ਰਾਸ਼ਟਰਪਤੀ ਭਵਨ 'ਚ ਲੁਟੀਅਨ ਦੀ ਥਾਂ 'ਤੇ ਲਗਾਇਆ 'ਰਾਜਾ ਜੀ' ਦਾ ਬੁੱਤ

ਨਵੀਂ ਦਿੱਲੀ, 23 ਫਰਵਰੀ (ਉਪਮਾ ਡਾਗਾ ਪਾਰਥ)-ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਨੇ ਸੋਮਵਾਰ ਨੂੰ ਰਾਸ਼ਟਰਪਤੀ ਭਵਨ ਸੱਭਿਆਚਾਰਕ ਕੇਂਦਰ 'ਚ ਭਾਰਤ ਦੇ ਪਹਿਲੇ ਗਵਰਨਰ ਜਨਰਲ ਰਾਜਗੋਪਾਲਾਚਾਰੀ ਦੇ ਬੁੱਤ ਦਾ ਉਦਘਾਟਨ ਕੀਤਾ | ਰਾਸ਼ਟਰਪਤੀ ਨੇ ਸੋਸ਼ਲ ਮੀਡੀਆ ਮੰਚ 'ਐਕਸ' 'ਤੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਇਹ ਬੁੱਤ ਅਸ਼ੋਕ ਮੰਡਪ ਦੇ ਕੋਲ ਬਣੀਆਂ ਵੱਡੀਆਂ ਪੌੜੀਆਂ 'ਤੇ ਲਗਾਇਆ ਗਿਆ ਹੈ | ਇਹ ਬੁੱਤ ਉਥੇ ਪਹਿਲਾਂ ਤੋਂ ਲੱਗੇ ਐਡਵਰਡ ਲੁਟੀਅਨ ਦੇ ਬੁੱਤ ਦੀ ਥਾਂ 'ਤੇ ਲਗਾਇਆ ਗਿਆ ਹੈ | ਰਾਸ਼ਟਰਪਤੀ ਨੇ ਕਿਹਾ ਕਿ ਇਹ ਬਦਲਾਅ ਗ਼ੁਲਾਮੀ ਦੀ ਸੋਚ ਨੂੰ ਪਿੱਛੇ ਛੱਡਣ ਦੀ ਇਕ ਕੋਸ਼ਿਸ਼ ਹੈ, ਇਹ ਭਾਰਤ ਦੇ ਸੱਭਿਆਚਾਰ, ਵਿਰਾਸਤ ਅਤੇ ਪਰੰਪਰਾਵਾਂ ਨੂੰ ਫਖ਼ਰ ਦੇ ਨਾਲ ਅਪਣਾਉਣ ਦਾ ਤਰੀਕਾ ਹੈ | ਨਾਲ ਹੀ ਇਹ ਉਨ੍ਹਾਂ ਮਹਾਨ ਲੋਕਾਂ ਨੂੰ ਸਨਮਾਨ ਦੇਣ ਦੀ ਕੋਸ਼ਿਸ਼ ਹੈ ਜਿਨ੍ਹਾਂ ਨੇ ਆਪਣੇ ਬੇਮਿਸਾਲ ਯੋਗਦਾਨ ਨਾਲ ਭਾਰਤ ਮਾਤਾ ਦੀ ਸੇਵਾ ਕੀਤੀ |