ਕਿਸੇ ਵੀ ਰਾਜਨੀਤਿਕ ਪਾਰਟੀ ਨੂੰ ਨਹੀਂ ਮਿਲਿਆ ਨਗਰ ਕੌਂਸਲ ਨੰਗਲ ਦੀਆਂ ਚੋਣਾਂ 'ਚ ਸਪੱਸ਼ਟ ਬਹੁਮਤ <br/>
ਅਜੀਤ ਡੈਸਕ
01-06-2026
ਨਗਰ ਕੌਂਸਲ ਨੰਗਲ ਦੇ ਬੀਤੇ ਦਿਨੀਂ ਆਏ ਚੋਣ ਨਤੀਜਿਆਂ ਵਿਚ ਸਪਸ਼ਟ ਬਹੁਮਤ ਦੋਵੇਂ ਸਿਆਸੀ ਧਿਰਾਂ ਨੂੰ ਨਾ ਮਿਲਣ ਮਗਰੋਂ ਹੁਣ ਸਭ ਦੀਆਂ ਨਿਗਾਹਾਂ ਭਾਜਪਾ ਤੇ ਇੱਕ ਆਜ਼ਾਦ ਉਮੀਦਵਾਰ ਵੱਲ ਨੂੰ ਟਿਕੀਆਂ ਹੋਈਆਂ ਹਨ ਕਿਉਂਕਿ ਭਾਜਪਾ ਦੇ ਤਿੰਨ ਉਮੀਦਵਾਰ ਜਿੱਤੇ ਹੋਏ ਹਨ ਜਦੋਂ ਕਿ ਇੱਕ ਆਜ਼ਾਦ ਉਮੀਦਵਾਰ ਹੈ | ਆਮ ਆਦਮੀ ਪਾਰਟੀ ਕੋਲ ਸੱਤ ਸੀਟਾਂ ਦੇ ਨਾਲ ਇੱਕ ਵੋਟ ਹਲਕਾ ਵਿਧਾਇਕ ਹਰਜੋਤ ਸਿੰਘ ਬੈਂਸ ਦੀ ਵੀ ਹੈ ਤੇ ਉਨ੍ਹਾਂ ਵੱਲੋਂ ਨਗਰ ਕੌਂਸਲ ਬਣਾਉਣ ਦਾ ਦਾਅਵਾ ਵੀ ਕੀਤਾ ਜਾ ਚੁੱਕਾ ਹੈ |
ਦੱਸਣਯੋਗ ਹੈ ਕਿ ਉਹ ਖ਼ੁਦ ਸਥਾਨਕ ਸਰਕਾਰਾਂ ਬਾਰੇ ਦੇ ਵਿਭਾਗ ਦੇ ਮੰਤਰੀ ਵੀ ਹਨ | ਦੂਜੇ ਪਾਸੇ ਅੱਤ ਭਰੋਸੇਯੋਗ ਵਸੀਲਿਆਂ ਤੋਂ ਪਤਾ ਚੱਲਿਆ ਹੈ ਕਿ ਬੀਤੇ ਕੱਲ੍ਹ ਭਾਜਪਾ ਵੱਲੋਂ ਚੋਣ ਲੜਨ ਵਾਲੇ ਸਮੁੱਚੇ ਉਮੀਦਵਾਰਾਂ ਲਈ ਦੁਪਹਿਰ ਦਾ ਖਾਣਾ ਵੀ ਕਿਸੇ ਬਹੁ ਚਰਚਿਤ ਢਾਬੇ 'ਤੇ ਰੱਖਿਆ ਗਿਆ ਪਰ ਉੱਥੇ ਭਾਜਪਾ ਟਿਕਟ ਤੋਂ ਚੋਣ ਜਿੱਤੇ ਦੋ ਉਮੀਦਵਾਰ ਗੈਰ-ਹਾਜ਼ਰ ਰਹੇ | ਸੂਤਰਾਂ ਤੋਂ ਪਤਾ ਚੱਲਿਆ ਹੈ ਕਿ ਭਾਜਪਾ ਦੇ ਜਿੱਤੇ ਹੋਏ ਤਿੰਨੋ ਕੌਂਸਲਰਾਂ ਦਾ ਸੰਬੰਧ ਸਿੱਧੇ ਤੌਰ 'ਤੇ ਦੋ ਵੱਖ-ਵੱਖ ਆਗੂਆਂ ਨਾਲ ਹੈ ਜਿਸ ਨੂੰ ਲੈ ਕੇ ਸਿਆਸੀ ਗਲਿਆਰਿਆਂ ਵਿਚ ਚਰਚਾਵਾਂ ਛਿੜ ਗਈਆਂ ਹਨ | ਪਿਛਲੇ ਪੰਜ ਸਾਲ ਨਗਰ ਕੌਂਸਲ 'ਤੇ ਕਾਬਜ਼ ਰਹੀ ਕਾਂਗਰਸ ਪਾਰਟੀ ਵੱਲੋਂ ਬੇਸ਼ੱਕ ਸਭ ਤੋਂ ਜ਼ਿਆਦਾ ਸੀਟਾਂ ਲਈਆਂ ਹਨ ਪਰ ਕੌਂਸਲ ਬਣਾਉਣ ਬਾਰੇ ਫ਼ਿਲਹਾਲ ਅਧਿਕਾਰਕ ਤੌਰ 'ਤੇ ਕਿਸੇ ਤਰ੍ਹਾਂ ਦਾ ਕੋਈ ਵੀ ਬਿਆਨ ਸਾਹਮਣੇ ਨਹੀਂ ਆਇਆ | ਨਗਰ ਕੌਂਸਲ ਨੰਗਲ ਦੀ ਪ੍ਰਧਾਨਗੀ ਦਾ ਤਾਜ ਕਿਹੜੀ ਸਿਆਸੀ ਧਿਰ ਦੇ ਕਿਸ ਆਗੂ ਦੇ ਸਿਰ 'ਤੇ ਸਜੇਗਾ ਇਹ ਤਾਂ ਹੁਣ ਆਉਣ ਵਾਲਾ ਸਮਾਂ ਹੀ ਦੱਸੇਗਾ |
ਵੱਖ-ਵੱਖ ਵਾਰਡਾਂ ਤੋਂ ਜੇਤੂ
ਰਹੇ ਉਮੀਦਵਾਰਾਂ ਦਾ ਵੇਰਵਾ
ਵਾਰਡ ਨੰਬਰ ਇੱਕ ਤੋਂ ਜੇਤੂ ਲਖਵੀਰ ਸਿੰਘ ਲੱਕੀ ਕਾਂਗਰਸ, ਵਾਰਡ ਨੰਬਰ 2 ਤੋਂ ਸਨੇਹਾ ਸਾਹਨੀ ਕਾਂਗਰਸ, ਵਾਰਡ ਨੰਬਰ 3 ਤੋਂ ਮਨਜੋਤ ਸਿੰਘ ਰਾਣਾ 'ਆਪ', ਵਾਰਡ ਨੰਬਰ 4 ਤੋਂ ਆਪ ਉਮੀਦਵਾਰ ਜਸਪ੍ਰੀਤ ਕੌਰ, ਵਾਰਡ ਨੰਬਰ 5 ਤੋਂ ਰਣਜੀਤ ਸਿੰਘ ਲੱਕੀ ਬੀਜੇਪੀ, ਵਾਰਡ ਨੰਬਰ 6 ਤੋਂ ਜੇਤੂ ਵੰਦਨਾ ਰਾਣੀ ਕਾਂਗਰਸ, ਵਾਰਡ ਨੰਬਰ 7 ਤੋਂ ਕਾਂਗਰਸ ਦੀ ਸੋਨੀਆ ਸੈਣੀ, ਵਾਰਡ ਨੰਬਰ 8 ਤੋਂ ਆਪ ਦੀ ਕਮਲਾ ਦੇਵੀ, ਵਾਰਡ ਨੂੰ 9 ਤੋਂ ਕਾਂਗਰਸ ਦੀ ਇੰਦੂ ਬਾਲਾ, ਵਾਰਡ 10 ਤੋਂ ਭਾਜਪਾ ਦੀ ਮਮਤਾ, ਵਾਰਡ ਨੰਬਰ 11 ਤੋਂ ਆਪ ਦੇ ਰਾਜੇਸ਼ ਕੁਮਾਰ, ਵਾਰਡ ਨੰਬਰ 12 ਤੋਂ ਆਪ ਕੋਸ਼ਿਸ਼ ਵਰਮਾ, ਵਾਰਡ ਨੰਬਰ 13 ਤੋਂ ਆਪ ਦੇ ਹਰਦੀਪ ਸਿੰਘ, ਵਾਰਡ ਨੰਬਰ 14 ਤੋਂ ਸੁਰਿੰਦਰ ਕੌਰ ਕਾਂਗਰਸ, ਵਾਰਡ ਨੰਬਰ 15 ਤੋਂ ਭਾਜਪਾ ਦੇ ਡਾ.ਰਜਿੰਦਰ ਕੁਮਾਰ, ਵਾਰਡ ਨੰਬਰ 16 ਤੋਂ ਆਮ ਆਦਮੀ ਪਾਰਟੀ ਦੀ ਕਿਰਨ ਬਾਲਾ, ਵਾਰਡ ਨੰਬਰ 17 ਤੋਂ ਆਜ਼ਾਦ ਉਮੀਦਵਾਰ ਰਾਮੇਸ਼ ਕੁਮਾਰ, ਵਾਰਡ ਨੰਬਰ 18 ਤੋਂ ਕਾਂਗਰਸ ਦੇ ਉਮੀਦਵਾਰ ਸਪਨਾ ਨੰਦਾ ਅਤੇ ਵਾਰਡ ਨੰਬਰ 19 ਤੋਂ ਕਾਂਗਰਸ ਦੀ ਉਮੀਦਵਾਰ ਅਨੀਤਾ ਸ਼ਰਮਾ ਜੇਤੂ ਰਹੀ |
