ਨਵੀਂ ਦਿੱਲੀ, 11 ਮਾਰਚ (ਉਪਮਾ ਡਾਗਾ ਪਾਰਥ)-ਲੋਕ ਸਭਾ 'ਚ ਕਾਂਗਰਸ ਦੇ ਉਪ ਨੇਤਾ ਗੌਰਵ ਗੋਗੋਈ ਨੇ ਹੇਠਲੇ ਸਦਨ 'ਚ ਡਿਪਟੀ ਸਪੀਕਰ ਦੀ ਚੋਣ ਨਾ ਕਰਨ ਨੂੰ ਸਰਕਾਰ ਦੀ ਨਾਕਾਮੀ ਦੱਸਦਿਆਂ ਕਿਹਾ ਕਿ ਇਸ ਨਾਲ ਸੰਵਿਧਾਨਕ ਖਲਾਅ ਪੈਦਾ ਹੋ ਗਿਆ ਹੈ | ਗੋਗੋਈ ਨੇ ਕਿਹਾ ਕਿ ਇਕ ਪੈਨਲ ਚੇਅਰਪਰਸਨ ਜਿਸ ਦੀ ਚੋਣ ਉਸੇ ਸਪੀਕਰ ਵਲੋਂ ਕੀਤੀ ਗਈ ਹੋਵੇ ਜਿਨ੍ਹਾਂ ਦੇ ਖ਼ਿਲਾਫ਼ ਬੇਭਰੋਸਗੀ ਮਤਾ ਪੇਸ਼ ਕੀਤਾ ਗਿਆ ਹੋਵੇ, ਨੂੰ ਸਦਨ ਚਲਾਉਣ ਦੇਣਾ ਹੀ ਸੰਵਿਧਾਨ ਦੀ ਧਾਰਾ 96 ਦਾ ਮੰਤਵ ਹੀ ਖਤਮ ਕਰ ਦਿੰਦਾ ਹੈ | ਕਾਂਗਰਸ ਨੇਤਾ ਨੇ ਕਿਹਾ ਕਿ ਧਾਰਾ 96 ਹੀ ਸਪੀਕਰ ਨੂੰ ਬੇਭਰੋਸਗੀ ਮਤਾ ਲਿਆਉਣ ਦੌਰਾਨ ਸਦਨ ਦੀ ਪ੍ਰਧਾਨਗੀ ਕਰਨ ਤੋਂ ਵਰਜਦੀ ਹੈ ਤਾਂ ਜੋ ਨਿਰਪੱਖਤਾ ਕਾਇਮ ਰਹਿ ਸਕੇ | ਕਾਂਗਰਸੀ ਸੰਸਦ ਮੈਂਬਰ ਨੇ ਸੋਸ਼ਲ ਮੀਡੀਆ ਮੰਚ 'ਐਕਸ' 'ਚ ਪਾਏ ਸੰਦੇਸ਼ 'ਚ ਕਿਹਾ ਕਿ ਧਾਰਾ 93 ਸੰਵਿਧਾਨ ਨੂੰ ਦੇ ਪ੍ਰੈਜ਼ੀਡਿੰਗ ਅਥਾਰਿਟੀ ਦਾ ਅਧਿਕਾਰ ਦਿੰਦਾ ਹੈ ਜਿਸ 'ਚ ਸਪੀਕਰ ਅਤੇ ਸਦਨ ਵਲੋਂ ਚੁਣੇ ਗਏ ਡਿਪਟੀ ਸਪੀਕਰ ਸ਼ਾਮਿਲ ਹਨ | ਗੌਰਵ ਗੋਗੋਈ ਨੇ ਕਿਹਾ ਕਿ ਡਿਪਟੀ ਸਪੀਕਰ ਦੀ ਚੋਣ ਕਰਨ 'ਚ ਨਾਕਾਮ ਰਹੀ ਸਰਕਾਰ ਨੇ ਇਕ ਸੰਵਿਧਾਨਕ ਖਲਾਅ ਪੈਦਾ ਕਰ ਦਿੱਤਾ ਹੈ, ਉਨ੍ਹਾਂ ਕਿਹਾ ਕਿ ਜੇਕਰ ਇਕ ਜੱਜ ਆਪਣੇ ਮਾਮਲੇ 'ਚ ਆਪਣੀ ਪੈਰਵੀ ਨਹੀਂ ਕਰ ਸਕਦਾ ਤਾਂ ਉਹ ਆਪਣੇ ਮਾਮਲੇ ਦੀ ਪੈਰਵੀ ਕਰਨ ਲਈ ਕਿਸੇ ਜੱਜ ਨੂੰ ਆਪ ਹੀ ਨਾਮਜ਼ਦ ਨਹੀਂ ਕਰ ਸਕਦਾ |