ਸਮੁੰਦੜਾ (ਨਵਾਂਸ਼ਹਿਰ), 3 ਅਪ੍ਰੈਲ (ਤੀਰਥ ਸਿੰਘ ਰੱਕੜ)-ਅਸਮਾਨੀ ਬਿਜਲੀ ਪੈਣ ਨਾਲ ਪਿੰਡ ਰਸੂਲਪੁਰ ਦੇ ਇਕ 15 ਸਾਲਾ ਨੌਜਵਾਨ ਦੀ ਮੌਤ ਹੋਣ ਅਤੇ ਦੋ ਹੋਰਾਂ ਦੇ ਗੰਭੀਰ ਜ਼ਖਮੀ ਹੋਣ ਦੀ ਖਬਰ ਹੈ | ਜਾਣਕਾਰੀ ਅਨੁਸਾਰ ਪਿੰਡ ਰਸੂਲਪੁਰ ਦੇ 10 -11 ਨੌਜਵਾਨ ਛੁੱਟੀ ਹੋਣ ਕਰਕੇ ਨਾਲ ਲਗਦੇ ਪਿੰਡ ਬਕਾਪੁਰ ਗੁਰੂ ਦੀ ਗਰਾਊਾਡ 'ਚ ਕਿ੍ਕਟ ਖੇਡ ਰਹੇ ਸਨ | ਅਚਾਨਕ ਕਰੀਬ 11.15 ਵਜੇ ਪਈ ਅਸਮਾਨੀ ਬਿਜਲੀ ਨਾਲ ਤਰਨਵੀਰ ਸਿੰਘ ਪੁੱਤਰ ਉਂਕਾਰ ਰਾਮ ਵਾਸੀ ਰਸੂਲਪੁਰ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ ਅਤੇ ਉਸ ਨਾਲ ਖੇਡਦੇ ਜਸਪ੍ਰੀਤ ਸਿੰਘ ਅਤੇ ਅੰਸ਼ ਲੋਈ ਵੀ ਗੰਭੀਰ ਜ਼ਖਮੀ ਹੋ ਗਏ | ਜ਼ਖਮੀ ਨੌਜਵਾਨਾਂ ਨੂੰ ਨਵਾਂਸ਼ਹਿਰ ਦੇ ਇਕ ਨਿੱਜੀ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਹੈ | ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਤਰਨਵੀਰ ਸਿੰਘ 6 ਫੁੱਟ ਲੰਮਾ ਨੌਜਵਾਨ ਸੀ ਅਤੇ ਉਸ ਦਾ ਪਿਤਾ ਕਿਸੇ ਨਿੱਜੀ ਕੰਪਨੀ ਦੀ ਗੱਡੀ ਚਲਾ ਕੇ ਆਪਣੇ ਘਰ ਦਾ ਗੁਜ਼ਾਰਾ ਕਰ ਰਿਹਾ ਹੈ | ਨੌਜਵਾਨ ਦੀ ਅਚਾਨਕ ਹੋਈ ਮੌਤ ਨਾਲ ਪਿੰਡ ਅਤੇ ਇਲਾਕੇ ਵਿਚ ਸੋਗ ਦੀ ਲਹਿਰ ਪਾਈ ਜਾ ਰਹੀ ਹੈ | ਪੁਲਿਸ ਵਲੋਂ ਅਗਲੇਰੀ ਕਾਰਵਾਈ ਕੀਤੀ ਜਾ ਰਹੀ ਹੈ |
