ਆਓ! ਮਨ ਲਗਾ ਕੇ
ਕੁਝ ਪੌਦੇ ਲਗਾ ਲਈਏ,
ਆਓ! ਲਗਾਏ ਪੌਦਿਆਂ ਨੂੰ
ਬੱਚਿਆਂ ਵਾਂਗ ਪਾਲ ਲਈਏ,
ਆਓ! ਸਭ ਕੁਝ ਭੁਲਾ ਕੇ
ਕੁਦਰਤ ਨਾਲ ਜੁੜ ਜਾਈਏ |
ਆਓ! ਪੰਛੀਆਂ-ਪਰਿੰਦਿਆਂ ਤੇ ਜਾਨਵਰਾਂ ਲਈ
ਦਾਣਾ-ਪਾਣੀ ਭੋਜਨ ਪਾ ਦੇਈਏ
ਆਓ! ਇਨ੍ਹਾਂ ਦੀ ਭੁੱਖ-ਪਿਆਸ ਮਿਟਾ ਦੇਈਏ,
ਆਓ! ਕੁਝ ਪਲ ਲਈ
ਅਦਭੁੱਤ ਨਿਆਰੀ ਕੁਦਰਤ ਨਾਲ ਜੁੜ ਜਾਈਏ |
ਸਮਾਂ ਕੱਢ ਕੇ
ਚੰਨ-ਤਾਰਿਆਂ ਨੂੰ ਤੱਕੀਏ
ਬੂਟ-ਜੁਰਾਬਾਂ ਖੋਲ੍ਹ
ਪੈਰ ਧਰਤੀ 'ਤੇ ਰੱਖੀਏ,
ਅਸਲ ਸੁੱਖ-ਸਕੂਨ ਵੱਲ ਮੁੜ ਜਾਈਏ
ਆਓ! ਕੁਦਤ ਨਾਲ ਜੁੜ ਜਾਈਏ |
ਦਾਤਣ ਦੀ ਵਰਤੋਂ ਕਰਕੇ
ਖੂਹਾਂ ਤੋਂ ਪਾਣੀ ਭਰ ਕੇ
ਵਿਰਸੇ ਵੱਲ ਫਿਰ ਆ ਜਾਈਏ
ਸੱਥਾਂ ਵਿਚ ਪਾ ਕੇ ਸਾਂਝਾਂ
ਦਿਲ ਦੀਆਂ ਰਮਜ਼ਾਂ ਸੁਣਾ ਜਾਈਏ
ਆਓ! ਕੁਦਰਤ ਵੱਲ ਆ ਜਾਈਏ |
ਕਰਕੇ ਸਵੇਰ ਦੀ ਸੈਰ
ਭੁਲਾ ਕੇ ਮਨ-ਮੁਟਾਵ ਤੇ ਵੈਰ,
ਤੰਦਰੁਸਤੀ ਤੇ ਭਾਈਚਾਰਕਤਾ ਵੱਲ ਆ ਜਾਈਏ
ਆਓ! ਕੁਦਰਤ ਵੱਲ ਮੁੜ ਕੇ
ਕੁਦਰਤ ਨਾਲ ਜੁੜ ਕੇ
ਕੁਦਰਤ ਨਾਲ ਪਿਆਰ ਪਾ ਜਾਈਏ |
-ਮਾ. ਸੰਜੀਵ ਧਰਮਾਣੀ
ਸਟੇਟ ਐਵਾਰਡੀ, ਸ੍ਰੀ ਆਨੰਦਪੁਰ ਸਾਹਿਬ |
ਮੋਬਾਈਲ : 94785-61356
