ਪਟਿਆਲਾ, 30 ਜੁਲਾਈ (ਭਗਵਾਨ ਦਾਸ)- ਇੱਥੇ ਐਗਰੋ ਕੈਮੀਕਲਜ਼ ਫੈਡਰੇਸ਼ਨ ਆਫ਼ ਇੰਡੀਆ ਦੇ ਡਾ. ਕਲਿਆਣ ਗੋਸਵਾਮੀ ਡਾਇਰੈਕਟਰ ਜਨਰਲ ਦੀ ਪ੍ਰਧਾਨਗੀ ’ਚ ਹੋਈ ਮੀਟਿੰਗ ਵਿਚ ਪੰਜਾਬ ਐਗਰੋ ਇੰਨਪੁਟਸ ਡੀਲਰਜ਼ ਐਸੋਸੀਏਸ਼ਨ ਦੇ 50 ਦੇ ਕਰੀਬ ਮੈਂਬਰਾਂ ਨੇ ਭਾਗ ਲੈਂਦਿਆਂ ਮੰਗ ਕੀਤੀ ਕਿ ਖੇਤੀਬਾੜੀ ਤੇ ਕਿਸਾਨ ਭਲਾਈ ਵਿਭਾਗ ਦੇ ਮੰਤਰਾਲਿਆ ਨੂੰ ਖੇਤੀ ਸਮੱਗਰੀ ਦੇ ਨਮੁਨੇ ਲੈਣ ਸੰਬੰਧੀ ਬਣਾਏ ਨਿਯਮਾਂ ’ਚ ਸੋਧ ਕੀਤੀ ਜਾਵੇ ਕਿ ਜਦੋਂ ਕਿਸੇ ਡੀਲਰ ਕੋਲ ਲਾਈਸੈਂਸ, ਵਿਕਰੇਤਾਵਾਂ ਦਾ ਪੱਕਾ ਬਿੱਲ ਸਮੇਤ ਬੈਚ ਨੰਬਰ ਆਦਿ ਨਾਲ ਹੋਵੇ ਤਾਂ ਉਸ ਨੂੰ ਕਾਨੂੰਨੀ ਤੌਰ ਤੇ ਉਸ ਨਾਲ ਚਲਾਏ ਜਾਣ ਵਾਲੇ ਕੇਸ ਦੀਆਂ ਉਲਝਣਾਂ ਤੋਂ ਮੁਕਤ ਕੀਤਾ ਜਾਵੇ। ਡਾ. ਦਾਰਾ ਸਿੰਘ ਮੁੱਖ ਖੇਤੀਬਾੜੀ ਅਫ਼ਸਰ ਪਟਿਆਲਾ ਜੋ ਮੁੱਖ ਮਹਿਮਾਨ ਸਨ ਡਾ. ਅਮਨ ਸੰਧੂ ਖੇਤੀ ਵਿਕਾਸ ਅਫ਼ਸਰ ਅਤੇ ਡਾ. ਰਸ਼ਪਿੰਦਰ ਬਿਲਿੰਗ ਖੇਤੀ ਵਿਕਾਸ ਅਫ਼ਸਰ ਸਣੇ ਮੀਟਿੰਗ ’ਚ ਹਾਜ਼ਰ ਸਨ। ਇਸ ਤੋਂ ਇਲਾਵਾ ਪੰਜਾਬ ਐਗਰੋ ਇਨਪੁਟਸ ਡੀਲਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ ਬਰਿੰਦਰ ਸਿੰਘ ਕਪੂਰ, ਗੋਕੁਲ ਪ੍ਰਕਾਸ਼ ਗੁਪਤਾ ਜਨਰਲ ਸਕੱਤਰ ਅਤੇ ਧਰਮ ਬਾਂਸਲ ਮੀਤ ਪ੍ਰਧਾਨ ਵੀ ਹਾਜ਼ਰ ਸਨ। ਮੀਟਿੰਗ ਵਿਚ ਬੁਲਾਰਿਆਂ ਨੇ ਖੇਤੀ ਸਮੱਗਰੀ ਦੀ ਵਰਤੋਂ ਸੰਬੰਧੀ ਜਾਣਕਾਰੀ ਦਿੱਤੀ। ਸਿਮਰਪ੍ਰੀਤ ਕੌਰ ਨੇ ਵੀ ਮੀਟਿੰਗ ਨੂੰ ਸੰਬੋਧਨ ਕੀਤਾ। ਡਾ. ਗੋਸਵਾਮੀ ਨੇ ਡੀਲਰਾਂ ਦੀ ਪ੍ਰਸੰਸ਼ਾ ਕਰਦੇ ਹੋਏ ਕਿਹਾ ਕਿ ਉਹ ਕਿਸਾਨਾਂ ਨੂੰ ਸਹੀ ਤੇ ਪੂਰੀ ਸਲਾਹ ਦਿੰਦੇ ਹਨ। ਐਸੋਸੀਏਸ਼ਨ ਦੀ ਮੀਟਿੰਗ ਵਿਚ ਡੀਲਰਾਂ ਵਲੋਂ ਡਾ. ਕਲਿਆਣ ਗੋਸਵਾਮੀ ਨੂੰ ਸਨਮਾਨਿਤ ਕੀਤਾ ਗਿਆ।
