ਸਾਹਿਤ ਦੀ ਸੁਗੰਧ ਨਾਲ ਮਹਿਕੀ ਸੱਥ ਦੀ ਮਹੀਨਾਵਾਰ ਬੈਠਕ
ਅਜੀਤ ਡੈਸਕ
20-04-2026
ਮੀਟਿੰਗ ਦੌਰਾਨ ਕਵਿਤਾ, ਗਜ਼ਲ, ਗੀਤ ਅਤੇ ਕਹਾਣੀ ਦੇ ਰੰਗ ਮਿਲ ਕੇ ਇਕ ਰੂਹਾਨੀ ਸੁਰ ਬਣ ਗਏ | ਸੁਖਵਿੰਦਰ ਸਿੰਘ ਬਿੱਟੂ ਖੰਨੇਵਾਲਾ ਨੇ ਆਪਣੇ ਧਾਰਮਿਕ ਗੀਤ ਰਾਹੀਂ ਰੂਹਾਨੀ ਅਹਿਸਾਸਾਂ ਨੂੰ ਜਗਾਇਆ | ਨਰਿੰਦਰ ਮਣਕੂ ਅਤੇ ਨਰੇਸ਼ ਨਿਮਾਣਾ ਦੀਆਂ ਗਜ਼ਲਾਂ ਨੇ ਜਜ਼ਬਾਤਾਂ ਦੀ ਨਫ਼ਾਸਤ ਨੂੰ ਬਖ਼ੂਬੀ ਉਜਾਗਰ ਕੀਤਾ | ਪਰਮਜੀਤ ਸਿੰਘ ਮੁੰਡੀਆਂ ਨੇ ਲੋਕ ਤੱਥਾਂ ਰਾਹੀਂ ਧਰਤੀ ਨਾਲ ਜੁੜੇ ਸੱਚ ਨੂੰ ਸਾਂਝਾ ਕੀਤਾ, ਜਦਕਿ ਮਨਜੀਤ ਸਿੰਘ ਧੰਜਲ ਅਤੇ ਸੁਖਵਿੰਦਰ ਭਾਦਲਾ ਦੇ ਗੀਤਾਂ ਨੇ ਸੰਗੀਤਮਈ ਰਸ ਭਰਿਆ |ਗੁਰਸੇਵਕ ਸਿੰਘ ਢਿੱਲੋਂ ਨੇ ਆਪਣੀ ਜਲਦ ਪ੍ਰਕਾਸ਼ਿਤ ਹੋਣ ਵਾਲੀ ਗ਼ਜ਼ਲਾਂ ਦੀ ਪੁਸਤਕ ਵਿਚੋਂ ਇੱਕ ਗ਼ਜ਼ਲ ਪੇਸ਼ ਕਰਕੇ ਸਾਹਿਤਕ ਰੁਚੀ ਨੂੰ ਹੋਰ ਵੀ ਗਹਿਰਾ ਕੀਤਾ | ਮਾਸਟਰ ਰਾਜ ਸਿੰਘ ਬਧੌਛੀ ਦੀ ਮਿੰਨੀ ਕਹਾਣੀ 'ਫਨੇ ਖਾਂ' ਨੇ ਰੋਜ਼ਮਰਾ ਜੀਵਨ ਦੇ ਨਿਰਾਲੇ ਪਹਲੂ ਨੂੰ ਰੁਚਿਕਾਰ ਢੰਗ ਨਾਲ ਪੇਸ਼ ਕੀਤਾ, ਜਦਕਿ ਅਵਤਾਰ ਸਿੰਘ ਉਟਾਲਾਂ ਦੇ ਗੀਤ ਨੇ ਬੈਠਕ ਨੂੰ ਰਸਮਈ ਅੰਤ ਵੱਲ ਲਿਜਾਇਆ |ਇਸ ਮੌਕੇ ਪਿਛਲੇ ਮਹੀਨੇ ਆਯੋਜਿਤ ਸਲਾਨਾ ਸਮਾਗਮ ਦਾ ਵਿਸਥਾਰਪੂਰਵਕ ਲੇਖਾ-ਜੋਖਾ ਵੀ ਪੇਸ਼ ਕੀਤਾ ਗਿਆ ਅਤੇ ਉਹਨਾਂ ਸਾਰੇ ਮਹਿਮਾਨਾਂ ਤੇ ਸਾਹਿਤਕਾਰਾਂ ਦਾ ਹਿਰਦੇ ਤੋਂ ਧੰਨਵਾਦ ਕੀਤਾ ਗਿਆ, ਜਿਨ੍ਹਾਂ ਦੇ ਯੋਗਦਾਨ ਨਾਲ ਉਹ ਸਮਾਗਮ ਯਾਦਗਾਰ ਬਣਿਆ | ਸਾਰੀ ਕਾਰਵਾਈ ਨੂੰ ਸੁਚਾਰੂ ਅਤੇ ਪ੍ਰਭਾਵਸ਼ਾਲੀ ਢੰਗ ਨਾਲ ਨਿਭਾਉਂਦੇ ਹੋਏ ਸੁਖਵਿੰਦਰ ਸਿੰਘ ਭਾਦਲਾ ਨੇ ਮੰਚ ਸੰਚਾਲਨ ਦੀ ਭੂਮਿਕਾ ਬਖ਼ੂਬੀ ਅਦਾ ਕੀਤੀ | ਇਹ ਇਕੱਤਰਤਾ ਨਾ ਸਿਰਫ਼ ਰਚਨਾਤਮਕ ਸੋਚ ਦਾ ਮੰਚ ਸਾਬਤ ਹੋਈ, ਸਗੋਂ ਪੰਜਾਬੀ ਭਾਸ਼ਾ ਅਤੇ ਸਾਹਿਤ ਨਾਲ ਜੁੜੇ ਹਿਰਦਿਆਂ ਨੂੰ ਇੱਕ ਮੰਚ 'ਤੇ ਜੋੜਨ ਦਾ ਸੁੰਦਰ ਸਾਧਨ ਵੀ ਬਣੀ |
