ਤਪਾ ਮੰਡੀ, 24 ਜਨਵਰੀ (ਪ੍ਰਵੀਨ ਗਰਗ)-ਸਿਵਲ ਹਸਪਤਾਲ ਤਪਾ ਵਿਖੇ ਏ.ਆਈ. ਸਾਫ਼ਟਵੇਅਰ ਨਾਲ ਲੈਸ ਪੋਰਟੇਬਲ ਐਕਸਰੇ ਮਸ਼ੀਨ ਉਪਲਬਧ ਹੈ, ਜਿਸ ਰਾਹੀ ਮਰੀਜ਼ ਆਪਣਾ ਐਕਸਰੇ ਕਰਵਾ ਸਕਦੇ ਹਨ | ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਸੀਨੀਅਰ ਮੈਡੀਕਲ ਅਫਸਰ ਡਾ: ਕੰਵਲਜੀਤ ਬਾਜਵਾ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਕੀਤਾ | ਉਨ੍ਹਾਂ ਦੱਸਿਆ ਕਿ ਜਦੋਂ ਮਰੀਜ਼ ਨੂੰ ਬੁਖ਼ਾਰ, ਲੰਬੀ ਖਾਂਸੀ ਦੇ ਨਾਲ-ਨਾਲ ਭਾਰ ਘਟਣ ਲੱਗ ਜਾਂਦਾ ਹੈ ਤਾਂ ਉਸ ਵਿਚ ਟੀ.ਬੀ. ਦੀ ਬਿਮਾਰੀ ਦੇ ਲੱਛਣ ਪੈਦਾ ਹੋਣ ਦੇ ਅਸਾਰ ਲੱਗਦੇ ਹਨ ਅਤੇ ਕਈ ਵਾਰ ਇਹ ਬਿਮਾਰੀ ਵਧੀ ਹੋਈ ਹੁੰਦੀ ਹੈ | ਇਸ ਤਰ੍ਹਾਂ ਦੇ ਮਰੀਜ਼ ਆਪਣਾ ਐਕਸਰੇ ਪੋਰਟੇਬਲ ਮਸ਼ੀਨ ਰਾਹੀਂ ਕਰਵਾ ਸਕਦੇ ਹਨ | ਇਹ ਮਸ਼ੀਨ ਮਰੀਜ਼ ਦੀ ਛਾਤੀ ਦੀ ਪੂਰੀ ਪਰਖ ਕਰਦੀ ਹੈ, ਜੇਕਰ ਮਰੀਜ਼ ਦੀ ਛਾਤੀ ਵਿਚ ਕਿਸੇ ਵੀ ਤਰ੍ਹਾਂ ਦੀ ਕੋਈ ਵੀ ਸਮੱਸਿਆ ਦਿਖਾਈ ਦਿੰਦੀ ਹੈ ਤਾਂ ਇਹ ਉਸ ਦਾ ਐਕਸਰੇ ਆਪਣੇ ਆਪ ਅਲੱਗ ਕਰ ਦਿੰਦੀ ਹੈ | ਇਸ ਮਸ਼ੀਨ ਨੂੰ ਰੇਡੀਉਗ੍ਰਾਫਰ ਦੁਆਰਾ ਚਲਾਇਆ ਜਾਂਦਾ ਹੈ | ਉਨ੍ਹਾਂ ਆਖਿਆ ਕਿ ਹਸਪਤਾਲ ਵਿਚ ਆਉਣ ਵਾਲੇ ਮਰੀਜ਼ਾਂ ਦੀ ਫ਼ਰੀ ਸਕਰੀਨਿੰਗ ਵੀ ਕੀਤੀ ਜਾਂਦੀ ਹੈ, ਜਿਸ ਵਿਚ ਬੀ.ਪੀ, ਸ਼ੂਗਰ ਆਦਿ ਸ਼ਾਮਿਲ ਹਨ |
