ਤਲਵੰਡੀ ਭਾਈ, 30 ਮਈ (ਰਵਿੰਦਰ ਸਿੰਘ ਬਜਾਜ)-ਤਲਵੰਡੀ ਭਾਈ ਅੰਦਰ ਅੱਜ ਸ਼ਾਮ ਦੇ ਕਰੀਬ 6 ਵਜੇ ਦੋ ਮੋਟਰਸਾਈਕਲ ਸਵਾਰਾਂ ਵੱਲੋਂ ਇਕ ਘਰ 'ਚ ਇਕੱਲੀ ਔਰਤ ਨੂੰ ਨਿਸ਼ਾਨਾ ਬਣਾਉਂਦਿਆਂ ਉਸ ਦੇ ਕੰਨਾਂ ਦੀਆਂ ਵਾਲੀਆਂ ਖੋਹ ਲੈਣ ਦੀ ਖ਼ਬਰ ਹੈ | ਮਿਲੀ ਜਾਣਕਾਰੀ ਅਨੁਸਾਰ ਪੀੜਤਾ ਸੀਤਾ ਰਾਣੀ ਪਤਨੀ ਸਵ. ਲਵ ਕੌਸ਼ਲ ਵਾਸੀ ਗਲੀ ਨੰਬਰ 1 ਤਲਵੰਡੀ ਭਾਈ ਨੇ ਦੱਸਿਆ ਕਿ ਅੱਜ ਸ਼ਾਮ ਕਰੀਬ 6 ਵਜੇ ਉਹ ਆਪਣੇ ਘਰ ਅੰਦਰ ਬੈਠੀ ਸੀ ਤਾਂ 2 ਅਣਪਛਾਤੇ ਵਿਅਕਤੀ ਆਏ, ਜਿਨ੍ਹਾਂ ਨੇ ਉਸ ਦੇ ਘਰ ਅੱਗੇ ਮੋਟਰਸਾਈਕਲ ਖੜ੍ਹਾ ਕੀਤਾ ਅਤੇ ਇਕ ਵਿਅਕਤੀ ਘਰ ਅੰਦਰ ਦਾਖ਼ਲ ਹੋ ਗਿਆ | ਪੀੜਤ ਅਨੁਸਾਰ ਉਨ੍ਹਾਂ ਦਾ ਡਿਸਪੋਜ਼ਲ ਵਗ਼ੈਰਾ ਦਾ ਕੰਮ ਹੈ ਤੇ ਉਕਤ ਵਿਅਕਤੀ ਕੁਝ ਸਮਾਨ ਲੈਣ ਬਾਰੇ ਕਹਿਣ ਲੱਗ ਗਿਆ ਤਾਂ ਇਕਦਮ ਝਪਟਾ ਮਾਰ ਕੇ ਉਸ ਦੇ ਕੰਨਾਂ ਵਿਚੋਂ ਸੋਨੇ ਦੀਆਂ ਵਾਲੀਆਂ ਖਿੱਚ ਲਈਆਂ ਤੇ ਦੂਸਰੇ ਵਿਅਕਤੀ ਨਾਲ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਫ਼ਰਾਰ ਹੋ ਗਿਆ | ਪੀੜਤਾ ਸੀਤਾ ਰਾਣੀ ਨੇ ਦੱਸਿਆ ਕਿ ਵਾਲੀਆਂ ਦਾ ਵਜ਼ਨ ਅੰਦਾਜ਼ਨ ਅੱਧਾ ਤੋਂ ਇਕ ਤੋਲਾ ਸੀ | ਇਸ ਸਬੰਧੀ ਪਰਿਵਾਰ ਵਲੋਂ ਪੁਲਿਸ ਥਾਣਾ ਤਲਵੰਡੀ ਭਾਈ ਵਿਖੇ ਸ਼ਿਕਾਇਤ ਦਰਜ ਕਰਵਾ ਦਿੱਤੀ ਗਈ ਹੈ |
