ਲੁਧਿਆਣਾ, 24 ਜਨਵਰੀ (ਪਰਮਿੰਦਰ ਸਿੰਘ ਆਹੂਜਾ)-ਲੁਧਿਆਣਾ ਵਿਚ ਐਮ. ਬੀ. ਏ. ਦੇ ਵਿਦਿਆਰਥੀ ਦੀ ਉਸ ਦੇ ਦੋਸਤ ਵਲੋਂ ਹੀ ਹੱਤਿਆ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਪੁਲਿਸ ਵਲੋਂ ਮਿ੍ਤਕ ਰਾਜਵੀਰ ਸਿੰਘ (24) ਦੇ ਪਿਤਾ ਜਸਵੀਰ ਸਿੰਘ ਪੁੱਤਰ ਕੁਲਦੀਪ ਸਿੰਘ ਵਾਸੀ ਜਗਜੀਤ ਨਗਰ ਦੀ ਸ਼ਿਕਾਇਤ 'ਤੇ ਰਾਜਵੀਰ ਦੇ ਦੋਸਤ ਜੁਗਾਦ ਸਿੰਘ ਸੇਖੋਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਗਿਆ ਹੈ | ਜਸਵੀਰ ਸਿੰਘ ਨੇ ਦੱਸਿਆ ਕਿ ਕਥਿਤ ਦੋਸ਼ੀ ਜੁਗਾਦ ਸਿੰਘ ਸੇਖੋਂ ਉਸ ਦੇ ਲੜਕੇ ਰਾਜਵੀਰ ਸਿੰਘ ਦਾ ਦੋਸਤ ਹੈ ਅਤੇ ਬੀਤੇ ਦਿਨ ਉਸ ਦਾ ਲੜਕਾ ਜੁਗਾਦ ਸਿੰਘ ਸੇਖੋਂ ਨਾਲ ਗਿਆ ਸੀ | ਬਾਅਦ ਵਿਚ ਉਨ੍ਹਾਂ ਨੂੰ ਹਸਪਤਾਲ ਤੋਂ ਫ਼ੋਨ ਆਇਆ ਕਿ ਰਾਜਵੀਰ ਦੀ ਗੋਲੀ ਲੱਗਣ ਕਾਰਨ ਮÏਤ ਹੋ ਗਈ ਹੈ | ਉਨ੍ਹਾਂ ਦੱਸਿਆ ਕਿ ਕਥਿਤ ਦੋਸ਼ੀ ਜੁਗਾਦ ਸਿੰਘ ਸੇਖੋਂ ਸ਼ੂਟਰ ਹੈ ਅਤੇ ਉਲੰਪੀਅਨ ਖਿਡਾਰੀ ਹੈ | ਉਹ ਅਕਸਰ ਬਾਰਨਹਾੜਾ ਦੇ ਇਲਾਕੇ ਵਿਚ ਸ਼ੂਟਿੰਗ ਕਰਦਾ ਰਹਿੰਦਾ ਹੈ | ਏ.ਸੀ.ਪੀ. ਜਤਿੰਦਰ ਪਾਲ ਸਿੰਘ ਨੇ ਦੱਸਿਆ ਕਿ ਕਥਿਤ ਦੋਸ਼ੀ ਅਜੇ ਫ਼ਰਾਰ ਹੈ | ਉਨ੍ਹਾਂ ਦੱਸਿਆ ਕਿ ਕਾਰਾਂ ਦੀ ਖ਼ਰੀਦੋ-ਫ਼ਰੋਖ਼ਤ ਦਾ ਕਾਰੋਬਾਰ ਕਰਨ ਵਾਲੇ ਜਸਵੀਰ ਸਿੰਘ ਦਾ ਅਤੇ ਰਾਜਵੀਰ ਸਿੰਘ ਇਕਲੌਤਾ ਪੁੱਤਰ ਸੀ ਅਤੇ ਪੰਜਾਬ ਯੂਨੀਵਰਸਿਟੀ ਤੋਂ ਐਮ.ਬੀ.ਏ. ਦੀ ਪੜ੍ਹਾਈ ਕਰ ਰਿਹਾ ਸੀ | ਕਥਿਤ ਦੋਸ਼ੀ ਜੁਗਾਦ ਸਿੰਘ ਸੇਖੋਂ ਵੀ ਰਾਜਵੀਰ ਦੇ ਨਾਲ ਹੀ ਪੜ੍ਹਦਾ ਸੀ |
