ਮੋਗਾ, 30 ਜੂਨ (ਗੁਰਤੇਜ ਸਿੰਘ ਬੱਬੀ)-28 ਤੇ 29 ਦੀ ਦਰਮਿਆਨੀ ਰਾਤ ਕੋਟਕਪੂਰਾ ਬਾਈਪਾਸ ਕੈਂਬਰਿਜ ਸਕੂਲ ਦੇ ਪਿੱਛੇ ਰਹਿੰਦੇ ਕੁੱਝ ਪ੍ਰਵਾਸੀ ਮਜ਼ਦੂਰਾਂ ਨੇ ਬੇਟਾਈਮਾ ਡੀ.ਜੇ. ਲਗਾਇਆ ਹੋਇਆ ਸੀ ਤਾਂ ਉਸ ਏਰੀਏ ਵਿਚੋਂ ਮੋਗਾ ਪੁਲਿਸ ਨੂੰ 112 ਨੰਬਰ ’ਤੇ ਕਾਲ ਆਈ ਕਿ ਕੁੱਝ ਪ੍ਰਵਾਸੀ ਮਜ਼ਦੂਰ ਡੀ.ਜੇ. ਲਗਾ ਕੇ ਹੁੱਲੜਬਾਜ਼ੀ ਕਰ ਰਹੇ ਹਨ ਜਿਸ ਨਾਲ ਮੁਹੱਲੇ ਦਾ ਮਾਹੌਲ ਵਿਗੜ ਰਿਹਾ ਹੈ ਤੇ ਜਦੋਂ ਪੀ.ਸੀ.ਆਰ. ਮੋਗਾ ਪੁਲਿਸ ਦੇ ਮੁਲਾਜ਼ਮ ਹੌਲਦਾਰ ਸੂਬਾ ਸਿੰਘ ਅਤੇ ਹੌਲਦਾਰ ਗੁਰਭੇਜ ਸਿੰਘ ਮੌਕੇ ’ਤੇ ਪੁੱਜੇ ਤਾਂ ਉਨ੍ਹਾਂ ਦੀ ਗੱਲ ਮੰਨਣ ਦੀ ਬਜਾਏ ਪੁਲਿਸ ਮੁਲਾਜ਼ਮਾਂ ’ਤੇ ਪੱਥਰਾਂ ਰੋੜਿਆਂ ਨਾਲ ਹਮਲਾ ਕਰਕੇ ਉਨ੍ਹਾਂ ਜ਼ਖਮੀ ਕਰ ਦਿੱਤਾ ਤੇ ਪੁਲਿਸ ਮੁਲਾਜ਼ਮਾਂ ਨੇ ਭੱਜ ਕੇ ਜਾਨ ਬਚਾਈ। ਪੁਲਿਸ ਵਲੋਂ ਇਸ ਵਿਰੁੱਧ ਕਾਰਵਾਈ ਕਰਦਿਆਂ ਇਸ ਮਾਮਲੇ ਵਿਚ ਥਾਣਾ ਸਿਟੀ ਸਾਊਥ ਵਿਚ ਸੱਤ ਪ੍ਰਵਾਸੀਆਂ ਜਿੰਨ੍ਹਾਂ ਵਿਚ ਨਿਰੰਜਨ ਸਿੰਘ ਪੁੱਤਰ ਸ਼ਿਵ ਨਾਥ, ਅਰਜਨ ਕੁਮਾਰ ਪੁੱਤਰ ਜੈ ਰਾਮ, ਹਰਤੇਸ਼ ਕੁਮਾਰ ਪੁੱਤਰ ਕਮਲੇਸ਼ ਕੁਮਾਰ, ਕਮਲੇਸ਼ ਕੁਮਾਰ ਪੁੱਤਰ ਰਾਮ ਰਸਿਨ, ਮੋਨੂੰ ਯਾਦਵ ਪੁੱਤਰ ਸੁਰਿੰਦਰ ਯਾਦਵ, ਮਨੀ ਕੁਮਾਰ ਪੁੱਤਰ ਸ਼ਿਵ ਨਾਥ ਸਾਰੇ ਵਾਸੀ ਮੋਗਾ ’ਤੇ ਵੱਖ ਵੱਖ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕਰਕੇ ਪੰਜ ਜਾਣਿਆਂ ਨੂੰ ਗ੍ਰਿਫਤਾਰ ਕਰਕੇ ਅਗਲੀ ਕਾਰਵਾਈ ਆਰੰਭ ਦਿੱਤੀ ਹੈ। ਮਾਮਲੇ ਦੀ ਜਾਂਚ ਸਹਾਇਕ ਥਾਣੇਦਾਰ ਮਲਕੀਅਤ ਸਿੰਘ ਥਾਣਾ ਸਿਟੀ ਸਾਊਥ ਕਰ ਰਹੇ ਹਨ।
