ਚੰਡੀਗੜ੍ਹ, 22 ਅਪ੍ਰੈਲ (ਸੁਖਵਿੰਦਰ ਸਿੰਘ ਸ਼ਾਨ)-ਭਾਰਤੀ ਰਾਸ਼ਟਰਵਾਦੀ ਪਾਰਟੀ ਪੰਜਾਬ ਦੀ ਪ੍ਰਧਾਨ ਅਤੇ ਸਾਬਕਾ ਵਿਧਾਇਕਾ ਡਾਕਟਰ ਨਵਜੋਤ ਕੌਰ ਸਿੱਧੂ ਨੇ ਦੋਸ਼ ਲਾਇਆ ਕਿ ਪੰਜਾਬ ਮਿਲਕਫੈੱਡ ਦੇ ਅਦਾਰੇ ਵੇਰਕਾ ਅਤੇ ਦੁੱਧ ਖਰੀਦ ਕੇਂਦਰਾਂ ਰਾਹੀਂ ਚਾਰਾ ਬੀਜ ਘੁਟਾਲਾ ਕੀਤਾ ਗਿਆ ਤੇ ਕਰੋੜਾਂ ਰੁਪਏ ਦੇ ਕਾਲ਼ੇ ਧਨ ਨੂੰ ਚਿੱਟਾ ਕੀਤਾ ਗਿਆ | ਪੈੱ੍ਰਸ ਕਲੱਬ ਵਿਚ ਕਾਨਫਰੰਸ ਦੌਰਾਨ ਡਾ. ਨਵਜੋਤ ਕੌਰ ਸਿੱਧੂ ਨੇ ਦੱਸਿਆ ਕਿ ਮਿਲਕਫੈੱਡ ਦੇ ਅਦਾਰੇ ਵੇਰਕਾ ਨੇ ਸਾਲ 2025 'ਚ ਪੰਜਾਬ ਦੇ ਦੁੱਧ ਉਤਪਾਦਕ ਕਿਸਾਨਾਂ ਨੂੰ ਪਸ਼ੂਆਂ ਦੇ ਚਾਰੇ ਲਈ ਮੱਕੀ ਦਾ ਬੀਜ ਦੇਣਾ ਸੀ, ਪਰ ਇਹ ਬੀਜ ਉਤਪਾਦਕਾਂ ਨੂੰ ਨਹੀਂ ਦਿੱਤਾ ਗਿਆ | ਸਗੋਂ ਉਤਪਾਦਕਾਂ ਨੂੰ ਬੀਜ ਦੀ ਥਾਂ ਦੁੱਧ ਖ਼ਰੀਦ ਕੇਂਦਰਾਂ (ਸਰਕਾਰੀ ਡੈਅਰੀ) ਰਾਹੀਂ ਬੀਜ ਦੀ ਬਣਦੀ ਰਕਮ ਨਕਦ ਰੂਪ 'ਚ ਦਿੱਤੀ ਗਈ ਸੀ | ਬੀਬਾ ਸਿੱਧੂ ਨੇ ਦੱਸਿਆ ਕਿ ਹੁਸ਼ਿਆਰਪੁਰ ਜ਼ਿਲ੍ਹੇ ਵਿਚ ਦੁੱਧ ਉਤਪਾਦਕ ਕਿਸਾਨਾਂ ਨੂੰ ਬੀਜ ਦੀ ਥਾਂ ਨਕਦ ਪੈਸੇ ਦਿੱਤੇ ਗਏ ਸਨ, ਪਰ ਬਾਅਦ ਵਿਚ ਉਤਪਾਦਕਾਂ ਵਲੋਂ ਵੇਰਕਾ ਨੂੰ ਵੇਚੇ ਦੁੱਧ ਦੀ ਬਣਦੀ ਰਕਮ ਵਿਚੋਂ ਇਹ ਪੈਸੇ ਕੱਟ ਲਏ ਗਏ | ਇਸ ਤਰ੍ਹਾਂ ਕਰਕੇ ਮਿਲਕਫੈੱਡ, ਵੇਰਕਾ ਅਤੇ ਸਹਿਕਾਰੀ ਦੁੱਧ ਖਰੀਦ ਕੇਂਦਰ ਦੇ ਅਧਿਕਾਰੀਆਂ ਨੇ ਇਕ ਤਾਂ ਬੀਜ ਖੁੱਲੇ੍ਹ ਬਾਜ਼ਾਰ ਵਿਚ ਵੇਚ ਕੇ ਕਰੋੜਾਂ ਦੀ ਕਮਾਈ ਕੀਤੀ ਗਈ ਤੇ ਦੂਜਾ ਕਿਸਾਨਾਂ ਨੂੰ ਦਿੱਤੀ ਜਾਂਦੀ 30 ਫੀਸਦੀ ਸਬਸਿਡੀ ਦਾ ਘੁਟਾਲਾ ਕੀਤਾ ਗਿਆ | ਉਨ੍ਹਾਂ ਸਵਾਲ ਕੀਤਾ ਸਾਲ 2025 'ਚ ਬੀਜ ਕੇਂਦਰ ਬੱਸੀ ਪਠਾਣਾਂ (ਜ਼ਿਲ੍ਹਾ ਫ਼ਤਿਹਗੜ੍ਹ ਸਾਹਿਬ) ਵਿਖੇ ਕਿਸਾਨਾਂ ਲਈ ਤਿਆਰ ਕੀਤਾ ਮੱਕੀ ਦਾ ਬੀਜ ਹਰਿਆਣਾ ਨੰਬਰ ਦੀ ਗੱਡੀਆਂ ਰਾਹੀਂ ਕਿੱਥੇ ਭੇਜਿਆ ਗਿਆ ਸੀ? ਦੁੱਧ ਉਤਪਾਦਕਾਂ ਨੂੰ ਨਕਦ ਰੂਪ ਵਿਚ ਦਿੱਤਾ ਧਨ ਕਿਥੋਂ ਆਇਆ ਅਤੇ ਕਿਸ ਦਾ ਸੀ? ਕੀ ਇਹ ਕਾਲਾ ਧਨ ਦੁੱਧ ਉਤਪਾਦਕਾਂ ਨੂੰ ਨਕਦ ਦੇ ਕੇ ਫਿਰ ਵਸੂਲੀ ਕਰਕੇ ਚਿੱਟਾ ਕੀਤਾ ਗਿਆ ਸੀ? ਬੀਬਾ ਸਿੱਧੂ ਨੇ ਕਿਹਾ ਕਿ ਮਿਲਕਫੈੱਡ ਦਾ ਅਦਾਰਾ ਸਿੱਧੇ ਤੌਰ 'ਤੇ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਅਧੀਨ ਆਉਂਦਾ ਹੈ, ਇਸ ਲਈ ਮੁੱਖ ਮੰਤਰੀ ਨੂੰ ਚਾਰਾ ਬੀਜ ਘੁਟਾਲੇ, ਦੁੱਧ ਉਤਪਾਦਕਾਂ ਨੂੰ ਦਿੱਤੇ ਨਕਦ ਪੈਸਿਆਂ ਸੰਬੰਧੀ ਆਪਣੀ ਸਥਿਤੀ ਸਪੱਸ਼ਟ ਕਰਨੀ ਚਾਹੀਦੀ ਹੈ | ਉਨ੍ਹਾਂ ਮੰਗ ਕੀਤੀ ਕਿ ਇਸ ਸਾਰੇ ਮਾਮਲੇ ਦੀ ਉੱਚ ਪੱਧਰੀ ਅਤੇ ਵਿਜੀਲੈਂਸ ਜਾਂਚ ਕਰਵਾਈ ਜਾਵੇ ਤੇ ਦੋਸ਼ੀ ਅਧਿਕਾਰੀਆਂ ਖਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇ | ਇਸ ਮੌਕੇ ਜਨਹਿਤ ਅਧਿਕਾਰ ਐਸੋਸੀਏਸ਼ਨ ਦੇ ਪ੍ਰਧਾਨ ਮਨਜੀਤ ਸਿੰਘ, ਪਾਰਟੀ ਦੇ ਆਗੂ ਸੰਦੀਪ ਸਿੰਘ, ਪ੍ਰਦੀਪ ਸ਼ਰਮਾ ਤੇ ਹੋਰ ਆਗੂ ਹਾਜ਼ਰ ਸਨ |
