱਲ 19 ਵਾਰਡ ਹਨ ਜਿਨਾਂ 'ਚੋਂ ਵਾ. ਨੰ. 19 ਦੀ ਚੋਣ ਪਹਿਲਾਂ ਹੀ ਆਮ ਆਦਮੀ ਪਾਰਟੀ ਦੀ ਉਮੀਦਵਾਰ ਜਿੱਤ ਚੁੱਕੀ ਹੈ ਕਿਉਂਕਿ ਉਸ ਦੇ ਵਿਰੋਧੀ ਉਮੀਦਵਾਰਾਂ ਦੇ ਨਾਮਜ਼ਦਗੀ ਪੱਤਰ ਰੱਦ ਹੋਣ ਕਾਰਨ ਉਹ ਇਕੱਲੀ ਮੈਦਾਨ 'ਚ ਰਹਿ ਗਈ ਸੀ | ਦੂਜੇ ਪਾਸੇ ਬਾਕੀ 18 ਵਾਰਡਾਂ ਲਈ ਕੁੱਲ 51 ਹਜ਼ਾਰ 457 ਵੋਟਰ ਕੌਂਸਲਰਾਂ ਦੀ ਕਿਸਮਤ ਦਾ ਫ਼ੈਸਲਾ ਕਰਨਗੇ | ਇਨਾਂ 'ਚ 26 ਹਜ਼ਾਰ 888 ਪੁਰਸ਼, 24,564 ਮਹਿਲਾਵਾਂ ਤੇ 5 ਹੋਰ ਵੋਟਰ ਸ਼ਾਮਿਲ ਹਨ | ਡੇਰਾਬੱਸੀ 'ਚ ਕੁੱਲ 18 ਵਾਰਡਾਂ ਲਈ 51 ਪੋਲਿੰਗ ਬੂਥ ਬਣਾਏ ਗਏ ਹਨ | ਇਨਾਂ 'ਚ ਦੋ ਅਤਿ-ਸੰਵੇਦਨਸ਼ੀਲ ਤੇ 15 ਸੰਵੇਦਨਸ਼ੀਲ ਬੂਥ ਸ਼ਾਮਿਲ ਹਨ | ਸਭ ਤੋਂ ਵੱਧ ਵਾ. ਨੰ. 5 ਦੇ ਪੰਜ ਬੂਥ ਬਣਾਏ ਗਏ ਹਨ | ਰਿਟਰਨਿੰਗ ਅਫ਼ਸਰ-ਕਮ-ਐੱਸ. ਡੀ. ਐੱਮ. ਡੇਰਾਬੱਸੀ ਅਮਿਤ ਗੁਪਤਾ ਨੇ ਦੱਸਿਆ ਕਿ ਸਾਰੇ ਬੂਥਾਂ 'ਚ ਚੋਣ ਪ੍ਰਕਿਰਿਆ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਨਿਗਰਾਨੀ ਹੇਠ ਨੇਪਰੇ ਚਾੜੀ ਜਾਵੇਗੀ | ਉਨਾਂ ਕਿਹਾ ਕਿ ਸੰਵੇਦਨਸ਼ੀਲ ਤੇ ਅਤਿ-ਸੰਵੇਦਨਸ਼ੀਲ ਬੂਥਾਂ 'ਤੇ ਸੁਰੱਖਿਆ ਦੇ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਹਨ | ਉਨਾਂ ਦੱਸਿਆ ਕਿ ਅਤਿ-ਸੰਵੇਦਨਸ਼ੀਲ ਬੂਥ ਵਾ. ਨੰ. 4 ਹੈ ਤੇ ਦੇਵੀਨਗਰ ਖੇਤਰ 'ਚ ਪੈਂਦੇ ਵਾ. ਨੰ. 10 ਤੇ 11 ਵੀ ਇਸ ਵਰਗ 'ਚ ਸ਼ਾਮਿਲ ਹਨ | ਇਸ ਵਾਰਡ ਦੀਆਂ ਵੋਟਾਂ ਪੀ. ਡਬਲਿਊ. ਡੀ. ਗੈਸਟ ਹਾਊਸ ਵਿਖੇ ਪੈਣਗੀਆਂ | ਇਸ ਤੋਂ ਇਲਾਵਾ ਸੰਵੇਦਨਸ਼ੀਲ ਬੂਥਾਂ 'ਚ ਵਾਰਡ ਨੰ. 1 ਦੇ ਦੋਵੇਂ ਬੂਥ ਜਿਸ ਦੀਆਂ ਵੋਟਾਂ ਰਵਿਦਾਸ ਭਵਨ ਡੇਰਾਬੱਸੀ ਵਿਖੇ, ਵਾਰਡ ਨੰ. 8 ਦੇ ਦੋਵੇਂ ਬੂਥ ਜਿਨਾਂ ਦੀਆਂ ਵੋਟਾਂ ਸਰਕਾਰੀ ਐਲੀਮੈਂਟਰੀ ਸਕੂਲ ਪਿੰਡ ਸੈਦਪੁਰਾ, ਵਾਰਡ ਨੰ. 11 ਦੇ ਤਿੰਨ ਬੂਥ ਜਿਨਾਂ ਦੀਆਂ ਵੋਟਾਂ ਪਿੰਡ ਦੇਵੀਨਗਰ ਦੇ ਸਰਕਾਰੀ ਐਲੀਮੈਂਟਰੀ ਸਕੂਲ ਵਿਖੇ, ਵਾਰਡ ਨੰ. 13 ਦੇ ਤਿੰਨ ਬੂਥ ਜਿਨਾਂ ਦੀਆਂ ਵੋਟਾਂ ਬੀ. ਡੀ. ਪੀ. ਓ. ਦਫ਼ਤਰ ਡੇਰਾਬੱਸੀ, ਵਾਰਡ ਨੰ. 16 ਦੇ ਦੋਵੇਂ ਬੂਥ ਜਿਨਾਂ ਦੀਆਂ ਵੋਟਾਂ ਭਾਰਤੀ ਪਬਲਿਕ ਸਕੂਲ ਡੇਰਾਬੱਸੀ ਤੇ ਵਾਰਡ ਨੰ. 18 ਦੇ ਤਿੰਨ ਬੂਥ, ਜਿਨਾਂ ਦੀਆਂ ਵੋਟਾਂ ਪਿੰਡ ਮਹਿਮਦਪੁਰ ਦੇ ਸਰਕਾਰੀ ਐਲੀਮੈਂਟਰੀ ਸਕੂਲ ਵਿਖੇ ਪੈਣਗੀਆਂ ਆਦਿ ਸ਼ਾਮਿਲ ਹਨ |
